Македонија
ДУИ ги напиша оставките за своите министри
Неџати Јакупи и Џеват Бучи од ДУИ ги подготвиле своите оставки на позициите министер за животна средина и заменик-министер за внатрешни работи. Се очекува тие до премиерот Никола Груевски да бидат дадени до крајот на неделава, откриваат извори од партијата на Али Ахмети.
Со тоа ДУИ, го почнува новиот бран на оставки преку кои ќе се менува владиниот состав, после оној во средината на јули, кога заминаа вицепремиерот за европски прашања Ивица Боцевски, министерот за земјоделие Ацо Спасеновски, министерот за образование Перо Стојановски и други владини функционери.Според информации со кои располага forum.com.mk, Јакупи поради корупцијата во неговиот кабиент, а Бучи поради незадоволни резултати во секторот биле приморани од лидерот Ахмети да ги напуштат своите позиции во Влада. Освен нив двајца, оставка до петок би требало да понуди и државниот секретар во Влада Абудла Азири. На негово место се планира да дојде Бучи.На местото пак, на Јакупи би требало да дојде сегашниот директор на „Аеродорми“ – Орхан Рамадани. Аеродромите по изборот на Рамадани, најверојатно ќе ги преземе претходниот директор Зоран Крстевски, кој очекува да остане на таа позиција и по доаѓањето на турската фирма која го има под концесија скопскиот аеродром. Сега тој ја држи позицијата директор на Агенцијата за цивилна воздушна пловидба.Тоа би било, првата етапа од есенските оставки. Како што објави Форум, тајмингот на оставките беше поврзан со два фактори. Прв, беше ребалансот на буџетот, за кој веќе почна да се расправа во Собранието. Втор е денешниот датум 15 септември, до кога до кога се пишува извештајот во Брисел. За останатите министри на ДУИ, но и оние од владејачката коалиција која ја предводи ВМРО-ДПМНЕ ќе се чека и до декември, прогнозираат во партијата на Ахмети. Според информациите од ДУИ, Ахмети ќе ги менува речиси сите свои министерски решенија. Амнестирани би биле само министерот за здравство Бујар Османи – не толку поради успешното работење, туку поради доброто преставување на јавноста, и вицепремиерот за рамковен договор Абдулаќим Адеми – кој го поправи своето работење после критиките на лидерот Ахмети и партсикото членството на почетокот од годината. За заминување е министерот за труд и социјална политика, Џељал Бајрами. Него во Владата повеќе не го сака самиот Ахмети. Лидерот не бил задоволен од тоа што Бајрами не успеал да најде законско решение за пензиите на борците од ОНА. Од ДУИ не се многу задоволни и од работата на министерот за локална самоуправа Муса Џафери, но тој се уште важи за многу близок човек на Ахмети. Наводно, Џафери бил другар на Ахмети уште од детството. Можно е оставка да поднесе и заменик-министерот за образование Линдита Ќазими. Од своите фотелји ќе си заминат и некои директори на ДУИ во различни сектори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нема докази дека уапсените за убиството на докторот се сторителите
Нема докази дека лицата кои беа приведени за убиството на докторот во Железара се сторителите.
Од Обвинителството велат дека продолжуваат со дејствија, со цел идентификација на сторителите.
-До овој момент, со преземените дејствија од МВР и извршените вештачења од Институтот за судска медицина не се обезбедени докази кои даваат основано сомнение дека лицата лишени од слобода се сторители на кривичното дело. Од тие причини, јавниот обвинител, по истекот на времетраењето на определената мерка краткотраен куќен притвор, нема да предлага судот да определи нови мерки за претпазливост за трите лица кои беа задржани во врска со овој настан, велат од ОЈО.
Министерството за внатрешни работи, во координација со Основното јавно обвинителство Скопје, продолжува да презема дејствија за идентификација на сторителите на кривично дело.
Македонија
Постигната либерализација во товарниот транспорт за и од трети земји со Црна Гора
Министерството за транспорт и врски на Северна Македонија и Министерството за собраќај и поморство на Црна Гора потпишаа Протокол за либерализација на товарниот транспорт за и од трети земји.
Согласно Протоколот, либерализацијата ќе стапи на сила од 1 мај 2024 година и ќе има важност една година, период во кој ќе се прави анализа на состојбата во меѓународниот патен превоз, се со цел да се постигне конечно ослободување од системот на дозволи и во наредниот период.
Ова беше постигнато на состанокот на македонско-црногорската мешовита комисија за меѓународен патен превоз на патници и стока кој се одржа во Скопје.
До сега, двете земји врз база на реципроцитет разменуваа вкупно 300 дозволи за и од трети земји кои беа од огромно значење за товарниот транспорт.
Либерализацијата е чекор напред кон отстранување на сите админстративни постапки во однос на дозволите, процес што ќе придонесе за побрз и ефикасен транспорт како и зголемување на економската соработка меѓу Северна Македонија и Црна Гора.
Со Протоколот исто така двете страни се обврзаа да пристапат кон меѓусебно признавање на Сертификатите за професионална компетентност на возачите за учество во меѓународниот патен сообраќај. На состанокот се усогласија и процедурите во делот на превозот на патници меѓу двете земји.
Ова е прва средба на македонско-црногорската мешовита комисија за меѓународен патен превоз на патници и стока после тринаесет години, на која се донесоа низа мерки со кои значително се подобрува соработка меѓу Северна Македонија и Црна Гора во делот на патниот и товарниот транспорт.
Македонија
Воздухопловните сили на Италија од денеска ќе патролираат над македонското небо
Министерката за одбрана Славјанка Петровска и италијанскиот министер за одбрана Гвидо Крозето во Центарот за обука на пилоти во касарната „Страшо Пинџур“ во Петровец го потпишаа Техничкиот договор со кој Италијанските вооружени сили и официјално се вклучија во НАТО мисијата за воздухопловно патролирање над македонското небо.
Министерката Петровска по потпишувањето истакна дека со вклучувањето на Италија во оваа НАТО мисија, единството во Алијансата го гледаме на дело.
„Често споменуваме дека Алијансата е приказ на сојузништво и единство, но зборовите не можат да го отсликаат тоа што можеме да го видиме на дело – италијански и грчки воени воздухоплови, во координација со македонското воено воздухопловство гарантирајќи ја безбедноста на небото на Северна Македонија“, рече министерката.
Со Италија изградивме вистинско сојузништво и развивме силна соработка, рече Петровска, и додаде дека фактот дека италијански воздухоплови ќе ја гарантираат безбедноста на нашиот воздушен простор е приказ за целосна меѓусебна доверба.
Италијанскиот министер Крозето порача дека со денешното потпишување на овој историски договор, Италија заедно со Грција ја презема обврската за заштита на небото на Северна Македонија и дополни дека сојузништвото во Алијансата значи своите сили да се стават на располагање на други земји кога има потреба за такво нешто.
„Италија има чест што може да даде свој придонес во оваа насока и ѝ благодари на Северна Македонија за довербата“, рече Крозето.
Небото на Северна Македонија со официјалниот почеток на НАТО „air policing“ мисијата во нашата земја во декември 2021 година, и официјално стана дел од колективниот систем на Алијансата за воздушно патролирање. Досега, воздухопловното патролирање беше доверено на грчкото воено воздухопловство, а отсега тоа ќе се врши со воздухоплови на грчките и на италијанските воздухопловни сили, во координација со военото воздухопловство на Армијата на Република Северна Македонија.
Мисијата за воздухопловно патролирање на нашето небо ја раководи Сојузничката воздухопловна команда на НАТО, а тактичката контрола на мисијата е под раководство на Центарот за комбинирани воздухопловни операции во Торехон, Шпанија.