Македонија
Премиерот Груевски во посета на Австралија
Владина делегација предводена од премиерот Никола Груевски од денеска до 27-ми овој месец ќе престојува во работна посета на Австралија
За време на посетата премиерот Груевски ќе се сретне со премиерот на Австралија Кевин Рад, со кој со размена на писма ќе потпише Договор за социјално осигурување, кој на македонските иселеници во Австралија ќе им овозможи да ги остварат своите права од пензиско и инвалидско осигурување и доколку се вратат во Македонија. Ваков договор премиерот Груевски годинава потпиша и со Канада. Покрај средбата со својот домаќин Рад, македонскиот премиер во Канбера ќе биде примен и од претседателот на Претставничкиот дом на Парламентот Хари Џенкинс, а ќе има прием и со македонските иселеници. Вакви средби со иселениците предвидени се и во Сиднеј и во Мелбурн.Во составот на делегацијата се и министерот за надворешни работи Антонио Милошоски, директорот на Агенцијата за странски инвестиции Виктор Мизо, и новонаименуваниот амбасадор на Македонија во Австралија Перо Стојановски. Во Австралија според пописот од 2006 година има близу 85 илјади иселеници од Македонија. Дипломатски односи се воспоставени во 1995 година, а македонската амбасада во Канбера е отворена во 2005 година. Трговската размена од 2005 до 2008 година просечно се движи околу 6 милиони американски долари, а инвестициите од Австралија во Македонија лани изнесувале 2,180 милиони долари, а од 2003 до 2008 година вкупно 3,663 милиони долари. Премиерот Груевски ја скрати првично планираната осумдневна посета поради добиениот позитивен извештај од Европската комисија и потребата да оствари средби на 28-ми овој месец во Брисел со високи политичари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левица: Решението за градба кај болничкиот комплекс „Воена болница“ да се поништи веднаш
„Го повикуваме градоначалникот Стевчо Јакимовски да ги почитува законите и да го поништи Решението за градба на 17-катницата кај Болничкиот комплекс „Воена болница“, истакнуваат од Левица.
Потсетуваат дека политичката партија Левица повеќепати укажа на штетноста од градбата на повеќекатницата на истата локација, паралелно организираше протест на којшто граѓаните јавно го искажаа незадоволството од своеволието на градоначалникот и инвеститорите за противзаконската одлука на истите да почнат со градба на зграда за којашто немаат законска дозвола.
„Од пред неколку дена е правосилно Решението со кое се поништува незаконски позитивното конзерваторско мислење, кое се обидоа да го издејствуваат инвеститорите, а истото, по наши сознанија, е пристигнато во Општината на 21.3.2024 година, по што градоначалникот треба веднаш во законски рок да постапи по истато. За жал, Решението за градба уште не е поништено.
Од општинската администрација не даваат одговори по однос на прашањето по Решението со кое се одбива жалбата на инвеститорите, но успеавме да го добиеме, бидејќи е информација од јавен карактер“, дообјаснуваат од оваа партија.
Го повикуваат градоначалникот Стевчо Јакимовски во пресрет на изборната претседателска кампања да се одважи, како што велат, да ги испочитува законите и да го поништи Решението за градба веднаш, како би докажал пред граѓаните дека, навистина, ги застапува нивните интереси“.
Македонија
Инспектори затекнале диви менувачници на Бит Пазар, но наместо да ги запечатат им дозволиле да си работат
Полицијата поднесе кривична пријава против шест инспектори, вработени во Државен пазарен инспекторат, и тоа: С.Б.(32), Ј.Р.(54), В.М.(47), Б.С.(46),С.С.(61) и Р.Б.(37), сите од Скопје, поради злоупотреба на службена положба и овластување.
Во текот на март и април 2023 година, вршејќи контрола кај три менувачници, лоцирани во близина на Бит Пазар, а за кои што било утврдено дека не биле регистрирани како фирми и не поседувале лиценци издадени од НБРМ за вршење менувачко работење а подолг временски период работеле како менувачници, инспекторите на затекнатите лица во дивите менувачници биле должни да им изречат решение за забрана за вршење на дејност, да им ги запечатат објектите, да им ги одземат предметите, опремата и средствата со кои е направен прекршокот како и да им изречат глоба во износ од 1000 до 20.000 евра во денарска противвредност.
Но, пријавените пазаришни инспектори ги прекршиле сите одредби од наведениот закон и во три извршени вонредни инспекциски надзори на затекнатите лица во сите три објекти како менувачници, ниту им издале решение за забрана за вршење на нерегистрирана дејност, ниту им ги запечатиле просториите каде што ја вршеле противзаконската активност, ниту им ги одзеле средствата, предметите и опремата со кои е направен прекршокот ниту пак им изрекле глоба во износ од 1.000 до 20.000 евра.
Напротив, во сите три извршени вонредни надзори на сите три менувачници на секој од сопствениците им изрекле еднократна парична глоба во износ од 80 евра во денарска противредност и ги оставиле и понатаму менувачниците редовно да работат, со што постапиле спротивно на законот за забрана и спречување на вршење на нерегистрирана дејност и со неизвршување на својата службена должност го сториле кривичното дело „злоупотреба на службената положба и овластување“.
Македонија
Митрески – Бомгартнер: Северна Македонија и Франција имаат одлични односи, меѓусебната соработка и поддршка ќе се продлабочат
Претседателот на Собранието, Јован Митрески, денес оствари средба со aмбасадорот на Француската Република во Република Северна Македонија, Сирил Бомгартнер.
Изразувајќи задоволство од одржувањето на средбата, Митрески ја констатира одличната соработка меѓу двете држави и особено соработката на парламентарен план.
Амбасадорот Бомгартнер, честитајќи му го изборот за претседател на Собранието, се сложи со констатациите за интензивираната динамика на меѓусебна соработка. Во тој контекст ги поздрави средбите на парламентарци од Собранието на Република Северна Македонија и Националното собрание и Сенатот на Француската Република во изминатите години како позитивен тренд што треба да продолжи и во иднина.
Информира за претстојната посета на претседателката на групата за пријателство, Лилијана Танги, на земјата, како дел од набљудувачката мисија на ОБСЕ за претстојните претседателски и парламентарни избори.
Беше особено поздравено одржувањето на втората едукативна активност во Собранието „Имам став – Млад франкофонски парламент“, во рамките на одбележувањето на март – месец на франкофонијата, еден исклучителен настан и манифестација која полека прераснува во убава собраниска традиција.
Двајцата соговорници разменија мислења за актуелните собраниски активности, текот на изборите и конституирањето на новиот парламентарен состав. Беше изразена општа согласност за потребата од унапредувањето на соработката во доменот на културата, економијата, енергетиката и други области од заемен интерес за двете земји, како и за потребата од зголемување на бројот на француски инвестиции во земјата.