Македонија
Хомофобијата е длабоко влезена во образовниот систем
Хомофобијата е голем општествен проблем кој е длабоко инфилтриран во образовниот систем во Македонија, и затоа е потребна итна ревизија на сите учебници кои промовираат нетолеранција, заклучија дискутантите на денешната дебата по повод борбата против хомофобијата.
На дискусијата присуствуваа високите европски претставници: Симоне Филипини, Амбасадорка на Кралството Холандија, Шелдон Јет, претставник на УНИЦЕФ, Емануеле Гуихенеф, претставничка на Делегацијата на Европската Унија како и дел од домашните експерти за човекови права: Мирјана Најчевска, ко-автор на учебникот „Животни вештини“, Жарко Трајановски, автор на истражувањето „Љубов исклучиво после училиште“, Драшко Костовски од Х.Е.Р.А, и Славчо Димитров од Коалицијата за правата на маргинализираните заедници. Според Жарко Трајановски, во Македонија постои институционална хомофобија со тоа што македонските учебници кои нудат погрешни информации, негативни ставови и вредности за хомосексуалноста се одобрени од Министерството за образование. Според него, во одредени учебници кои ги третираат односите меѓу половите се среќаваат погрешни информации за хомосексуалноста која е опишана како негативна појава и истата се третира како опачина и се сугерира дека хомосексуалците се ненормални луѓе кои имаат психички проблеми. „Во учебникот „Психијатрија“, наменет за високото образование, се сугерира дека хомосексуалноста е болест или психичко пореметување, додека во учебникот „Граѓанско образование“ кој треба да промовира европски вредности, хомосексуалноста е вброена како девијантна појава. Учебникот „Етика“ исто така нуди негативен однос кон се што не е во склоп со хетеропатријархалната матрица која доминира во нашиот систем на образование,“ истакна Трајановски и додаде дека иако од НВО секторот на неколку наврати барале повлекување на овие учебници, засега не е превземено ништо во таа насока. Европските претставници едногласно и експлицитно нагласија дека во Европската Унија нема место за хомофобични општества и затоа повторно упатија апел до пратениците уште еднаш да го разгледаат законот за антидискриминација и во него експлицитно да ја наведат сексуалната ориентација како основ за дискриминација. „Слушнав дека на наставниците во Македонија им е тешко отворено да разговараат со своите ученици за теми кои влегуваат во полето на непријатност и затоа ги избегнуваат дискусиите што ги остава учениците неинформирани за сексуалноста. Во Холандија наставниците се континуирано обучувани за да знаат како да се однесуваат со своите ученици во вакви ситуации,“ рече Амбасадорката Филипини. Според Драшко Костовски, сексуалното образование е доживотен процес и затоа не смее да се кријат информации од децата под изговор дека со тоа ги „заштитуваме“ бидејќи тоа понатаму носи проблеми. „Генерално во нашите истражувања се покажува дека 90 отсто од наставниците и родителите се за воведување на посебен предмет на сексуално образование; 61 отсто од наставниците и 68 отсто од родителите се за програма која што ќе инволвира сексуална различност,“ истакна Костовски и додаде дека моќта на училиштето во борбата со хомофобијата и распознавање и прифаќање на различностите е огромна. Експертите истакнаа дека кај децата треба да се подигне свеста за човековите права и различностите, за да се изградат ставови и вредности кои ќе ја прифатат различната сексуална ориентација и да научат да бидат толерантни кон оние кои се различни од нив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат на ЗНАМ, Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата која што имаме намера во следниот период дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честиташе за успехот и се заблагодари на можноста да води кампања за која рече дека не била еднаква за сите оти законот кој е во сила не дава еднаква можност за медиумско претставување на сите партии.
Рече дека е горд на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоивме повеќе од 80.000 гласови. Регистриравме субјект кој постои нешто повеќе од три месеци и со граѓанската поддршка се етаблираше на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади членови, а да освоите над 80.000 гласови. Искрено сум горд на секој тој еден глас што дојде, како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој освои повеќе 100.000 гласови помалку од Гордана Сиљановска-Давкова.
„Почитуван мој претседателе, разликата е огромна. Доколку сакате да опстане централната и левата идеја во државата, откажете се од оваа битка и оставете не да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.
Македонија
ДИК: Сиљановска Давкова освои 324 177, Пендаровски 161 393 гласа по обработени 89,97 отсто
Стево Пендаровски освои 161 393 гласа, 19,90 отсто, Гордана Сиљановска Давкова 324 177 односно 39,97 отсто од гласовите, Стевчо Јакимовски освои 7.499 односно 0,92 отсто од вкупниот број на гласовите.
Кандидатот Бујар Османи освои 110 903, односно 13, 68 отсто, Билјана Ванковска 35.949 односно 4,43 отсто од гласовите, Арбен Таравари 78.110 илјади односно 9,63 отсто, Максим Димитриевски 70,996, односно 8,75 отсто од гласовите се резултатите од обработените 89,97 отсто од гласовите, извести претседателот на Државната изборна комисија, Александар Даштевски.
Тој додаде дека изборниот процес поминал мирно и достоинствено и смета дека 99 отсто работите поминале како што треба.
Македонија
Касами: Добитници на овие избори сме ние, ДУИ има купено гласови
„Влен“ е легитимен претставник на Албанците и ги доби гласовите на Албанците, изјави Билал Касами на прес конференција.
„Добитници на овие избори сме ние, коалицијата „Влен“. ДУИ има купено гласови од загрозените гласачи кои имаат потреби од пари. „Влен“ ги доби гласовите на Албанците, вели Касами.
„ДУИ го загуби последниот легитимитет да зборува во име на Албанците, затоа на 8 мај ние ќе победиме. Овој резултат и во мандати не е голема разлика со ДУИ и на 8 мај овој резултат ќе биде во наша полза. ДУИ успеа да ја загуби последната можност, еден кандидат Албанец да биде избран на директни избори во 2024 година. Тие ќе бидат запишани со црни букви во историјата на албанскиот народ во Македонија. Ако биле заинтересирани Албанец да оди во вториот круг сигурно ќе беа координирани со нас и ќе беше возможно да биде избран Албанец. Затоа мислиме дека вредеше оваа борба“, рече Касами.
Тој се заблагодари на сите што го гласаа кандидатот Арбен Таравари и додаде дека ДУИ има изгубено гласови од помалите етнички заедници и од загрозените граѓани.
Таравари кажа дека коалицијата подоцна ќе разговара за тоа кому ќе ги даде гласовите во вториот круг на претседателските избори.