Македонија
Македонска иницијатива за расправа за состојбите на Ромите во Европа
Состојбата на Ромите во Европа ќе биде темата на конференцијата што денеска ќе се одржи во Стразбур по иницијатива на министерот за надворешни работи, Антонио Милошоски како претседавач со Комитетот на министри на СЕ и Генералниот Секретар на Советот на Европа, Торбјорн Јагланд
Конференцијата доаѓа во време кога Генералниот секретар на ОН Бан Ки Мун пред Советот на Европа во Стразбур изрази жалење поради тоа што развиените земји ја користат загриженоста за имиграцијата и рецесијата како изговор за примена на политика на дискриминацијата и исклучувањето. „Во многу од развиените земји, имиграцијата и економската рецесија предизвикуваат растечка загриженост која се повеќе им служи како изговор за политичката дискриминација и исклучувањето,“ рече Бан на церемонијата на одбележувањето на 60-годишнината од усвојувањето на Европската конвенција за човекови права. На конференцијата покрај Милошоски, свое обраќање ќе има и Неждет Мустафа – министер без ресор во Владата на РМ и национален координатор за Декадата на Ромите, ќе бидат дискутирани главните прашања кои ја тангираат положбата на Ромите во европските земји и се очекува да биде изразена цврста политичка волја на државите-членки на СЕ во борбата против дискриминацијата и предрасудите кон Ромите, соопштија од Министерството за надворешни работи.Предвидено е на конференцијата да се усвои Стразбуршка Декларација што содржи листа на приоритети кои треба да служат како насоки за земјите-членки за поинтензивни активности во повеќе значајни областа за унапредување на состојбата на Ромите во Европа. Генералниот секретар на ОН Бан Ки Мун вчера на Советот на Европа во Стразбур рече дека остварувањето на човековите права за сите, не е невозможен сон, но дека претстојат бројни предизвици по ова прашање и демократските земји треба да дадат пример. „Кога говориме за човековите права не треба да бидеме селективни. Човековите права не се мени од кое може да бираш што ќе земеш,“ рече Бан Ки Мун. Ромите од многу европски држави отворено ја обвинија Франција како и Европската Унија за расизам и дискриминација, откако францускиот претседател Николас Саркози во јули годинава реши да протера околу 400 Роми во Романија и Бугарија, под изговор дека тоа е дел од борбата против криминалот во земјата. Многу од експертите и борците за човекови права низ светот, ваквите постапки ги осудија и ги нарекоа „расистички потези на Саркози и неговата влада“ и уште еднаш потсетија за лошата социјална положба и сиромаштија во која се наоѓаат повеќето Роми низ Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Прва пресуда за говор на омраза врз основа на сексуална ориентација
Основниот суд во Неготино, како надлежен првостепен кривичен суд, одлучувајќи по обвинителен предлог на Основното јавно обвинителство Кавадарци, а по кривична пријава од „Квир центар“, против лицето С. М. од општина Демир Капија, за сторено кривично дело ширење расистички и ксенофобичен материјал по пат на компјутерски систем од чл. 394-г ст. 1 од Кривичниот законик, на 15 март 2024 година донесе пресуда дека обвинетиот е виновен за делото за кое се товари.
Обвинетиот во јули минатата година на социјалната мрежа „Фејсбук“ под споделена медиумска содржина има напишано два коментара со вознемирувачки говор на омраза кон ЛГБТИ+ заедницата, во кои се повикува на насилство кон оваа маргинализирана група. Со тоа обвинетиот сторил кривично дело ширење расистички и ксенофобичен материјал по пат на компјутерски систем од чл. 394-г ст. 1 од Кривичниот законик, па судот му изрече алтернативна мерка – условна осуда, казна затвор во траење од една година. Утврдената казна затвор нема да се изврши доколку обвинетиот во рок од една година по правосилноста на пресудата не стори друго кривично дело.
Ова е прва осудителна пресуда во судската пракса на Македонија, со која се санкционира говор на омраза врз основа на сексуална ориентација, иако уште од февруари 2014 година со измените и дополнувањата на Кривичниот законик говорот на омраза е класифициран како кривично дело, па оттаму се забранува и казнува говор на омраза и ширење материјали преку интернет, кои промовираат или поттикнуваат омраза, дискриминација или насилство, против кое било лице или група, врз која било дискриминаторска основа. Според чл. 394-г ст. 1 од КЗ, за ширење расистички и ксенофобичен материјал по пат на компјутерски систем предвидена е казна затвор од една до пет години за секој што ќе предизвика или ќе разгори омраза, раздор или нетрпеливост, врз некоја дискриминаторска основа, вклучително врз основа на припадност на маргинализирана група.
Скопскиот „Квир центар“ ја поздравува одлуката на судот, кој демонстрира дека ги сфаќа сериозно поттикнувањето насилство и креирањето загрозувачка средина за ЛГБТИ+ луѓето. Говорот на омраза поттикнува сторување дела од омраза, па „Квир центар“ смета дека оваа осудителна пресуда е значајна победа во нашите напори да креираме безбедно опкружување за сите граѓани, без разлика на тоа поради кој основ или нивна различност ќе бидат цел на говор на омраза или дела од омраза.
Македонија
(Видео) „ДПМНЕ и Тошковски ја загрозуваат безбедноста на граѓаните“, вели Талевски
„Два месеца откако ВМРО-ДПМНЕ го презеде раководењето со Министерството за внатрешни работи, безбедносната состојба во Прилеп никогаш не била полоша. Она што особено ги загрижува граѓаните на Прилеп, е зачестениот тренд на опожарување на возила. Во последните неколку недели, запалените автомобили станаа прилепско секојдневие. Горат автомобилите на наши сограѓани: бизнисмени, обвинители, адвокати. Дневните билтени на МВР се претворени во регистер на настани од рубриката „црна хроника“, а фактот дека ниту еден од сторителите и нарачателите на овие дела не е откриен, го зголемува чувството на страв и несигурност кај граѓаните“, вели Миле Талевски, пратеник на СДСМ.
„Заради нестручноста на партиските војници на ДПМНЕ инфилтрирани во највисоките раководни структури на МВР, Прилеп стана опасно место за живеење.
И покрај тоа што на сите 15 клучни оддели за борба против криминалот техничкиот министер Панче Тошкоски постави свои началници, во изминатите два месеца Министерството за внатрешни работи не испорача никакви резултати.
Ветувањата на Тошкоски дека ќе ја интензивира борбата против криминалот, дека криминалните банди ќе станат минато, останаа мртво слово на хартија.
Голема лага беше и ветувањето на неговиот партиски шеф Христијан Мицкоски, дека кадрите на ДПМНЕ за две недели ќе ги расчистат сите афери и скандали во државата.
За само два месеца, ДПМНЕ не’ потсети на 11-годишното живеење во режим и повторно на дело го врати системот МВРО-ВМРО. Во ДПМНЕ ништо не е сменето. Тоа е истата режимска и антиевропска партија, за која граѓанските права и демократските вредности се мислена именка.
Нема промена на подобро со ДПМНЕ, тоа е партија која не може да донесе позитивна промена. Со ДПМНЕ загрозена е безбедноста на граѓаните на Прилеп.
Загрозувањето на европскиот пат значи и загрозување на безбедноста на граѓаните, тоа прилепчани добро го знаат“, изјави Миле Талевски, пратеник на СДСМ.
Македонија
Демири и Манолева во Охрид: Здравствениот дом со реновирана служба за вакцинации и две нови амбулантни возила
Министерот за здравство Илир Демири и заменик-министерката Маја Манолева денеска се во работна посета на Охрид, каде што ги посетуваат Здравствениот дом во Охрид и Специјализираната болница за ортопедија и трауматологија „Св. Еразмо“-Охрид.
„Во изминатиот период Здравствениот дом значително ги унапреди условите со реновирање на просториите во Службата за вакцинации, како и зголемување на нивото на здравствена заштита“, рече министерот Демири.
Со обнова на опремата за лабораторија и медицинска апаратура се прошири делокругот на анализи, кои сега се вршат во зздравствената установа.
„Како што ме информира директорката, набавени се две амбулантни возила за Итната медицинска помош од сопствени средства, со што се изврши обнова на возниот парк, поефикасно, побрзо и навремено реализирање на здравствените услуги за пациентите“, изјави Манолева.
Со цел подостоинствени услови за пациентите и вработените, потпишан е договор за поправки, санација на објектот „Маларична“ со примена на фасада, покрив и партерно уредување. Исто така, спроведена е постапка за санација на објектот амбуланта „Белчишта“ во вредност од 7.665.280.00 денари од сопствени средства.