Македонија
Солидна година во дипломатијата, смета Милошоски
Шефот на македонската дипломатија, Антонио Милошоски, како солидна за Македонија ја оцени 2010-та година во однос на дипломатските активности на земјата.Смета дека извештајот на Европската Комисија и македонското претседателство со Комитетот на министри на Советот на Европа се доволен доказ за тоа.„Сметам дека успехот во рамки на дипломатските ангажмани треба да биде согледуван и во рамки на нашето дејствување, но и во околностите во коешто тоа се случува. Знаеме дека Република Македонија, доколку не беше блокирана од страна на Република Грција во однос на НАТО и евро-интеграциите, бевме способни, подготвени, да направиме еден поголем исчекор. Во секој случај, позитивниот извештај што го добивме од Европската комисија, препораката и споделувањето на таа препорака од страна на Советот на Eвропската Унија, како и другите активности на меѓународен план, вклучително и македонското претседавање со Советот на Европа, ни даваат една добра основа да сметаме дека 2010-та година беше една солидна година во однос на нашите меѓународни активности“, изјави Милошоски.Тој на денешниот редовен Дипломатски Совет со македонските амбасадори во светот побара активност и посветеност, како во однос на политичката, така и во однос на соработката на другите полиња со земјите во кои се ангажирани. „Секој ќе треба да биде активен, ангажиран, посветен на својата работа, исполнителен, да ги унапредуваме билатералните односи со земјите во кои нашите амбасадори се акредитирани и секако да имаме што поголема иницијативност во однос на конкретните проекти кои не секогаш се поврзани со политика. Амбасадорската работа значи и активности во областа на трговијата, економијата, културата, соработката во одбраната и на други полиња“, изјави Милошоски.Во однос на критиките за скорешно именуваните амбасадори, Милошоски вели дека тие треба да се оценат според нивните резултати во земјата каде што се испратени. „Јас би сакал да се согласам со фактот што некој од кандидатите за амбасадори можат да се претстават подобро, некои можеби се претставуваат послабо во таа комуникација со комисијата за надворешна политика. Но во секој случај, главниот тест за секој веќе упатен амбасадор или амбасадори коишто наскоро ќе стапат на должност ќе биде активноста, залагањето и проектите во самата земја на престој. Очекуваме ваквите критики да бидат дополнителна мотивација за секој амбасадор да биде попосветен и поодговорен во рамки на своите задачи и надлежности во земјите во кои ја претставуваат Република Македонија“, вели Милошоски.Тој е задоволен од моменталниот амбасадорски состав на земјата.„Во овој момент имаме 42 акредитирани амбасадори, од коишто 21 амбасадор се дипломати од кариера, 21 се номинирани од страна на другите политички или општествени ресурси во земјата. Има една комбинација, еден спој и на помлади, поентузијасти, и на поискусни и политички поопитни луѓе во нашиот дипломатски кор. Сметам дека Република Македонија генерално земено, има еден солиден амбасадорски состав во овој момент. Но во секој случај, би кажал дека проценката за секој сегашен и иден амбасадор треба да биде оценка во текот на неговиот мандат согласно залагањата и постигнувањата во земјата каде што е упатен“, изјави Милошоски.На денешниот состанок Милошоски со амбасадорите размени мислења за македонско-грчкиот дијалог за името, процесот покренат пред Меѓународниот суд на правдата во Хаг, реформите во администрацијата и судството, унгарското и полското претседателство со Европската Унија предвидени за идната година, за регионалната соработка и прашањето за Косово, за кандидатури на Македонија во меѓународни организации, календар на билатерални посети во 2011-та година, економската дипломатија во услови на светска криза, како и за меѓународна промоција на настанот за Меморијалниот центар на Холокаустот, планиран за март 2011-та година. /крај/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Важно е разликата помеѓу Гордана и Стево да биде огромна, за да се спречат сите завери кои ги коваат Али и Ковачевски
е повикувам на мобилизација. Излезете и гласајте против оваа завера што и се прави на Македонија. Ние резервна татковина немаме и одговорот ќе го дадеме преку заокружување на бројот 2 и изборот за професорката Гордана Силјановска Давков, да и посакаме добредојде на идната претседателка Гордана Силјановска Давкова, истакна претседателот на ВМРО-ДПМНЕ Христијан Мицкоски на денешниот митинг во Штип.
„Запомнете, задутре за два дена од денес е важно како никогаш досега историски е важно разликата помеѓу идниот претседателка Гордана Силјановска Давкова и чиракот на Али, измеќарот на Али, Стево Пендаровски да биде што е можно поголема. Излезете и гласајте“, рече Мицкоски.
Претседателот Мицкоски упати порака и до младите и додаде:
„Не ја прифаќам тезата дека сте незаинтересирани за политиката, туку многу повеќе ја прифаќам тезата дека сте разочарани од факторите кои треба преку политиката да ја креираат вашата иднина. Ја имате младешката пркост, но допрва ќе го стекнете искуството и способноста да распознавате што е манипулација, а што реална понуда. Поддржете не и јас ви ветувам дека нема да ве разочараме. Дајте шанса на енергијата што носи промени и нов начин на работа. Ви велам и да приклучете се и заедно од внатре да ги менуваме заедно работите“, вели Мицкоски.
Претседателот Мицкоски упати порака до неопределените и до огромното тивко мнозинство на Македонија.
„Тоа се оние луѓе на чии плеќи се носи и гради Македонија, но никогаш не биле во фокусот на оваа држава, а системот ги потргнувал на страна. Тоа се луѓето со извонредни капацитети, кои никогаш вистински не добиле шанса. Тоа се нашите чесни и лојални сограѓани. Земјоделецот на нивата, продавачот во маркетите, наставниците, учителите, работниците, невработените, пензионерите, но и младите кои се како што кажав можеби и незаинтересирани од политиката затоа што чувствуваат горчина поради сите неправди и сите порази. Сите вие кренете ја главата горе високо. Доаѓаат подобри времиња, а овие избори се вашата шанса да ги промените работите. Излезете и гласајте и поддржете ја опцијата која ви велам дека ќе ја направиме Македонија повторно твоја, Македонија повторно горда“, дециден е Мицкоски.
Македонија
Пендаровски до ВМРО-ДПМНЕ и Давкова: Немој да си играте со судбината на Македонија
Кандидатот за претседател Стево Пендаровски вечерва во Битола го одржа завршниот митинг од кампањата за првиот круг на изборите, од каде испрати порака до ВМРО-ДПМНЕ и нивната кандидатка за претседател.
„Денеска ја чув и најновата иновација на главната противкандидатка од ВМРО-ДПМНЕ која спомнува дека времето на овој Устав поминало, дека имаме потреба од нов Устав и вели дека особено во делот на односите меѓу етничките заедници дека тоа биле транзициони решенија и дека треба да ги менуваме. Не можам да верувам дека универзитетски професор, 23 години по Рамковниот договор, го оспорува договорот кој прво ни донесе мир а потоа ги постави основите на една мултиетничка држава и општество, договор заради кој не примија во НАТО и заради кој преговараме за влез во ЕУ со перспектива за неколку години да станеме членка. Мојата порака до нив е Немојте да си играте со судбината на Македонија. Тие договори се во основата на безбедноста на државата“ рече Пендаровски.
Пендаровски повика на масовна излезност и поддршка на 24 април, затоа што тогаш ќе се решава кој ќе победи во вториот круг, додавајќи дека ВМРО-ДПМНЕ лажно се претставуваат како најголеми македонски патриоти.
Македонија
Ковачки до СДСМ: Вредеше ли предавството? Се откажавте од име, Устав, историја
Ги слушам од СДС велат дека било храброст да донесеш тешки одлуки…. да смениш име, да смениш устав, да прифатиш бугарски диктат. Јас на ова ќе ги прашам директно…. вредеше ли ова предавство? Знаете ли колкав товар и срам им оставате на вашите семејства. Со наведнати глави ќе се шетатате и вие и тие. Вредеше ли да се откажете од името, од Уставот, од историјата?
Ова го истакна носителот на пратеничката листа на ВМРО-ДПМНЕ во ИЕ 3, Драган Ковачки на вечерашниот митинг во Штип.
Тој додаде дека не можат да зборуваат за храброст луѓето кои го крадат народот и некогаш не биле на негова страна.
„Не е храброст да прифатиш се што бараат другите. Не ми зборувајте мене за храброст. Над 25 години поминав во Армијата. Ги поминав, со моите соборци, македонски ќерки и синови и 2001-вата, и немири и акции и војни. Браневме вредности, браневме стратешки интереси и во мисии и во Ирак и во Авганистан,….гордо ја носев униформата затоа што верувавме во Македонија. Јас и моите соборци со длабока почит се поклонуваме на македонското знаме. Со особено чувство на гордост и посебна почит ја пееме македонската химна. Овие работи за секој Македонец имаат посебно место во неговото срце. И не ми зборувајте мене за храброст вие кои седите во скутот на Али Ахмети и со другата рака ја крадете Македонија. Не зборувајте за храброст кога ниту еднаш не бевте со народот, и сте причина за сите негови страдања и порази“, потенцираше Ковачки.
Затоа, додаде Ковачки, овие избори се и за тоа да ја вратиме Македонија. Македонија која има надеж и иднина. Македонија на луѓе со гордо кренати глави и сила која создава промени.
„Јас Драган Ковачки стојам овде пред вас и ви велам овие избори се последната шанса да си ја спасиме државата. Затоа е важно да излезете и гласате. А првиот чекор е веќе во среда. Во среда не се само претседателски избори, туку првиот голем удар за детронизирање на оваа власт. Затоа ве повикувам сите луѓе од Штип, од славниот исток, да излеземе и масовно заеднички да испишеме историја за денот кога народот ја вратил Македонија во своите раце“, нагласи Ковачки.
Ковачки додаде дека ВМРО-ДПМНЕ има план за работа и конкретна понуда содржана во програмата Платформа 1198 каде луѓето се на прво место.
„Иако изборот кој ќе го направите е многу важен момент, сепак самиот избор никогаш не бил полесен. Разликата меѓу нас и власта е огромна. За сметководителката на мафијата, заедно со луѓето од СДС кои се понуда во третата изборна единица овие избори им се уште еден мегдан за лажење и манипулирање. Време е да им се стави крај. Време е да се соочат со одговорност. И време е Македонија да биде повторно твоја, на луѓето на Македонија, на чесниот и трудољубив народ“ подвлече Ковачки и додаде:
„Победата ќе биде тирумф на народот кој си ја враќа државата. Бидете горди на тоа што заедно ќе го направиме. Затоа што имате голема причина за тоа. За вас, вашите семејства, За Македонија“.