Македонија
Министерот Тодоров се појави на протестот на професорите
Министерот за образование и наука, Никола Тодоров дојде на протестот на универзитетските професори, кои протестираа против неговиот предлог за измени на законот за високо образование
Појавувањето на министерот предизвика големо изненадување кај професорите, кои не очекуваа дека тој набрзо ќе се соочи со нив, за лично да разговара за предложените измени. Повеќе од стотина професори, со транспаренти „Автономија на универзитетот-без компромис“, заедно ја пееја универзитетската химна „Вива академија“.„Протестот го организираме со цел да укажеме на континуираниот атак кој се прави врз автономијата на универзитетот „Св. Кирил и Методиј“ и другите универзитети. Она што е особено важно е што Ректорот не ја почитува одлуката на Сенатот. Ректорот е должен да ја почитува одлуката на Универзитетскиот Сенат, за текстот на законот да се повлече и да се пристапи кон изготвување на нов закон за високо образование. Тоа е единствената цел и единствениот заклучок кој произлезе од Универзитетскиот Сенат“, рече универзитетскиот професор Гордана Бузаровска. Таа додаде дека е многу невкусно што Ректорот отстапува од она што значи „првична поддршка на универзитетските професори поради некои пазарења со надлежниот министер во однос на Претседател на Сенат“.Министерот Тодоров на протестот рече дека дошол лично да ги слушне забелешките на професорите и да докаже дека нема намера да се крие или да избегнува дебата во периодот во кој се уште се разговара за законот.„Слушнав многу критики, многу добронамерни сугестии, голем дел од тие сугестии ги прифатив и ги вградив во законот, еден дел од тие сугестии се реални и за тие сакам да разговараме. Има и критики кои велат дека е нарушена автономијата, а јас не можам и не знам со кој дел од законот тоа се прави“, рече Тодоров и додаде дека од професорите според него се бара редовно да ја одржуваат својата настава.„Знам дека дел од нив го прават тоа, но има и еден мал процент кој тоа не го прават и не сакам да дозволиме да нема ни минимален процент кои не им дозволуваат на студентите да имаат таква привилегија да ги слушнат нивните предавања и од прва рака да ја научат областа за која се едуцираат. Барам поголема отчетност од универзитетите, да имаме униформен извештај во кој посебно ќе видиме кој е начинот на кој се трошат средствата од партиципацијата на студентите и дали е тоа во правец на подобрување на наставата, дали се враќаат тие средства или не. Во законот има и одредби кои ќе оневозможат непотистички вработувања, кои ќе оневозможат роднините на професорите да се вработуваат на универзитетите. Затоа сакав да чујам кои одредби точно им пречат на професорите“, рече тој.Само еден час претходно, околу 50-тина студенти, организирани од Студентскиот парламент при УКИМ, протестираа на истото плато на скопскиот универзитет за да изразат поддршка за предлог-законот за измени на Законот за високо образование, предложен од министерот Тодоров.Професорката Гордана Силјановска од Правниот факултет, денеска беше единствена од професорите, која јавно кажа дека треба да се видат добрите и лошите страни на предлогот.„Не може професорите да ја завршат кариерата со еден или ниту еден објавен труд, со некомпетитивност, значи ние мораме да се соочиме и со самите себе. Доаѓањето на министерот овде е извонреден потег, не знаев дека министерот е професионалец во боречки вештини, но еве можеби тоа е дел од борењето, јас ова го сметам за одличен потег и еве ако сакате рака за дијалог“, рече Силјановска.Таа рече дека решила наместо да се вклучи во јавните препукувања на релација професори – министер, до Тодоров доставила свој коментар во кој детално ги анализира предложените измени и ги образложува своите критики и сугестии за нив. Тој веќе и соопштил дека во таа насока има неколку интервенции во работната верзија на текстот.„Сега е време ние да седнеме, да ги испратиме нашите конкретни забелешки, наместо оценки и квалификации, и министерот исто така да влезе во дијалогот и да се најдеме заедно – студентите и професорите. Не ми е познато професорите да штрајкуваат на едно место, а студенти на друго место, затоа и стоев малку настрана, но со студентите, ми беше срам да заминам од нив“, рече Силјановска за Макфакс.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Понудата на Мицкоски за коалицирање е знак на слабост, рече Пендаровски
Кандидатот за претседател Стево Пендаровски вечерва од Бутел рече дека е легитимно и дека е демократски избор секој да коалицира со кого сака. Но, понудата на претседателот на ВМРО-ДПМНЕ, Христијан Мицкоски за коалицирање со неговата партија, уште на првиот ден од кампањата за парламентарни избори, покажува дека тој бара помош.
„Ние среде кампања не бараме помош од пријател. Мене ми се чини дека тоа е јасен знак на слабост, затоа што господинот Мицкоски знае што го очекува на 24 април и на 8 мај. Инаку зошто би барал помош од страна?“, рече Пендаровски.
Македонија
Митрески од Струга: Младите не смеат да бидат жртви на политичари без став и без визија
„Во Струга ги реновиравме буквално сите училишта и спортски сали и изградивме три нови сали. Го реконструиравме затворениот пливачки базен, тројно ја покачивме минималната плата. Ги дуплиравме странските инвестиции. Ги зголемивме пензиите за над 50%, ги покачивме платите во сите сектори. Но, тоа не е доволно. Поминавме и поминуваме сериозни економски последици од Ковид кризата, но и од војната во Украина. Затоа ни е потребна ЕУ. За побрзо да ги донесеме европските стандарди дома“, порача Јован Митрески, носител на ИЕ 5 на СДСМ и Коалицијата за европска Македонија на вечерашниот собир во Струга.
Тој нагласи дека платите и пензиите ќе растат побрзо, инфраструктурно побрзо ќе се развиваме, туристичка сезона ќе има преку целата година, полесно ќе се развива езерскиот, планинскиот и руралниот туризам, само со поддршка на ЕУ.
Митрески додаде дека е лесно со шпекулаци да будиш најдлабоки чувства кај секој Македонец за мајчиниот македонски јазик, да зборуваш за македонскиот јазик како бугарски дијалект, а притоа да не гласаш за Договорот со ФРОНТЕКС, прв договор потпишан на македонски јазик со сите земји членки на ЕУ вклучувајќи ја и Бугарија.
„Лесно е само декларативно да велиш дека си за ЕУ, а да правиш се за да не станеш дел од ЕУ. Лесно е, ама не е чесно на граѓаните да им ја крадеш иднината за мали, ситни, бедни политички поени и борба за власт. Не вреди борбата за власт ако се загрози иднината на државата. Државата мора да оди напред. Не смееме да дозволиме младите да бидат жртва на политичари без став, без визија кои освен за својата фотелја и желба за власт не мислат на ништо друго“, нагласи Митрески и додаде дека изборот е или интеграција или изолација.
Тој ги повика стружани да се обединат и да не дозволат да се вратат оние кои ја доведоа Македонија до бездна и од неа направија заробена држава.
„Да застанеме сите обединето и сложно зад планот за европска Македонија. Да застанаме сите обединето и сложно зад бројот 1.Заедно и сложно да постигнеме уште една победа за европска Македонија“.
Македонија
Костадиновска-Стојчевска од Струга: СДСМ за 52% ги покачи платите во културата
„Останувањето на европскиот пат, значи дека и сегашните генерации ќе ги почувствуваат придобивките. Континуирано ги зголемуваме минималната и просечната плата, Владата предводена од СДСМ беше посветена на тоа без оглед на ефектот од ковид кризата и економската криза, и ќе продолжиме со уште позасилено темпо со секој чекор на приближување до ЕУ“, порача потпретседателката на Социјалдемократскиот сојуз на Македонија и коносителка на листата во изборна единица 5, Бисера Костадиновска Стојчевска на трибината во Струга.
Таа додаде дека ќе се зголемат и можностите за подобра грижа за нашите пензонери, за нашите мајки и татковци, баби и дедовци, тие кои го вложиле својот труд и ја граделе нашата земја.
„Во досегашниот мандат за 30%ја зголемивме просечната пензија, а за 50% минималната. И се обврзуваме до 2028 година просечната пензија да достигне 30 илјади денари. Затоа ни помладите, ни повозрасните не смеат да потпаднат под манипулациите, под илузиите дека има вакви или такви алтернативи на членството во ЕУ“, кажа Костадиновска Стојчевска.
Таа пред стружани укажа дека во овие клучни моменти „пред нас повторно стои важната задача да останеме на европскиот колосек и да не дозволиме да се врати изолацијата, неизвесноста, пропуштените шанси за развој и мирен соживот”.
Потпретседателката на СДСМ потенцираше дека сега е најважно ,,да не се погреши кај главното, да не се изгуби едиствениот пат кој гарантира подобар стандард за секој граѓанин, посредено општество, подобри услови за младите да останат дома и тука да се развиваат и себеси и својата татковината”.
„Дури и на тие што свесно го отежнуваат напредокот кон ЕУ, јасно им е дека само членството во Унијата е начинот на кој нашите луѓе вистински ќе почувствуваат придобивки кон подобро во секој поглед, и економски, и во образованието, и во туризмот и во функционирањето на институциите на системот“, додаде таа.
Костадиновска-Стојчевска потенцираше дека граѓаните се доволно свесни за ризиците кои ги носат политичари што не покажаа чувство за државата ниту во најкризните моменти во изминатиот период.
„Точно е, има алтернативи, но секоја од нив значи неизвесност, уназадување на демократијата, нула шанси за развој. И затоа, сигурна сум дека граѓаните ќе покажат висока свест на овие избори и ќе знаат да препознаат што е конкретна понуда, кој настапува со јасни и зацртани цели за подобар живот за сите граѓани, а кој сее ветер и магла и сака да ги превесла граѓаните со лажни приказни“, рече потпретседателката на СДСМ и коносителка во изборна единица 5, Костадиновска-Стојчевска.
Таа изрази сигурност дека граѓаните ќе го направат вистинскиот избор на парламентарните избори и дека ќе се гордеат со нашиот претседател Стево Пендаровски, на кого повторно ќе му ја дадат довербата, затоа како што кажа Костадиновска-Стојчевска „Стево е пример за претседател од народот и за народот, човек со свој глас и став, политичар кој мисли на сите граѓани и подеднакво ги почитува без оглед на политичките и други разлики, човек со државничка свест, кој ги дели европските вредности на СДСМ и ќе ѝ пружи значителна поддршка на новата влада на патот кон Европската Унија“.
„Нашиот Стево нема вистинска конкуренција на овие овие избори и затоа нашиот Стево Пендаровски треба да биде претседател“, нагласи потпретседателката на СДСМ Костадиновска-Стојчевска на денешната трибина во Струга.