Македонија
Речиси 40 Македонци побарале помош за евакуација од Либија
Речиси 40 македонски државјани досега побарале помош за евакуација од Либија, информираат од Министерството за надворешни работи
Вкупно девет Македонци побарале да бидат евакуирани од Триполи со хрватски авион кој веќе се наоѓа на аеродромот во либискиот главен град. Од хрватска страна е потврдено дека и македонските граѓани ќе бидат евакуирани штом се создадат услови за полетување на авионот.Истовремено 25-30 градежни работници од кумановско побарале да бидат евакуирани од Бенгази. Нивното извлекување од земјата ќе биде направено со турски брод, поради тоа што аеродромот во овој либиски град е затворен.Во меѓувреме, МНР формираше координативно тело за евакуација на македонските граѓани од Либија, кое стои на располагање 24 часа за сите засегнати граѓани. Директорот за конзуларни работи, Звонимир Поповиќ денеска одржа средба со конзулите на Србија, Турција, Хрватска, Италија и БиХ, на која била побарана помош при евакуирањето на нашите државјани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ и коалицијата на избори под слоганот „Македонија повторно твоја!“
Македонија повторно твоја! – промените во твои раце е слоганот и потписот на парламентарната кампања на ВМРО-ДПМНЕ и Коалицијата „Твоја Македонија“.
Од партијата велат дека слоганот со кој ќе настапи ВМРО-ДПМНЕ е резултат на претходни обемни анализи со кој се потврдува дека главното чувство е чувството на беспомошност кај граѓаните по девастирачкото владеење на СДСМ и ДУИ.
„Токму чувството дека народот ја губи државата од своите раце и дека нема ниту еден систем во државата кој функционира е чувството кое е доминантно во сите истражувања и анализи. Тоа се гледа по бројните примери како што е модуларното болница, немањето на пасоши и лични документи за граѓаните, недостатоците дури и на учебници во образованието, криминалот насекаде и сеприсутноста на корупцијата, како и неказнивоста на сторителите се бремиња што го оптеретуваат македонското општество“, велат од ВМРО-ДПМНЕ.
Кампањата ќе биде промовирана на конвенцијата заедно со кандидатите за пратеници и носители на ВМРО-ДПМНЕ и Коалицијата.
Македонија
Летното сметање на времето почнува од 2 часот по полноќ
Од 2 часот по полоќ, почнува летното сметање на времето, со поместување на стрелките на часовникот еден час понапред.
Летното сметање на времето завршува на 27 октомври во 3 часот, кога часовникот се поместува еден час наназад.
Одлуката за воведување на летното сметање на времето е согласно Законот за сметање на времето („Службен весник на Република Македонија“ бр.17/96 и 16/97) и согласно европски директиви.
Македонија
Сончево и топло време, температури до 26 степени
Претежно сончево и топло со слаб јужен, а вдолж Повардарието умерен ветер од југоисточен правец. Минималната температура ќе биде во интервал од 3 до 9, а максималната ќе достигне од 21 до 27 степени.
Во Скопје сончево и топло со слаб ветер од јужен правец. Минималната температура ќе се спушти до 7, а максималната ќе достигне до 26 степени.
Продолжува периодот на сончево и топло време со мала до умерена облачност. Од вторник ќе има извесно зголемување на облачноста со благо опаѓање на дневната температура.