Македонија
Достоинство: Овој пат ќе ја браниме Македонија политички
Остварување на правата на бранителите од 2001 година, и нивните семејства, подобар живот за обичниот граѓанин, нови работни места, влез на земјава во Европската унија и НАТО без никакви условувања и неменување на уставното име на Македонија.
Остварување на правата на бранителите од 2001 година, и нивните семејства, подобар живот за обичниот граѓанин, нови работни места, влез на земјава во Европската унија и НАТО без никакви условувања и неменување на уставното име на Македонија.Ова се дел од приоритетите на новата партија на бранителите „Достоинство“ чие основачко собрание се одржа вечерва. На основачкото собрание, на кое претседателот на партијата Стојанче Ангелов беше поздравен со громогласен аплауз присутни беа и бизнисменот Ристо Гуштеров, поранешниот министер за внатрешни работи, Павле Трајанов и пензионираниот полковник на АРМ, Благоја Марковски, како и Тодор Петров од Светски македонски конгрес.„Доста е од лицемерните загрижени политичари, да прекине бесконечната транзиција, криминалната антиквизација, криминална приватизација, економскиот криминал, криминал во културата, организиран криминал, градежна мафија. На сето ова заеднички именител се ВМРО-ДПМНЕ и СДСМ, но и оние кои ним ги нарекуваат змија или магаре“ рече Ангелов.Тој во својот политички говор ги објасни причините поради кое здружението премина во партија.„Добив политички амбиции кои што непријателите на Република Македонија од 2001 година денес ги практикуваат и владеат со институциите на државата. Нашата намера да формираме политичка партија е резултат на кампањата на некои структури во државата против Достоинство кои сакаа да не уништат“ рече во својот говор, претседателот на партијата, Ангелов.Тој најави дека бранителите сега ќе ја бранат Македонија со политички средства, не како во 2001 година со воени. „Во 2001 година, ние припадниците на безбедносните сили, ја браневме Македонија, ја браневме и одбранивме од намерата на екстремните албански вооружени екстремисти кои се обидоа да отцепат дел од нашата територија. Ние победивме секаде каде што имавме намера да војуваме, капитулираа политичарите, токму затоа нашиот војнички успех во сега сме подготвиме да го претвориме во политичка победа за да ставиме крај на бедата, сиромаштијата безизлезноста во која не доведоа таканаречените професионални политичари“ рече Ангелов.Мотив за формирање на партијата е да влезат во Парламентот како политичка партија и да го спроведат законот за бранителите кој не им помина во собранието.Нивна целна група, како што најави Ангелов нема да биде десницата туку, сите патриоти и од левицата и од десницата. Најави борба против криминалот, професионална полиција и армија, решавање на проблемот на професионалните војници, слободни медиуми, непартизирано судство, како и слобода на сексуално изразување. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нема докази дека уапсените за убиството на докторот се сторителите
Нема докази дека лицата кои беа приведени за убиството на докторот во Железара се сторителите.
Од Обвинителството велат дека продолжуваат со дејствија, со цел идентификација на сторителите.
-До овој момент, со преземените дејствија од МВР и извршените вештачења од Институтот за судска медицина не се обезбедени докази кои даваат основано сомнение дека лицата лишени од слобода се сторители на кривичното дело. Од тие причини, јавниот обвинител, по истекот на времетраењето на определената мерка краткотраен куќен притвор, нема да предлага судот да определи нови мерки за претпазливост за трите лица кои беа задржани во врска со овој настан, велат од ОЈО.
Министерството за внатрешни работи, во координација со Основното јавно обвинителство Скопје, продолжува да презема дејствија за идентификација на сторителите на кривично дело.
Македонија
Постигната либерализација во товарниот транспорт за и од трети земји со Црна Гора
Министерството за транспорт и врски на Северна Македонија и Министерството за собраќај и поморство на Црна Гора потпишаа Протокол за либерализација на товарниот транспорт за и од трети земји.
Согласно Протоколот, либерализацијата ќе стапи на сила од 1 мај 2024 година и ќе има важност една година, период во кој ќе се прави анализа на состојбата во меѓународниот патен превоз, се со цел да се постигне конечно ослободување од системот на дозволи и во наредниот период.
Ова беше постигнато на состанокот на македонско-црногорската мешовита комисија за меѓународен патен превоз на патници и стока кој се одржа во Скопје.
До сега, двете земји врз база на реципроцитет разменуваа вкупно 300 дозволи за и од трети земји кои беа од огромно значење за товарниот транспорт.
Либерализацијата е чекор напред кон отстранување на сите админстративни постапки во однос на дозволите, процес што ќе придонесе за побрз и ефикасен транспорт како и зголемување на економската соработка меѓу Северна Македонија и Црна Гора.
Со Протоколот исто така двете страни се обврзаа да пристапат кон меѓусебно признавање на Сертификатите за професионална компетентност на возачите за учество во меѓународниот патен сообраќај. На состанокот се усогласија и процедурите во делот на превозот на патници меѓу двете земји.
Ова е прва средба на македонско-црногорската мешовита комисија за меѓународен патен превоз на патници и стока после тринаесет години, на која се донесоа низа мерки со кои значително се подобрува соработка меѓу Северна Македонија и Црна Гора во делот на патниот и товарниот транспорт.
Македонија
Воздухопловните сили на Италија од денеска ќе патролираат над македонското небо
Министерката за одбрана Славјанка Петровска и италијанскиот министер за одбрана Гвидо Крозето во Центарот за обука на пилоти во касарната „Страшо Пинџур“ во Петровец го потпишаа Техничкиот договор со кој Италијанските вооружени сили и официјално се вклучија во НАТО мисијата за воздухопловно патролирање над македонското небо.
Министерката Петровска по потпишувањето истакна дека со вклучувањето на Италија во оваа НАТО мисија, единството во Алијансата го гледаме на дело.
„Често споменуваме дека Алијансата е приказ на сојузништво и единство, но зборовите не можат да го отсликаат тоа што можеме да го видиме на дело – италијански и грчки воени воздухоплови, во координација со македонското воено воздухопловство гарантирајќи ја безбедноста на небото на Северна Македонија“, рече министерката.
Со Италија изградивме вистинско сојузништво и развивме силна соработка, рече Петровска, и додаде дека фактот дека италијански воздухоплови ќе ја гарантираат безбедноста на нашиот воздушен простор е приказ за целосна меѓусебна доверба.
Италијанскиот министер Крозето порача дека со денешното потпишување на овој историски договор, Италија заедно со Грција ја презема обврската за заштита на небото на Северна Македонија и дополни дека сојузништвото во Алијансата значи своите сили да се стават на располагање на други земји кога има потреба за такво нешто.
„Италија има чест што може да даде свој придонес во оваа насока и ѝ благодари на Северна Македонија за довербата“, рече Крозето.
Небото на Северна Македонија со официјалниот почеток на НАТО „air policing“ мисијата во нашата земја во декември 2021 година, и официјално стана дел од колективниот систем на Алијансата за воздушно патролирање. Досега, воздухопловното патролирање беше доверено на грчкото воено воздухопловство, а отсега тоа ќе се врши со воздухоплови на грчките и на италијанските воздухопловни сили, во координација со военото воздухопловство на Армијата на Република Северна Македонија.
Мисијата за воздухопловно патролирање на нашето небо ја раководи Сојузничката воздухопловна команда на НАТО, а тактичката контрола на мисијата е под раководство на Центарот за комбинирани воздухопловни операции во Торехон, Шпанија.