Македонија
Жолчна собраниска расправа за новите членови на Советот за радиодифузија
Почна собраниската расправа за избор на шест нови членови на Советот за радиодифузија.
Почна собраниската расправа за избор на шест нови членови на Советот за радиодифузија.
Пратениците влегоа во жолчна дискусија уште во расправата за првиот кандидат Зоран Трајчевски, предложен од страна на претседателот Ѓорге Иванов. За опозицијата, денешната расправа е резултат на, како што рекоа, политичкиот пазар меѓу Никола Груевски и Али Ахмети при составувањето на новата влада и дека со предложувањето на шестте кандидати, се врши партизација и контрола на ова регулаторно тело.
„За жал, господинот Зоран Трајчевски е предлог за член на Советот за радиодифузија, како последица на политичкиот пазар на Груевски и Ахмети. Пазар каде што Ахмети се бореше за амнестија на оние што сториле злосторство против човештвото, а Груевски се залагаше за агресија врз медиумите. Денес Трајчевски треба да се избере за гласачка машина за желбите на Груевски да се пресмета со медиумите кои мислат со своја глава“, рече Јани Макрадули од СДСМ.
„Речиси целиот негов работен век е посветен на оваа област, а исто така, и она што е негово формално образование е дел од оваа област, така што е апсолутно квалификуван човек за оваа работа“, рече Александар Николовски од ВМРО-ДПМНЕ.
За власта, пак, изборот на новите членови на СРД ќе значи зајакнување на улогата на ова тело, а не негова партизација.
„Не е причината за измените во Законот за радиодифузија тоа. Напротив, тоа што во секој извештај на Европската Комисија во последните неколку години СРД е посочуван како најслаб елемент во функционирањето на таа проблематика. Нема извештај на Европската Комисија каде што не е потенциран слабиот капацитет на Советот за радиодифузија“, вели Илија Димовски од ВМРО-ДПМНЕ.
„Не правиме муабет за остручување на советот, туку за партизирање. Што мислите, зошто станал тој претседавач на советот на Општина Аеродром како кандидат на ВМРО-ДПМНЕ? Заради тоа што има завршено енергетска ефикасност? Не, туку оти бил член на ВМРО-ДПМНЕ. За тоа зборуваме“, одговори Макрадули.
Претходно, собранието не го прифати барањето на опозицијата за повлекување на точката од дневен ред. Тие во предложувањето на кандидатите препознаа и процедурални недостатоци.
“Кандидатите на ЗЕЛС, не само што не се избрани во коректна процедура внатре во рамките на самата асоцијација, туку и нивните имиња не се објавени во два дневни весника што преставува законска обврска и согласно одлуката, господине претседателе, вие сте ја потпишале. Тоа ЗЕЛС го нема направено и го доведува во прашање, не само легалитетот и легитимитетот на нивните кандидати, туку генерално на сите останати кандидати, бидејќи ние расправаме по една точка, за секој кандидат поединечно и гласаме за секој кандидат поединечно“, рече Игор Ивановски од СДСМ.
„Ова се предлози на Претседателот на Република Македонија. Кога ќе дојдат на ред предлозите на ЗЕЛС, тогаш ќе расправаме. Ве молам да бидеме коректни и да не ги мешаме лончињата“, одговори собранискиот претседател Трајко Вељаноски.
За нови членови на СРД, покрај Трајчевски, е предложен и Селвер Ајдини како кандидат на Претседателот на државата. Директорот на државниот испитен центар, Методија Јанчески е предложен од страна на Државната Комисија за спречување на корупција, Методи Стоименовски од ЕЛЕМ доаѓа како предлог на Комисијата за заштита на конкуренцијата, додека ЗЕЛС за нови членови на СРД ги предлага Лазо Петрушески од Електротехничкиот факултет и новинарот Замир Мехмети. /крај/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Владата на ВМРО-ДПМНЕ со обновливи извори на енергија ќе обезбеди поголемо и поквалитетно снабдување со електрична енергија
Претседателот на ВМРО-ДПМНЕ, Христијан Мицкоски од Гевгелија одговарајќи на новинарски прашања истакна дека идната влада предводена од ВМРО-ДПМНЕ ќе вложува во обновливи извори на енергија како што е ветерниот парк Богданци, со цел поголемо и поквалитетно производство на електрична енергија.
Во овој регион недалеку се гледа ветерниот пак Богданци кој го реализираше владата на ВМРО-ДПМНЕ, продолжуваме и понатаму исто во околината, втората фаза, но и други можности се испитуваат за одреден вид на јавно приватно партнерство помеѓу денешно ЕСМ и приватни инвеститори за изградба на вакви енергетски капацитети, со што ќе се зголеми производното портфолио од обновлива енергија во Македонија, рече Мицкоски.
Мицкоски додаде дека на тој начин ќе се обезбеди поквалитетно снабдување со електрична енергија до нашите граѓани, а воедно порача дека ќе се укине таксата за пристап до мрежа која ја наметна оваа власт.
– Она кое е важно, онаа наметната такса за пристап до мрежата која ја наметна октроираниот претседател на Регулаторната комисија за енергетика, целосно партизираниот Бислимовски, ќе биде укината. Цениме дека нема потреба од таков тип на оптоварување на граѓаните, изјави Мицкоски.
Македонија
Собранието ги изгласа измените на Законот за извршување на санкциите
Собранието со 78 гласа „за“ го донесе предлог-законот за измени и дополнување на Законот за извршување на санкциите.
Законот има цел решавање на безбедносните проблеми во казнено-поправните установи, создавање посигурна безбедносна средина како во затворите така и генералната и општата безбедност во државата, пред сè, преку воспоставување законска основа и формирање единици за затворско разузнавање и единици за интервенции, воспоставување систем за видеонадзор и користење боди-камери во установите, намалување на корупцијата во казнено-поправните установи, решавање на проблемот со пренатрупаноста и регулирање и унапредување на правата од работниот однос на сите категории вработени лица во КПУ и ВПУ, извести Министерството за правда.
Покрај зголемување на безбедноста на установите, унапредување на правата на осудените лица и децата, со овој предлог-закон се оди кон подобрување на статусот и на вработените во пенитенцијарниот систем. Постојат повеќе причини за донесување на предлог-законот за измени и дополнувања на Законот за извршување на санкциите, како, на пример, менување во голем дел на кривичното законодавство во земјата, со тоа и предлог-законот за измени и дополнувања на Законот за извршување на санкциите како важна алка во кривичното законодавство и кривичноправниот систем во целина, потоа менување на затвореничката структура во Македонија, а во голем дел појавата на сè поголем број радикализирани осудени лица, потребата од заострување на начинот на кој осудените лица по доставување на упатните акти имаа можност за менување на адресата на живеење и со тоа таканаречено избирање на казнено-поправна установа во која би ја издржувале казната и условите во неа, се додава во соопштението на Министерството за правда.
Македонија
(Видео) Стоилковски: Доколку Арсовска не е против нови градинки, училишта, да состави документи, а Советот ќе ги прифати онака како што таа ќе ги достави
Данела Арсовска запре градба на две основни училишта, запре градба на две градинки и сопре градба на едно затворено спортско игралиште, потребно за граѓаните на општините Гази Баба, Кисела вода и Аеродром.
Арсовска запре донесени одлуки на Советот на Град Скопје за ослободување од надоместоци за уредување градежно земјиште за овие проекти, со образложение дека биле, како самата вели, неписмени, истакна на прес-конференција Наум Столковски, портпарол на ВМРО-ДПМНЕ.
„Ја повикуваме Данела Арсовска таа сама да состави вакви документи, а Советот, без сомнеж во високото ниво на писменост на Данела Арсовска, само ќе ги усвои.
Доколку Арсовска не е против нови градинки, училишта и затворени спортски објекти и ако не е против скопјани и Скопје, се очекува од неа најбргу таа самата да донесе писмени барања за овие пет проекти за скопјани, а Советот ќе ги прифати онака како што таа ќе ги достави, без сомнеж во високото ниво на писменост на Данела Арсовска“, дециден е Стоилковски.
Во спротивно, како што рече, Данела Арсовска само ќе докаже дека е продолжена рака на Миле Зечевиќ и на СДС наспроти вистинските потреби на скопјани за две градинки, две училишта и за спортски објекти.