Македонија
Со алтернативни мерки за казнување ќе се намалува бројот на затворениците
Затворските власти ќе го намалуваат бројот на затворениците со воспоставување на посебна, пробациска служба која ќе биде надлежна за извршување на алтернативните мерки на казнување.
Затворските власти ќе го намалуваат бројот на затворениците со воспоставување на посебна, пробациска служба која ќе биде надлежна за извршување на алтернативните мерки на казнување. Притворот и затворот ќе бидат крајни мерки за сторители на тешки кривични дела.
Министерот за правда Блерим Беџети, директорот на Управата за извршување на санкции при Министерството за правда, Лидија Гавриловска и британскиот амбасадор Кристофер Ивон потпишаа меморандум за соработка со цел имплементација на проектот „Поддршка на пробацијата во македонскиот казнено-правен систем“.
„Општеството треба да предвиди поголем број на санкции и мерки кои се извршуваат во заедницата, а судиите и обвинителите да ги применуваат што повеќе. Тие треба да бидат инволвирани во донесување на Закон со кој ќе се овозможи поширока примена на алтернативните мерки и на тој начин ќе придонесат во реформите на казнено – правниот систем односно со преполнетоста во затворите“ вели директорот на Управата за извршување на санкции при Министерството за правда, Лидија Гавриловска.
„Функционирањето на овие служби во сите земји каде што ги има, покажуваат исклучително добри резултати за намалувањето на затворската популација, подобрување на ресоцијализација на осудените лица. Во Македонија по воведувањето на пробациска служба се очекува дека само во првата година затворската популација да се намали од 10 до 20 отсто“ рече министерот за правда Блерим Беџети.
Овој проект ќе се реализира во наредните 18 месеци, со тоа што ќе се изработи стратегија за воведување на пробициски систем, акциски план со рокови за реализација и научно истражување кое ќе ја согледа сегашната состојба.
„Пренатрупаноста во затворите во Македонија е голем проблем. Јас го посетив Идризово минатата недела за да видам како е и да поразговарам со вработените и затворениците. Многу земји се соочуваат со овој притисок, затоа Велика Британија излегува во пресрет да се реши овој проблем. Од друга страна, намалувањето на пренатрупаност во затворите ги олеснува условите на затворениците, се намалува товарот на вработените во затворените и финансиските трошоци. Алтернативниот систем на мерки е добар за општеството. Искуството со општокорисна работа во Велика Британија, а и во други земји покажа дека помага во реинтеграција и ресоцијализација на осудениците. Таквиот ангажман ги намалува шансите за повторување на кривично дело, меѓутоа, во исто време е во корист и на заедницата“ вели Кристофер Ивон.
Според податоците кои ги изнесе Гавриловска, Македонија во однос на преполнетоста во затворите во споредба со другите земји е во поповолна состојба.
„Со 102 осудени лица на 100.000 жители, Македонија е во многу поповолна состојба од многу европски држави, особено од балканските,ако занеме дека во Србија има 142 затвореници на 100.000 жители, Грција над 150, Бугарија 115, а Хрватска 140 затвореници на 100.000 жители“ вели Гавриловска. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Собранието ги изгласа измените на Законот за извршување на санкциите
Собранието со 78 гласа „за“ го донесе предлог-законот за измени и дополнување на Законот за извршување на санкциите.
Законот има цел решавање на безбедносните проблеми во казнено-поправните установи, создавање посигурна безбедносна средина како во затворите така и генералната и општата безбедност во државата, пред сè, преку воспоставување законска основа и формирање единици за затворско разузнавање и единици за интервенции, воспоставување систем за видеонадзор и користење боди-камери во установите, намалување на корупцијата во казнено-поправните установи, решавање на проблемот со пренатрупаноста и регулирање и унапредување на правата од работниот однос на сите категории вработени лица во КПУ и ВПУ, извести Министерството за правда.
Покрај зголемување на безбедноста на установите, унапредување на правата на осудените лица и децата, со овој предлог-закон се оди кон подобрување на статусот и на вработените во пенитенцијарниот систем. Постојат повеќе причини за донесување на предлог-законот за измени и дополнувања на Законот за извршување на санкциите, како, на пример, менување во голем дел на кривичното законодавство во земјата, со тоа и предлог-законот за измени и дополнувања на Законот за извршување на санкциите како важна алка во кривичното законодавство и кривичноправниот систем во целина, потоа менување на затвореничката структура во Македонија, а во голем дел појавата на сè поголем број радикализирани осудени лица, потребата од заострување на начинот на кој осудените лица по доставување на упатните акти имаа можност за менување на адресата на живеење и со тоа таканаречено избирање на казнено-поправна установа во која би ја издржувале казната и условите во неа, се додава во соопштението на Министерството за правда.
Македонија
(Видео) Стоилковски: Доколку Арсовска не е против нови градинки, училишта, да состави документи, а Советот ќе ги прифати онака како што таа ќе ги достави
Данела Арсовска запре градба на две основни училишта, запре градба на две градинки и сопре градба на едно затворено спортско игралиште, потребно за граѓаните на општините Гази Баба, Кисела вода и Аеродром.
Арсовска запре донесени одлуки на Советот на Град Скопје за ослободување од надоместоци за уредување градежно земјиште за овие проекти, со образложение дека биле, како самата вели, неписмени, истакна на прес-конференција Наум Столковски, портпарол на ВМРО-ДПМНЕ.
„Ја повикуваме Данела Арсовска таа сама да состави вакви документи, а Советот, без сомнеж во високото ниво на писменост на Данела Арсовска, само ќе ги усвои.
Доколку Арсовска не е против нови градинки, училишта и затворени спортски објекти и ако не е против скопјани и Скопје, се очекува од неа најбргу таа самата да донесе писмени барања за овие пет проекти за скопјани, а Советот ќе ги прифати онака како што таа ќе ги достави, без сомнеж во високото ниво на писменост на Данела Арсовска“, дециден е Стоилковски.
Во спротивно, како што рече, Данела Арсовска само ќе докаже дека е продолжена рака на Миле Зечевиќ и на СДС наспроти вистинските потреби на скопјани за две градинки, две училишта и за спортски објекти.
Македонија
Прва пресуда за говор на омраза врз основа на сексуална ориентација
Основниот суд во Неготино, како надлежен првостепен кривичен суд, одлучувајќи по обвинителен предлог на Основното јавно обвинителство Кавадарци, а по кривична пријава од „Квир центар“, против лицето С. М. од општина Демир Капија, за сторено кривично дело ширење расистички и ксенофобичен материјал по пат на компјутерски систем од чл. 394-г ст. 1 од Кривичниот законик, на 15 март 2024 година донесе пресуда дека обвинетиот е виновен за делото за кое се товари.
Обвинетиот во јули минатата година на социјалната мрежа „Фејсбук“ под споделена медиумска содржина има напишано два коментара со вознемирувачки говор на омраза кон ЛГБТИ+ заедницата, во кои се повикува на насилство кон оваа маргинализирана група. Со тоа обвинетиот сторил кривично дело ширење расистички и ксенофобичен материјал по пат на компјутерски систем од чл. 394-г ст. 1 од Кривичниот законик, па судот му изрече алтернативна мерка – условна осуда, казна затвор во траење од една година. Утврдената казна затвор нема да се изврши доколку обвинетиот во рок од една година по правосилноста на пресудата не стори друго кривично дело.
Ова е прва осудителна пресуда во судската пракса на Македонија, со која се санкционира говор на омраза врз основа на сексуална ориентација, иако уште од февруари 2014 година со измените и дополнувањата на Кривичниот законик говорот на омраза е класифициран како кривично дело, па оттаму се забранува и казнува говор на омраза и ширење материјали преку интернет, кои промовираат или поттикнуваат омраза, дискриминација или насилство, против кое било лице или група, врз која било дискриминаторска основа. Според чл. 394-г ст. 1 од КЗ, за ширење расистички и ксенофобичен материјал по пат на компјутерски систем предвидена е казна затвор од една до пет години за секој што ќе предизвика или ќе разгори омраза, раздор или нетрпеливост, врз некоја дискриминаторска основа, вклучително врз основа на припадност на маргинализирана група.
Скопскиот „Квир центар“ ја поздравува одлуката на судот, кој демонстрира дека ги сфаќа сериозно поттикнувањето насилство и креирањето загрозувачка средина за ЛГБТИ+ луѓето. Говорот на омраза поттикнува сторување дела од омраза, па „Квир центар“ смета дека оваа осудителна пресуда е значајна победа во нашите напори да креираме безбедно опкружување за сите граѓани, без разлика на тоа поради кој основ или нивна различност ќе бидат цел на говор на омраза или дела од омраза.