Македонија
Дали пожарите во Битола се дело на дрвната мафија?
Нов пожар изби вчера околу 17 часот во Битолско, на потегот меѓу селата Ротино и Горно Српци, единствено место кое годинава не беше опожарено. Освен пожарникарските служби во гаснењето на пожарот учествуваа и јавните
Нов пожар изби вчера околу 17 часот во Битолско, на потегот меѓу селата Ротино и Горно Српци, единствено место кое годинава не беше опожарено. Освен пожарникарските служби во гаснењето на пожарот учествуваа и јавните претпријатија, Дирекцијата за заштита и спасување, Македонски шуми. Граѓани кои имаат викенд куќи во овој дел дојдоа да ги заштитат. Револтирани од случувањата ги искажаа своите сомнежи.
„Пожарот е подметнат, ова е договорен бизнис. Другата страна кога ја изгореа испадна дека нема добра кубикажа доволна за добар бизнис и сега се настрвија на другата страна во реонов што е кај Ротино и Горно Српци. Се обидоа претходно, го подметнаа ама веднаш беше изгаснат и не го зафати крупното дрво што беше нивни интерес. Јас не можам да разберам имам намера да поднесам и кривична пријава за несовесно работење против сите институции кои имаат тука надлежност“ вели Методиј Лалевски.
„Вчера сабајле почнаа две групи да сечат дрва од опожарените, се јавив кај шумарот тој ми вели тоа е наредба од инспекторот. Кој инспектор ,не знам. Цело време сечеа до сабајлето кај 6 часот уште беше ноќ, сечеа и во најжешкото сега кога најмногу може да се сече никаде ги нема“ вели Војдан Поповски.
Синоќа во 21 часот беше свикан и кризен штаб, со цел одредување на координатите на делување, поради големата брзина со која што се ширеше пожарот кој за еден час стигнал до врвот на ридот.
„Утрово уште од 5 часот и 30 минути се на терен, се делува ставен е под контрола пожарот и поради временските услови луѓето ќе останат овде“ вели градоначалникот Владимир Талески
Со машинерија бил направен пресек што помогнало пожарот да не се префрли преку патот. Упатија уште еднаш апел до граѓаните да пријавуваат доколку забележат сомнителни лица кои би биле потенцијални подметнувачи.
„Ние сме одговорни за овој дел овде и делуваме преку општинскиот кризен штаб, додека сите останати институции си имаат свои надлежности. За жал немаме некои резултати при откривање на сторители освен во случајот кога беа откриени три малолетни лица од ромска националност“ вели Талески
Овој пат гореше борова шума. „Учествуваа 150 гасначи од сите јавни претпријатија околу 8 часот е ставен под контрола изгоре 150 хектари борова шума“ вели Костадин Поповски командир на ППТЕ Битола.
Сомнежите се дека и овој пожар е подметнат. „Повеќе од сигурно е дека станува збор за подметнат пожар, ова е дело на дрвната мафија. Погледнете само колку стебла се изгорени па вие како новинари истражувачи направете анализа колкав е профитот па ќе дојдете до еден заклучок“ вели Поповски
За што може да се искористат опожарените стебла?
„Тоа е многу работа значи граѓа, пилевина, милевина итн.Кога ќе изгорат игличките на борот тогаш борот е мртов но стеблото е здраво“ вели командирот.
Според наводите од командирот на противпожарната единица во Битола и исказите на граѓаните кои имаат тука викенд куќи, сомнежите се префрлаат на комерцијализирање на сечата од опожарените стебла.
Одговор побаравме од Шумската полиција во Битола која делува на реонот Битола, Ресен Демир Хисар со околу 25 вработени. Командирот рече дека се на терен и дека не смеат да даваат изјави, додека пак од директорот на Македонски шуми, Митко Стојановски кој исто бил на терен во телефонски разговор, дознавме дека вработените вршат сеча со цел санација на опожарениот терен по налог на инспекторат, кој по изготвен записник од проценка на комисија од Скопје им дава обврска на Македонски шуми да го обезбедат теренот.
Сечата од опожарени стебла според директорот се продава по договор и процена на цена од страна на Комисијата која првично го санирала теренот од 2007ма па 2009та и сегашните пожари и сечата одела на продажба етапно.
За она што беа револтирани граѓаните, дека се врши сеча во време на забрана за движење низ шуми, од Македонски шуми велат дека, за нив, како службени лица не важи забраната бидејќи тие на документ имаат дозвола за активностите кои ги спроведувале за санација на теренот. Во моментов пожарот на магистралниот пат Битола- Ресен, бил под контрола, но временските услови не се поволни односно високите температури и ветер се закана пожарот повторно да ескалира и да се прошири. /крај/тера/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.