Македонија
Милошоски: Постапката на Шацимаркакис нема да го подобри неговиот углед
Постапката на европратеникот Јоргос Шацимаркакис на завчерашната панел-дискусија за состојбите во македонското новинарство нема да го подобри неговиот углед во македонската јавност, смета Антонио Милошоски.
Постапката на европратеникот Јоргос Шацимаркакис на завчерашната панел-дискусија за состојбите во македонското новинарство нема да го подобри неговиот углед во македонската јавност, смета Антонио Милошоски, претседател на собраниската Комисија за надворешна политика и екс-министер за надворешни работи.Според Милошоски, инцидентот со македонските новинари може да се одрази на работата на мешовитиот парламентарен комитетот Македонија-ЕУ, со кој претседава токму Шацимаркакис.„Јас сметам дека секој ко-претседавач на овој мешовит комитет треба да презема чекори, постапки којшто ќе го подобрат неговиот углед и репутација во земјата на која што се однесува тој комитет. Не верувам дека со овој настан угледот и репутацијата на пратеникот Шацимаркакис ќе бидат подобрени во македонската јавност. Сепак, неговиот углед и репутација во македонската јавност може во добра мерка да се одрази на неговата ефикасност и делување во рамките на мешовитиот парламентарен состав“, коментира Милошоски.Прашан за мислење околу состојбата со слободата на медиумите во Македонија, Милошоски повика на посилно залагање на Здружението на новинари со цел заедничко утврдување на правилата на игра во медиумскиот простор. „Слободата на медиумите е одговорност на повеќе фактори во Република Македонија, се разбира пред се на институциите кои што ја имаат извршната улога во нашиот политички систем, а истовремено и на субјектите што се вклучени директно во слободата на медиумите. Тоа значи медиумските куќи, новинарството, самото општество, прием на новинарската критика и можноста таа да се изрази и почитувањето на правилата на игра во самиот медиумски простор. Јас би препорачал што посилно залагање на Здружението на новинарите на Македонија за едно поцврсто и заедничко утврдување на правилата на игра во медиумскиот простор и помеѓу новинарите за да може новинарите и медиумите како субјект да имаат еден поусогласен настап и заедничка позиција спрема институциите и самата држава“, изјави Милошоски.Во врска со најавите дека вицепремиерот Теута Арифи на декемвриската средба со нејзиниот грчки колега Теодорос Пангалос ќе говори на албански јазик, Милошоски со очекување дека правилата и протоколите во дипломатската комуникација ќе бидат испочитувани. /крај/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари: Земјотресот почна, се надевам дека на 8 мај ќе дојде промената ДУИ да биде опозиција
Масовниот одѕив на гласачите на овие претседателски избори за Арбен Таравари, претседателски кандидат на коалицијата ВЛЕН, е показател дека промените се почнати. На првата прес-конференција по затворањето на избирачките места тој рече дека очекува победа на 8 мај.
„Земјотресот по се изгледа дека денеска почна со масовното учество на граѓаните во изборите, а се надевам дека на 8 мај ВЛЕН ќе победи и ќе дојде долго очекуваната промена ДУИ да биде во опозиција“, рече Таравари.
Тој јавно се заблагодари на граѓаните за масовниот одѕив и изрази надеж дека набљудувачите нема да дозволат злоупотреби на гласовите.
„Сега веќе се знае дека на овие избори имаше многу помасовно излегување на гласање отколку претходните избори што зборува дека промените ни се приближуваат и ни доаѓаат. Ние како ВЛЕН сме пресреќни дека добивме гласови генерално од Албанците. Сега веќе промените се внатре во кутиите кои веќе се отвораат. Се надевам дека нашите набљудувачи ќе ги контролираат и нема да дозволат да има злоупотреби и ќе се гарантира секој глас кој што е даден на демократски начин дека ќе излезе на површина“, рече Таравари.
Македонија
Кузеска: Констатирани се мали прекршувања на изборниот процес, ги очекуваме резултатите и уверени сме дека граѓаните ќе ја поддржат европската иднина
Богданка Кузеска од Изборниот штаб на СДСМ, по затворањето на избирачките места изјави дека изборниот ден бил демократски, а гласањето се одвивало во фер и демократска атмосфера.
„Граѓаните својата волја ја изразија слободно и достоинствено како што доликува на една демократска земја – членка на НАТО со започнати преговори со ЕУ. Констатирани се само неколку многу мали прекршувања на изборниот процес. Сакаме да изразиме благодарност до сите граѓани кои денеска гласаа. Самото гласање е суштински чин кој произлегува од моќта на граѓаните да одлучуваат за својата иднина и иднината на државата. Ги очекуваме изборните резултати и уверени сме дека граѓаните и денеска и на 8 мај ќе ја поддржат европската иднина за Македонија. Иднина во која Македонија е дел од европското семејство и членка на ЕУ“, порача Кузеска.
Повтори дека ги очекуваат изборните резултати и наскоро ќе излезат со точни податоци.
Македонија
Евидентирани 12 случаи на фотографирање гласачко ливче, шест пријави за нудење поткуп и 15 пријави за агитирање, соопшти Тошковски
Според министерот за внатрешни работи Панче Тошковски денешниот изборен ден поминал во безбедна, мирна и демократска атмосфера.
Како што рече, безбедните избори биле резултат на добрата соработка меѓу полицијата, Државната изборна комисија и сите други чинители кои биле вклучени во спроведувањето на изборниот процес
„Овие избори беа уште еден тест за демократијата и во таа насока сакам да им честитам на граѓаните кои излегоа на гласање и ја исполнија својата граѓанска должност и со тоа уште еднаш го истакнаа демократскиот капацитет на државата и значењето на нивната активна улога во градењето на инклузивно општество“, кажа Тошковски.
Истакна дека биле евидентирани повеќе настани кои се однесуваат на прекршување на изборниот процес.
„На ниво на целата држава евидентирани се 12 случаи на фотографирање на гласачкото ливче, два случаи на кинење на гласачко ливче, шест пријави за нудење на поткуп и 15 пријави за агитирање. На подрачје на СВР Скопје во врска со пријавата за испукана димна бомба од страна на тимот за антитероризам извршена е проверка , подигната е направата и предадена е на претседателот на избирачкиот одбор. Констатирани се шест прекршоци, а ќе бидат поднесени и две кривични пријави, една за повреда на тајност на гласањето и една за повреда на избирачко право“, потенцира Тошковски.
Во Охрид било пријавено јавно гласање пред комисијата а во Тетово биле пријавени упатени навреди кон шеф на штаб на политичка партија.
Во Куманово како што додаде, две гласачки места во село Умин Дол биле затворени а избирачкиот материјал бил вратен во канцелариите на ОИК.
Во Струмица едно лице го покажало гласачкото ливче на набљудувач.