Македонија
Општините заеднички ќе се справуваат со отпадот
Општините да се здружат за менаџирање со отпад, да се заострат условите за издавање дозволи за управување со отпад и да се засилат инспекциските проверки, предвидува новиот предлог-закон за изменување и дополнување на Законот за управување со отпад, усвоен на седумдесеттата седница на Владата, во вт
„Со воспоставувањето законска обврска на општините за регионално здружување и управување со отпадот, пред сé, комуналниот отпад, на ниво на плански региони за управување со отпад, согласно Националниот план на РМ – се воспоставува законска обврска на општините за регионално здружување и управување со отпадот преку склучување на Спогодба со која ќе се регулираат сите прашања поврзани со функционирањето на соработката за заедничко решавање на работите во управувањето со комуналниот отпад на ниво на регион“, рече министерот за животна средина и просторно планирање Абдилаќим Адеми на прес-конференција.
Според него, ваквото здружување ќе овозможи побрзо и поекономично градење регионални системи за управување со отпад кои би се состоеле од регионални депонии или други капацитети за постапување со отпад како.
Ќе се воспостават и регионални тела за управување со отпад, како Меѓуопштински одбор за управување со отпад и Регионален центар за управување со отпад.
Со новиот предлог-закон се предвидува заострување на условите за издавање дозволи со цел спречување на нелегалната трговија со отпад. Измените се направени во системот на издавање дозволи за постапување со отпад.
„Променети се условите за локациите на кои се бара дозволата, односно истите треба да бидат лоцирани вон населено место (во зони со лесна индустрија), воведено е поставување на 24 часовен видео надзор за електронско следење на целокупниот тек на отпадот, се воведува и условот за обезбедување на финансиска гаранција или друго соодветно осигурување која ќе се користи за покривање на трошоците за отстранување на штетните последици и оправданите ризици настанати при управувањето со отпадот Со измените на законот се олеснуваат условите за одземање на дозволи“, рече Адеми.
Според досегашното законско решение, одземањето на дозволата можеше да се направи во случаите кога трипати во текот на три години ќе се повредат условите од дозволата, а со измените истите се намалуваат на двапати во текот на една година.
„Со измените на законот се воспоставува можност државниот инспектор да може да врши 24-часовен онлајн мониторинг над поставениот видео надзор кај операторите“, рече Адеми.
Казните, исто така, се заоструваат, а се проширува и основата за кривичното дело за недозволена трговија со неопасен отпад: со забрана за вршење на дејност во траење од најмалку 1 до 5 години, се дава можност судот да изрекува и споредна казна со која ќе се забрани издавање нова дозвола на истиот субјект кој го сторил кривичното дело во период од три години, како и стекната имотна полза прибавена со кривичното дело да биде конфискувана.
Исто така, се предвидува и усогласување со Законот за концесии и јавно приватно партнерство – новина е што во досегашното законско решение операторот на депонија за опасен отпад може да биде само јавно претпријатие основано од Владата. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Решен децениски проблем со безбедноста на сообраќајот на улицата ,,Наум Наумовски Борче”
Општина Центар ја отстрани рампата на улицата „Наум Наумовски Борче” кај хотел Дувет, на раскрсницата помеѓу „Ленинова” и „Партизанска” која претставуваше проблем и пречка за функционирање на сите учесници во сообраќајот.
Со овој потег општината го реши деценискиот проблем на барање на жителите, по поднесена петиција во која се потпишаа 327 граѓани. Ова е направено во согласност со ДУП-от и за овој зафат се добиени потребните дозволи од сите надлежни институции.
На улицата се поставени столпчиња за безбедност во сообраќајот и за влегувањето на возилата во подземните гаражи. Со овој зафат се обезбедува пристапна зона која ќе биде проодна и безбедна за граѓаните.
,,Конечно го решаваме долгогодишниот проблем на ваше барање. Улицата станува безбедна за пешаците и за вас жителите. На овој потег постојано се случуваа сообраќајни незгоди и затоа ова моравме да го направиме. Со вадењето на рампата воедно и ја ослободивме улицата од сите пречки поради кои имаше проблеми”, им се обрати Герасимовски на собраните жители.
Општина Центар известува дека улицата ќе биде двонасочна, во широчина од 7 метри, по 3.5 од секоја страна, ќе се отстрани страничната урбана опрема и ќе се намалат надворешните тераси на угостителските објекти долж улицата „Наум Наумовски Борче”.
Со ова исто така ќе се оневозможи дивото паркирање на улицата што претходно претставуваше проблем за пешаците.
Македонија
Пендаровски: Ја вративме слободата, изградивме еднакво општество, имаме силна поддршка од најмоќните демократски држави
Кандидатот за претседател, Стево Пендаровски вчерашниот ден од изборната кампања го заокружи со граѓански митинг во Гостивар.
Пред присутните Пендаровски потсети на резултатите постигнати во изминатите пет години како враќањето на слободата и демократијата, градењето модерно општество на еднакви граѓани и напредокот во евроинтегративниот процес.
Пендаровски посочи дека по членството во НАТО, се случи напредок и во процесот на интеграција кон ЕУ, кој сега е блокиран поради блокадите на ВМРО-ДПМНЕ и нивниот однос кон меѓународните договори што ја гарантираат евроатлантската интеграција на државата.
„Што нуди ВМРО-ДПМНЕ во однос на договорите што нѐ вратија во нормалниот цивилизиран свет? Нудат поништување. Кога ќе ги прашате што после тоа поништување, велат повторно ќе почнеме да преговараме. Имаат ли гаранции дека некој од надвор од големите сили ве поддржува за тоа повторно да го преговарате и да го доведете до исход кој е добар за народот и државата? Немаат. Немаат еден докажан пријател, партнер од големите сили, како што имавме ние. Сите овие договори што ги споменувам и со Грција и со Бугарија и со Европа се направени со огромна поддршка и помош од Америка, од Германија, Франција, од големите меѓународни сили. Тие немаат ниту еден и затоа кога доаѓаат пред вас ви кажуваат дајте ни власт па од 9 мај ќе ви кажеме кои се нашите планови. Тоа е крајно несериозно“ порача Пендаровски.
Затоа, додаде тој, уште на 24 април потребна е масовна мобилизација и заокружување на бројот еден со што напредокот на државата ќе продолжи.
Пендаровски во своето обраќање пред граѓаните порача и дека е крајно време за да се испита потеклото на имот на сите судии и обвинители, но и на политичарите, почнувајќи од него, а оние за кои ќе се утврди дека за време на нивниот мандат несразмерно го зголемиле својот имот прво да ги вратат парите а потоа и да се соочат со затворски казни.
Македонија
СДСМ: Мицкоски и ДПМНЕ немаат план ниту визија, со нив нема членство во ЕУ
„Мицкоски и ДПМНЕ немаат план, ниту визија за иднината, кристално е јасно дека со нив нема членство во ЕУ.
Мицкоски и ДПМНЕ како иднина, на граѓаните им нудат враќање во минатото, во изолација, режим, неизвесност.
Граѓаните сакаат напред, сакаат членство во ЕУ, повисок животен стандард, поголеми плати и пензии, сакаат да живеат во европска Македонија.
Затоа, на изборите ќе го дадат својот глас за европска иднина со СДСМ и Димитар Ковачевски“.
Соопштение на СДСМ