Македонија
Фокус: Црвенковски барал бугарски пасош?
Поранешниот претседател и актуелен лидер на Социјалдемократскиот сојуз, Бранко Црвенковски започнал постапка за добивање бугарско државјанство, пишува бугарската новинска агенција Фокус, која се пошегува за 1 април Денот на шегата на сметка на Црвенковски и со колегите од Македонија кои ја пренесоа веста.
СДСМ во врска со веста испрати дури и писмена реакција во којашто ги демантира тврдењата на бугарската агенција и вели дека се чиста измислица и манипулација.
Според агенцијата, Црвенковски поднел документи за бугарско државјанство уште во 2011 година, на крајот на претседателскиот мандат на тогашниот претседател на Бугарија, Георги Парванов, со кој според агенцијата, биле блиски пријатели не само по партиска линија.
Со промената на претседателската администрација и крајот на мандатот на Ангел Марин како потпретседател и директно задолжен за издавање на инструкции, давањето на државјанство на Црвенковски било успорено.
Во последниве месеци, по настаните во македонскиот парламент на 24 декември минатата година, посредниците кои ги ангажирал Црвенковски во Бугарија почнале да инсистираат да се забрза постапката за добивање на бугарско државјанство.
„Се очекува македонскиот политичар да добие државјанство до крајот на годината, иако обичните граѓани чекаат повеќе од две години Во документите на Бранко Црвенковски, како основа за барањето на државјанство е утврдено правото на потекло“,, пишува агенцијата.
Според агенцијата,барањето на бугарско државјанство од Црвенковски е опција за заштита на Црвенковски од режимот на актуелниот премиер Никола Груевски.
Божидар Димитров, директор на Националниот историски музеј се чуди како досега Црвенковски немал бугарско државјанство бидејќи, според него, многу негови соработници веќе имале.
Од СДСМ очекуваат бугарската новинската агенција „Фокус“ да прецизира дали се работи за некаква шега или за вистинита изјава, со оглед на фактот дека денес е први април, денот на шегата.
„Доколку станува збор за вистинска изјава на Божидар Димитров, согласно сите новинарски стандарди и објективно информирање на јавноста, сметаме дека пред нејзиното објавување ќе беше логично да побараат став од СДСМ. На ваков начин, македонската јавност добива впечаток дека или Божидар Димитров или бугарската новинска агенција се вклучиле во кампањата за локалните избори во Македонија. Без разлика, земајќи предвид дека режимските мегафони веднаш ќе сакаат и ова да го злоупотребат за дневно-политички маркетинг, сметаме дека е неопходно јасно и недвосмислено да ги демантираме наводите кои ги објави бугарски „Фокус“ кои се чиста измислица и манипулација“ се вели во реакцијата на партијата.
Кога агенцијата откри дека се работи само за шега, напиша дека тринаесетта година по ред се пошегувале со омилената нивна тема, Македонија.
„ Бидејќи сме многу блиски, па дури и роднини, се надеваме и “жртвите” и оние кои ги доведовме во заблуда нема да ни се налутат. Почитуваниот македонски политичар и лидер на СДСМ Бранко Црвенковски засега не побарал бугарски пасош од нас.Чудно зошто во Македонија поседувањето на бугарски пасош е во состојба да предизвика возбуда. Така не е со прашањето за државјанство на Австралија, Албанија, Косово, Србија, Швајцарија и друга држава“ пишува Фокус./крај/фокус
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нема да има работни саботи за учениците, МОН донесе нова одлука
Министерството за образование и наука информира дека наставата од деновите на гласање, 24 април и 8 мај, како и од 30 ноември кога беше организиран Самитот на ОБСЕ во Скопје, наместо во саботи, ќе се надомести во работни денови.
Дополнувањето на нереализираните наставни часови ќе го планираат и организираат директорите на училиштата и ќе се реализира со подолг престој на учениците во денови од работната недела, во рамки на шестчасовното работно време на наставниците, велат од МОН.
Од Министерството потсетуваат дека наставната година за учениците од средните училишта трае до 10 јуни, додека за учениците од основните училишта до 17 јуни.
„Потребно е да го зачуваме најдобриот интерес на учениците, а тоа подразбира тие во целост и квалитетно да ја совладаат предвидената наставна материја“, додаваат од МОН.
Македонија
Со супервештачење ќе се бара вина кај лекарите за родилката од Дебар, која, по породувањето, се врати дома без јајчник, матка и бубрег
Судот нареди да се направи супервештачење за родилката од Дебар, Јалдз Веапоска, на која по породување во струшката болница ѝ беа извадени јајчник, бубрег и матка. Наредбата за супервештачење доаѓа откога судот доби целосно спротивни вештачења од Обвинителството и од одбраната. Вештачењето од Институтот за судска медицина, приложено од Обвинителството, посочи одговорност кај лекарите од струшката болница, а вештачењето нарачано од одбраната, кое го направи вештакот Драге Дабески, заклучи дека лекарите ѝ го спасиле животот на родилката.
„Со супервештачењето верувам дека, конечно,. вистината ќе излезе на виделина и правдата ќе биде задоволена. Вештакот на одбраната не најде лекарска грешка, ме убедува дека со вадење три органи по породувањето со царски рез, ми го спасиле животот иако вештачењето од Судска медицина покажа дека лекарите имаат вина. Јас здравјето не можам да си го вратам, органите ми се извадени и функционирам како половина човек, но очекувам супервештачењето на лекарите да им покаже дека има лекарска грешка и на пациентите да им порачам дека не треба да молчат, треба да се охрабрат и да се борат за вистината“, вели Вепоска за „Макфакс“.
Се пожали дека секое судење дополнително ја исцрпува, а извадените органи ја ограничуваат во мајчинството, во работата и во секојдневниот живот.
„Здравјето целосно ми е нарушено. Освен физички, имам и психички проблеми, се лекувам и од тоа. Особено тешко ги поднесувам судењата, ми треба време да закрепнам од нив. Работам со скратено работно време оти немам сила за осумчасовна работа. Како мајка не можам да им се посветам на децата онака како што треба оти постојано имам здравствени проблеми, еве сега тукушто ја испив терапијата“, рече Веапоска по денешното судење.
Судијата Јодран Јованов, кој го побара супервештачењето, е трет судија што го добива нејзиниот случај откога претхдните двајца се пензионираа. Следното рочиште е закажано за 3 јуни кога Вепоска очекува да биде готово и супервештачењето.
За извадените органи по породувањето со царски рез на Веапоска, обвинети за несовесно лекување се гинекологот Мухамед Асани, кој во 2020, кога беше направено породувањето, беше директор на болницата, син му Блертон Асани и докторката Лилјана Јовановска.
Македонија
МВР, ЈО и АНБ комплетно подготвени за претстојните претседателски избори
Во врска со претстојните избори, денеска, во просториите на Министерството за внатрешни работи, министерот Панче Тошковски одржа состанок, на кој присуствуваа дополнителниот заменик-министер Митко Бојмацалиев, директорот на Бирото за јавна безбедност, Сашо Тасевски, директорот на Агенцијата за национална безбедност, Зарко Милошевски, републичкиот јавен обвинител, Љупчо Коцевски, и претседателот на комисијата во Јавното обвинителство на РСМ за следење евентуални изборни нерегуларности, Џељаљ Бајрами.
На состанокот министерот Тошковски најпрвин се заблагодари за одвоеното време и досегашната успешна соработка на сите фактори одговорни за безбедно спроведување на изборниот процес и потенцира дека досега не се констатирани посериозни активности, кои се насочени кон нарушување. Исто така, побара од присутните секој во својот делокруг да сподели информации што се од интерес за спроведувањето на изборите и начинот на кој ќе постапуваат институциите за време на изборниот ден.
Од страна на дополнителниот заменик-министер за внатрешни работи, Бојмацалиев, беше потенцирана тенденцијата од година на година да имаме сè помирни избори, со исто очекување за годинешните изборни процеси, бидејќи МВР е подготвено да биде на висината на задачата да спроведе уште едни фер, слободни и демократски избори по европски терк.
Од страна на директорот на БЈБ беа презентирани информации во врска со оперативната акција претседателски и парламентарни избори 2024 година и во таа насока посочи дека од страна на оперативниот штаб и сите надлежни организациски единици се преземени сите потребни мерки и активности врз основа на претходно изготвен план и притоа не се констатирани никакви позначајни проблеми.
Од страна на АНБ се преземаат организирани и координирани мерки за прибирање сознанија за евентуални изборни нерегуларности, а во насока на безбедно спроведување на изборите.
Републичкиот јавен обвинител, претседателот на комисијата во Јавното обвинителство на РСМ за следење вентуални изборни нерегуларности, Џељаљ Бајрами, јавните обвинители на сите виши јавни обвинителства и основниот јавен обвинител на ОЈО Скопје информираа за активностите во рамките на Обвинителството, каде што определени се зајакнати дежурства за изборниот ден за покривање на целото подрачје на државата и со будно внимание ќе се следи процесот и навремено ќе се известува за сите настани и активности што се од интерес на јавноста, а поврзани со спроведувањето на изборите.