Македонија
Обраќање на Иванов на Форумот за млади
Претседателот на Република Македонија, Ѓорге Иванов, во сабота ќе има поздравно обраќање на Форумот за млади – „Улогата на религиите во градењето на толерантна младина”, како и на официјалното затворање на Третата светска конференција за меѓурелигиски и меѓуцивилизациски дијалог – „Слободата и достоинството – основни вредности во меѓучовечките, меѓурелигиските и меѓукултурните односи”.
Форумот за млади се одржува во рамки на Третата светска конференција за меѓурелигиски и меѓуцивилизациски дијалог и се стреми да прерасне во нејзин дел кој континуирано ќе се развива и надградува.
На Форумот за млади ќе учествуваат млади номинирани од верските групи и религиозните заедници во Република Македонија, како и претставници од трите генерации на Школата за млади лидери, која се организира под покровителство на претседателот Иванов.
Целта на Форумот е да ги актуелизира младите како клучен фактор во градењето на меѓурелигиска толеранција. Фокусот на дискусиите во рамки на Форумот ќе ги опфати практиките и искуствата за работа со младите во мултирелигиозни, мултиетнички и мултикултурни средини, улогата на младинските невладини организации во создавањето на вредносни системи кај младите, како и аспектот на социјалните мрежи, младите и духовноста.
Покрај поздравното обраќање на претседателот Иванов, свое обраќање на Форумот ќе има Мухамед Мешиќ, на тема „Млади луѓе и верската различност: кон ерата на глобална толеранција” при што ќе ги сподели своите искуства од животот и работата на многуте светски меридијани, искуствата на неговата Босна и Херцеговина, како и неговиот личен пример на мултикултурност со муслимански, христијански и еврејски роднини. Мешиќ, кој зборува 71 јазици, има работено на четири континенти и е еден од предавачите на Школата за млади лидери.
Како специјални гости на Форумот се поканети претставници од домашни и странски младински организации, кои, меѓу другото, во своите активности посветуваат внимание на меѓурелигискиот дијалог, односно на прашањата од областа на религијата, културата и духовните вредности.
На Третата светска конференција за меѓурелигиски и меѓуцивилизациски дијалог, преку размена на мислења и искуства на претставници на различни религии и култури, се очекува да бидат промовирани религијата и културата како фактори на мирот, како и да се укаже дека почитувањето на верските права и културната разноликост претставува темел на мирот и просперитетот.
Првата светска конференција за меѓурелигиски и меѓуцивилизациски дијалог на тема „Придонесот на верата и културата кон мир, заемна почит и соживот”, се одржа од 26 до 28 октомври 2007 година во Охрид, додека Втората светска конференција за меѓурелигиски и меѓуцивилизациски дијалог, на тема „Религијата и културата – нераскинлива врска меѓу народите”, се одржа од 6 до 9 мај 2010 година во Охрид. /крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левица: Решението за градба кај болничкиот комплекс „Воена болница“ да се поништи веднаш
„Го повикуваме градоначалникот Стевчо Јакимовски да ги почитува законите и да го поништи Решението за градба на 17-катницата кај Болничкиот комплекс „Воена болница“, истакнуваат од Левица.
Потсетуваат дека политичката партија Левица повеќепати укажа на штетноста од градбата на повеќекатницата на истата локација, паралелно организираше протест на којшто граѓаните јавно го искажаа незадоволството од своеволието на градоначалникот и инвеститорите за противзаконската одлука на истите да почнат со градба на зграда за којашто немаат законска дозвола.
„Од пред неколку дена е правосилно Решението со кое се поништува незаконски позитивното конзерваторско мислење, кое се обидоа да го издејствуваат инвеститорите, а истото, по наши сознанија, е пристигнато во Општината на 21.3.2024 година, по што градоначалникот треба веднаш во законски рок да постапи по истато. За жал, Решението за градба уште не е поништено.
Од општинската администрација не даваат одговори по однос на прашањето по Решението со кое се одбива жалбата на инвеститорите, но успеавме да го добиеме, бидејќи е информација од јавен карактер“, дообјаснуваат од оваа партија.
Го повикуваат градоначалникот Стевчо Јакимовски во пресрет на изборната претседателска кампања да се одважи, како што велат, да ги испочитува законите и да го поништи Решението за градба веднаш, како би докажал пред граѓаните дека, навистина, ги застапува нивните интереси“.
Македонија
Инспектори затекнале диви менувачници на Бит-пазар, но наместо да ги запечатат, им дозволиле да работат
Полицијата поднесе кривична пријава против шест инспектори, вработени во Државниот пазарен инспекторат, и тоа: С. Б. (32), Ј. Р. (54), В. М. (47), Б. С. (46), С. С. (61) и Р. Б. (37), сите од Скопје, поради злоупотреба на службената положба и овластувањето.
Во текот на март и април 2023 година, вршејќи контрола кај три менувачници, лоцирани во близина на Бит-пазар, а за кои било утврдено дека не биле регистрирани како фирми и не поседувале лиценци издадени од НБРМ за вршење менувачко работење, но подолг временски период работеле како менувачници, инспекторите на затекнатите лица во дивите менувачници биле должни да им изречат решение за забрана за вршење дејност, да им ги запечатат објектите, да им ги одземат предметите, опремата и средствата со кои е направен прекршокот, како и да им изречат глоба во износ од 1.000 до 20.000 евра во денарска противвредност.
Но, пријавените пазаришни инспектори ги прекршиле сите одредби од наведениот закон и во три извршени вонредни инспекциски надзори на затекнатите лица во сите три објекти како менувачници ниту им издале решение за забрана за вршење нерегистрирана дејност, ниту им ги запечатиле просториите во кои ја вршеле противзаконската активност, ниту им ги одзеле средствата, предметите и опремата со кои е направен прекршокот ниту, пак, им изрекле глоба во износ од 1.000 до 20.000 евра.
Напротив, во сите три извршени вонредни надзори на сите три менувачници на секој од сопствениците им изрекле еднократна глоба во износ од 80 евра во денарска противредност и ги оставиле и понатаму менувачниците редовно да работат, со што постапиле спротивно на законот за забрана и спречување вршење нерегистрирана дејност и со неизвршување на својата службена должност го сториле кривичното дело злоупотреба на службената положба и овластувањето.
Македонија
Митрески – Бомгартнер: Северна Македонија и Франција имаат одлични односи, меѓусебната соработка и поддршка ќе се продлабочат
Претседателот на Собранието, Јован Митрески, денес оствари средба со aмбасадорот на Француската Република во Република Северна Македонија, Сирил Бомгартнер.
Изразувајќи задоволство од одржувањето на средбата, Митрески ја констатира одличната соработка меѓу двете држави и особено соработката на парламентарен план.
Амбасадорот Бомгартнер, честитајќи му го изборот за претседател на Собранието, се сложи со констатациите за интензивираната динамика на меѓусебна соработка. Во тој контекст ги поздрави средбите на парламентарци од Собранието на Република Северна Македонија и Националното собрание и Сенатот на Француската Република во изминатите години како позитивен тренд што треба да продолжи и во иднина.
Информира за претстојната посета на претседателката на групата за пријателство, Лилијана Танги, на земјата, како дел од набљудувачката мисија на ОБСЕ за претстојните претседателски и парламентарни избори.
Беше особено поздравено одржувањето на втората едукативна активност во Собранието „Имам став – Млад франкофонски парламент“, во рамките на одбележувањето на март – месец на франкофонијата, еден исклучителен настан и манифестација која полека прераснува во убава собраниска традиција.
Двајцата соговорници разменија мислења за актуелните собраниски активности, текот на изборите и конституирањето на новиот парламентарен состав. Беше изразена општа согласност за потребата од унапредувањето на соработката во доменот на културата, економијата, енергетиката и други области од заемен интерес за двете земји, како и за потребата од зголемување на бројот на француски инвестиции во земјата.