Македонија
Нема опасност во Косел, апел да не се шират дезинформации
Појавата на чад од сулфатарата Дувало во Косел, остаток од вулкан кој изумрел пред милиони години, е природна појава и нема простор за паника кај населението, затоа што не се регистрирани никакви сеизмички активности во тој регион, смируваат надлежните институции, објави OhridNews.
„Врз основа на добиените информации од терен се работи за природна активност. Овде е расадна линија од каде постојано излегува сулфур водород и јаглероден диоксид. На ова место со години наназад се одлагал смет, а и мештаните тука го фрлаа ѓубрето. Овде има голем слој на градежен шут, кој најверојатно ги затворил природните отвори од каде излегува гасот, а затворена е и главната дупка поради дождовите и најверојатно гасот има направено нови отвори под притисок и затоа излегувал поинтензивно црн чад. Според информациите на Институтот за земјотресно инженерство и сеизмологија во Скопје, не е забележана никаква сеизмолошка активност во ова подрачје, што значи дека се работи за нормална појава на излегување на гас од расадната линија”, објаснува Љупчо Прескакулов од Дирекцијата за заштита и спасување.
Информациите за оваа природна појава беа сензационалистички пренесени во дел од медиумите што предизвика вознемиреност кај населението, но и чудење кај жителите на Косел.
„После долги години прв пат се случи да избијат гасови од вулканот во Косел. Ова мораше да се случи затоа што пред две години кратерот на вулканот беше затрпан при чистење на депонијата од страна на комуналното претпријатие. Поради тоа гасот изби на друго место. Не се направи никаква паника, луѓето се навикнати на вакви појави. Од љубопитност некои дојдоа на ова место кое треба да претставува атракција”, изјави 62-годишниот жител на Косел Мите Мојсоски.
Сулфатарата Дувало денеска ја посети градоначалникот на Охрид Никола Бакрачески, кој исто така упати смирувачки зборови, укажувајќи дека нема причина за загриженост. Тој истакна дека локалната самоуправа веднаш стапила во контакт со надлежните институции, ЦУК, ДЗС, Природноматематичкиот факултет, институтот за хемија и други.
„Нема никаква причина за загриженост, ниту за вознемиреност на населението не само во околината на Косел туку и во градот Охрид. Се работи за природна појава која се случува при промена на временските прилики. Нема никаква опасност ниту по здравјето на луѓето, ниту по околината”, изјави градоначалникот Бакрачески.
Тој додаде дека општината во рамки на програмата за животна средина презема мерки за уредување на просторот, а изработени се и промотивни флаери со цел промоција на овој локалитет во туристички цели.
Бакрачески ги демантираше гласините кои се појавија во одредени медиуми објавени во текот на вчерашниот ден околу некаква сезимичка активност на просторот и упати апел да не се шират дезинформации и паника во јавноста.
Дејан Пановски од Министерството за животна средина и просторно планирање појаснува дека сулфатарата Дувало во Косел е поствулканска појава, која дополнително треба да се истражи и валоризира во туристички цели.
„Ако имате една ваква поствулканска појава во вашиот регион, а не се користи во туристички цели навистина е штета,” рече Пановски.
Вулканот во Косел, односно сулфатарата “Дувало” претставува активна поствулканска појава која се наоѓа во непосредна близина на селото сместено недалеку од Охрид. Има изглед на минијатурен кратер со пречник од 0,5 м и длабочина од 30 см. Од отворот избиваат гасови на јаглен диоксид и сулфур водород заради што оваа појава во исто време е и мофета и сулфатара. Според стручњаците претставува последен знак на изумирање на некогашна вулканска активност. Сулфатарата Дувало во Косел е поствулканска појава една од ретките од ваков вид во овој дел на Европа. Со самиот ваков карактер сулфатарата преставува природен феномен, поради што во 70-тите од страна на Собранието на Општина Охрид добила статус на природна реткост. Во 2010 година Секторот за урбанизам и заштита на животна средина при општина Охрид отпочна активности за заштита и уредување на локалитетот Дувало (сулфатарата во Косел) и негова промоција.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.
Македонија
Одѕивот до 15 часот е 35,89 отсто, најмалку гласале во Центар Жупа, а најмногу во Новаци
До 15 часот до Државната изборна комисија пристигнати се податоци за одѕив на гласачите од 2.110 избирачки места.
Од вкупно запишани 1.092.341 гласач на овие избирачки места, гласале 392.066, односно 35,89 проценти.
Според податоците што се пристигнати досега, најголем одѕив е забележана во Новаци со 57,69 % а најмал во Центар Жупа, 13,11 %.
Гласањето досега се одвива мирно на сите избирачки места.
До овој момент до ДИК се доставени вкупно 233 приговори за заштита на личното избирачко право. Од нив, 38 приговори се усвоени и на избирачите им е овозможено да го остварат своето право на глас, 21 приговор се отфрлени како неуредни, а 22 се одбиени. Другите приговори се во обработка.
На страницата rezultati.sec.mk може да се следи во живо одѕивот на гласачите, вкупен и по општини.
Македонија
ЕУ ќе му даде на Западен Балкан помош од две милијарди евра до 2027 година
ЕУ ќе додели две милијарди eвра грантови и четири милијарди поволни заеми за Западен Балкан од 2024 до 2027 година како дел од Инструментот за реформи и раст за Западен Балкан откога беше одобрен од Европскиот парламент на денешната пленарна седница.
„Инструментот е централен дел од планот за раст за Западен Балкан“, рече коизвестувачот Тонино Пицула на пленарната седница.
Станува збор за финансирање на шесте земји од Западен Балкан на нивниот пат кон Европската Унија. Во ноември минатата година Европската комисија го претстави Инструментот за реформи и раст за Западен Балкан за периодот од 2024 до 2027 година, кој ќе вклучува две милијарди евра грантови и четири милијарди поволни заеми.
Известувачи во име на Европскиот парламент беа хрватските европратеници Тонино Пицула и Карло Реслер.
Пицула беше коизвестувач на ЕП пред Комитетот за надворешни работи (АФЕТ), а Реслер беше коизвестувач пред Комитетот за буџет (БУДГ).
Реслер за новинската агенција „Хина“ изјави дека тоа е инструмент споредлив со националните планови за закрепнување и отпорност, но за шест земји во Југоисточна Европа надвор од ЕУ. Тој посочи дека исплатата на средствата е поврзана со конкретни реформски активности.
Реслер апострофира дека ќе се води сметка за усогласување на надворешната и безбедносната политика и визната политика со ЕУ.
Црна Гора и Србија со години преговараат со ЕУ, Албанија официјално ги отвори пред две години, а Македонија само делумно, со оглед на тоа што за целосен почеток на преговорите неопходни се уставни измени за внесување на Бугарите во Уставот. Лидерите на земјите членки на ЕУ во март донесоа одлука да ги отворат пристапните преговори со Босна и Херцеговина. Брисел сè уште го смета Косово за потенцијален кандидат.