Засега нема потреба од нови рестриктивни мерки, но не ја исклучувам можноста за тоа, изјави министерот за здравство, Венко Филипче.

Тој рече дека се анализираат зголемените бројки во текот на оваа недела и согласно тоа од понеделник здравствените власти ќе го кажат својот став дали ќе има нови мерки или не.

„Ги следиме бројките и на почетокот на следната недела ќе излеземе со став. Засега во ниеден град не се исполнети условите да треба да има ограничување на движењето“, рече Филипче.

Тој додаде дека над 70 отсто од новите случаи се заболени со британскиот вид на коронавирусот. Исто така, информира дека болничките капацитети не се загрозени и дека има доволно болнички кревети за прием на пациенти со Ковид-19.

Вакцинацијата со руската вакцина „спутник в“ во Македонија ќе почне в среда, најави министерот за здравство, Венко Филипче. Вакцините ќе пристигнат утре на скопскиот аеродром.

„Ги добивме од руската компанија сите потребни документи, и во текот на викендов, многу веројатно е дека во среда ќе почне вакцинацијата, а утре ќе пристигнат на аеродромот во Скопје во 14 часот“, кажа Филипче.

Тој претходно најави дека првин ќе пристигнат 3.000 вакцини од Русија.

Филипче кажа дека од кинеската вакцина се очекуваат 200.000 дози, а една одредена количина може да дојде наскоро, но не се знае кога точно.

Од руската вакцина се очекуваат, исто така, вкупно 200.000 дози. На прашање колку вакцини имаме договорено на хартија, Филипче рече дека станува збор за 2,2 милиони договорени дози.

Владимир Ѓорчев од ВМРО-ДПМНЕ ги обвини премиерот Зоран Заев и министерот за здравство, Венко Филипче, за фијаско со набавката на вакцини и побара оставка од нив.

„Со набавката на вакцини се случува дебакл и фијаско. За една година, за една цела година колку што имаа можност да нарачаат и да набават вакцини, тие само добија една кутија милостина со просење, и ништо повеќе. Ќе ви прочитам неколку примери од земји кои што вчера добија огромни количини на вакцини. Еве ги примерите: Вчера Кенија доби еден милион вакцини од „АстраЗенека“, Руанда 340.000 вакцини, Судан 800.000, Гамбија 36.000 вакцини, Сенегал 324.000 вакцини. Пред неколку дена Молдавија доби 21.000 вакцини од ЕУ“, рече Ѓорчев.

Тој обвини дека владата на Зоран Заев и Венко Филипче не добила ништо.

„Одговорноста е голема, одговорноста ја плаќаат граѓаните со животи. Секој ден во Македонија се умира, а веќе имаме и ситуација каде што 10-15 животи дневно, 10-15 човечки души, 10-15 семејства веќе речиси и да не се вест за Зоран Заев и неговите министри. Тоа е неподнослива леснотија на умирањето. Од тие причини веднаш и час поскоро треба да си поднесат оставка. Ова што се случува со вакцините во Македонија, со немањето на имунизација е катастрофа, дебакл и фијаско кое што секој ден граѓаните на Македонија го плаќаат со изгубени животи“, рече Ѓорчев.