На 15 јули граѓаните ќе изберат минималната плата да изнесува 20.000 денари, просечната плата да порасне до 34.000 денари, пензиите да продолжат да растат и ниту една пензија да не биде пониска од 10.700 денари, порача во Кичево Радмила Шекеринска од СДСМ.

„Граѓаните ќе изгласаат да се зголеми прагот на поврат на ДДВ од 7.200 денари за секој граѓанин на годишно ниво на 9.600 денари. На 15 јули граѓаните ќе гласаат и за зголемуваање на субвенциите од 160 милиони на 200 милиони евра за развој на нашето домашно земјоделие. Градиме 260 километри автопати, 300 километри експресни патишта и 950 километри локални патишта низ цела држава. 2,5 милијарди евра од европските фондови“, нагласи Шекеринска и додаде дека ова ќе бидат европски пари кои ќе ги донесат европските стандарди дома.

Порача и дека невработеноста ќе продолжи да се намалува по 3 проценти секоја година се додека таа не добие едноцифрена вредност.

„Ќе покажеме што значи економски патриотизам на дело и како вистински се сака татковината“, истакна Шекеринска во Кичево.

Мафија владее со Република Македонија, а вчера објавените аудио материјали тоа најдобро го потврдуваат, рече на прес-конференција портпаролот на ВМРО-ДПМНЕ, Димче Арсовски.

„Бевме сведоци и ние и целата јавност како член на подземјето Горан Димовски од Битола викан Тушникот, човек најверојатно со сомнително минато, а не академско, кажува јасно и гласно дека добил зелено светло директно од Вице Заев, брат на Зоран Заев, да запали автомобил на некој кој не е член на СДСМ, само и само да го потисне и да му упати порака со закана и не само него, ами ќе ги потиснел и сите други кои што не биле за СДСМ“, објасни партискиот портпарол.

Арсовски додаде и дека доколку се преслуша целиот објавен материјал се доаѓа до заклучок дека кланот Заеви освен што давал зелено светло за палење автомобили, давал и црвен картон, односно блокирал други бизниси кои им биле конкуренција на нивните.

„Овој материјал е големо сведоштво за начинот на мафијашко владеење на Зоран Заев, Вице Заев и целата фамилија Заеви“, кажа портпаролот на ВМРО-ДПМНЕ, според кого во изминативе три години биле запалени над 50 автомобили во државава.

„Да потсетиме дека беше запалена семејната куќа на потпретседателот и носител на ВМРО-ДПМНЕ во моментот во ИЕ 2 Мисајловски, беше фрлена бомба во семејниот дуќан исто така на Мисајловски, беа демолирани автомобили на видни членови на партијата, што веќе е очигледно и јасно кој ги издал сите овие наредби“, кажа Арсовски и нагласи дека тоа што се слуша на материјалите го нема ниту во мафијашките филмови, па затоа повика граѓаните ќе го дадат финалниот одговор на 15 јули.

Колку сме во Скопје домаќини се познава по Градскиот парк, рече во изјава за медиуми Петар Богојески, носител во изборната единица 1 од партијата Македонски концепт.

„Денес сретнавме прекрасни луѓе, кои и покрај желбата да одморат од градската гужва, беа отворени за разговор со нас. Се е јасно. Нема простор за ветувања, програми, се е слушнато и видено веќе 30 години! Редно е да го смениме политичкиот систем, да падне овој естаблишмент”, изјави Богојески.

Тој порача дека Македонски концепт креаира поинакви јасни политики кои ќе донесат суштински промени за нашата држава.

„Имаме јасна идеја и цел и знаеме како. 15 јули е денот кога без разлика на политичката определба, сите граѓани масовно треба да излезат на гласање и да го заокружат бројот 10“, кажа претставникот на Македонски концепт и додаде дека само заеднички граѓaните може да се изборат за суштински промени.