Македонија
Реакции на оставката на вицепремиерот Боцевски
Македонскиот вицепремиер Ивица Боцевски вчера поднесе оставка на функцијата потпретседател на Владата задолжен за евроинтеграции
Македонскиот вицепремиер Ивица Боцевски вчера поднесе оставка на функцијата потпретседател на Владата задолжен за евроинтеграции.
“Мојот придонес во актуелната влада веќе е целосно исцрпен и затоа ве известувам дека поднесувам неотповиклива оставка“, наведе Боцевски во оставката што ја достави до премиерот Груевски, а кој веднаш ја прифати.
Според неофицијални информации, Боцевски е главен кандидат за амбасадорското место во Норвешка, иако извори во МНР посочуваат дека оваа вест е неоснована.
Медиумите денеска шпекулираат за тоа дали оставката на Боцевски е потврда за најавите на владина реконструкција или пак, тоа е пораз на политиката на актуелната влада околу ЕУ интеграциите.
“Се разбира, никој не верува ниту дека оставката на Боцевски е случајна. Во делот на образложението за повлекувањето тој вели дека неговата улога како вицепремиер е исцрпена, иако е јасно дека Македонија се наоѓа на половина пат до Брисел. Визниот режим се уште не е укинат ниту, пак, е направен чекор напред во извештаите од ЕК и добивање датум за преговори“, пишува денешен “Утрински весник“.
Некогашниот член на левицата и поранешен владин портпарол најверојатно имал одредени опструкции од министрите на ВМРО-ДПМНЕ.
“Според одредени информации, како вицепремиер Боцевски имал опструкции од сите министри на ВМРО-ДПМНЕ и кај нив не поминувал неговиот концепт на реформи што се неопходни за евроинтеграциите“, објави денеска весникот “Дневник“.
Од друга страна, најавите за владина реконструкција се повеќе се актуелизираат со оставката на Боцевски, иако според прогнозите, можно е некои министри сами да си поднесат оставка за да премиерот избегне класична реконструкција.
“Долг период се најавува дека министрите Михајло Маневски, Перо Стојановски и Трајко Славевски се први на удар кои “сами ќе се поднесат оставки“, додава “Дневник“.
Истиот извор наведува дека од министрите на ДУИ се споменуваат имињата на Муса Џафери, Џељал Бајрами и Фатмир Бесими.
“При евентуалните рокади на министерските места, се споменува дека ДУИ ќе ги добие ресорите за транспорт и врски и култура. Во тој случај министерот Миле Јанакиески би седнал во фотелјата за финансии“, заклучува весникот./крај/ме/ис
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Инспекторатот ќе контролира дали работодавците ја почитуваат владината одлука за неработен ден
Државниот пазарен инспекторат им укажува на сите работодавци дека во согласност со заклучокот на техничката Влада деновите на изборите – 24 април 2024 година (среда) и 8 мај 2024 година (среда) – се неработни за сите граѓани.
„Работодавците во наведените денови не треба да извршуваат дејност со исклучок на оние кај кои работните процеси поради својата природа не може да се прекинат“, порачаа од Инспекторатот.
За наведените денови, Државниот пазарен инспекторат ќе воведе дежурства и преку државните пазарни инспектори ќе контролира дали заклучокот на техничката Влада се почитува од страна на работодавците.
Македонија
ДИК објави упатство за гласање на претседателските избори
Пред утрешното гласање на првиот круг од претседателските избори, Државната изборна комисија (ДИК) на својата официјална веб-страница објави повеќејазично упатство за гласање.
УПАТСТВО ЗА ГЛАСАЊЕ ЗА ПРЕТСЕДАТЕЛСКИ ИЗБОРИ
1. Гласањето се врши лично на гласачките места во Република Северна Македонија и во ДКП/КК.
2. Избирачкиот одбор на гласачите им го објаснува начинот на гласање и им овозможува да гласаат.
3. Гласачот може само еднаш да се појави на гласачкото место за остварување на своето избирачко право.
4. Гласачот го приложува документот за лична идентификација – важечка лична карта или патна исправа, односно лична
карта или патна исправа чија важност истекла во периодот од 24 јули 2023 до 24 април 2024 година.
5. Гласачот става отпечаток од показалецот од десната рака на уредот за биометриска идентификација, а доколку
гласачот нема десен показалец се зема отпечаток од показалецот од левата рака или во случај на гласачот да му
недостигаат овие два прста се зема отпечаток од наредниот прст од десната рака.
6. Доколку гласачот нема две раце гласачот се внесува во техничката опрема со пребарување преку неговиот единствен
матичен број (ЕМБГ).
7. Доколку УБИГ не може да најде совпаѓање на отпечатокот од прсти со отпечатокот од прсти на гласачот во
електронскиот избирачки список, гласачот се внесува во УБИГ преку отчитување на личниот документ на МРЗ скенерот
или преку внесување на единствениот матичен број (ЕМБГ), а потоа гласачот става отпечаток од прст на УБИГ.
8. По потврдувањето на идентитетот, гласачот го става својот потпис во изводот од Избирачкиот список.
9. Гласачкото ливче се откинува од кочанот по нумерички редослед, му задолжително се става печат на предната страна
на местото определено за печат и потоа му се дава на гласачот.
10. Гласачот добива едно гласачко ливче.
11. Гласачот гласа сам, тајно зад гласачки параван.
12. Гласачот гласањето го врши на тој начин што го заокружува редниот број пред називот/името на листата со хемиско
пенкало со мастило во сина боја.
13. Превитканото гласачко ливче гласачот го става во гласачката кутија.
14. Гласачот го подигнува документот за лична идентификација.
15. Гласач кој има физички недостаток или е неписмен и поради тоа не може да гласа на начин утврден со Изборниот
законик, со себе има право да доведе лице кое ќе му помогне при гласањето. Ако не доведе со себе лице кое ќе му
помогне при гласањето, тогаш избирачкиот одбор ќе определи друго лице од редот на гласачите. Лицето не смее да
влијае врз одлуката на гласачот.
16. Забрането е семејното и групното гласање, како и гласањето за друго лице.
17. Забрането е фотографирање на гласачкото ливче со мобилен телефон или апарат за фотографирање.
18. Забрането е носење оружје на гласачкото место.
Македонија
Беќаровски навести дека си оди од Токсикологија: Дон Кихот, конечно, го напушта оклопот
Доктор Нико Беќаровски навести дека ќе си замине од Клиниката за токсикологија.
Во статус на социјалните мрежи Беќаровски порача дека е време на приватните клиники да се отвори одделение за детоксикација и клиничка токсикологија.
„35 години бев најголем борец за здрав јавен здравствен сектор. Дон Кохот, конечно, го напушта оклопот. Време е во некоја од приватните болници да се отвори одделение за детоксикација и клиничка токсикологија. Бројот на консументи на психоактивни супстанции секојдневно расте“, пишува Беќаровски.
Ова се случува откако вчера на прес-конференција заедно со уште пет докторки од стручниот колегиум на Клиниката за токсикологија јавно ја прозваа економската директорка на Клиниката за токсикологија, Бесија Иљази, дека не дозволува вработување на двајца дипломирани биолози и еден болничар. Наместо, тоа, таа инсистира да се вработат осумнаесетмина на кои им истекле договорите за дело, а меѓу нив има лица што немаат соодветно образование.
Беќаровски, кој е раководител на Одделението за интензивна нега на Клиниката, рече дека едниот од нив, болничар, вршел притисок врз лаборант – барал урина во која имало наркотици да биде сменета со урина која е чиста, ама лаборантот не прифатил.
За образованието на Иљази лекарите не знаат ништо, ниту за познавањето јазици – со оглед на тоа што македонскиот не го зборува, а Беќаровски се обидел да комуницира со неа на англиски јазик.
Министерот за здравство, Илир Демири, најави разрешување на медицинскиот директор на Клиниката за токсикологија, д-р Данил Петровски, но не и на економската директорка бидејќи немал сознанија за прекршок.