Македонија
Државната матура годинава со подобрени резултати
Резултатите од спроведената државна матура на 16.700 матуранти годинава се генерално подобрени во однос на резултатите од минатата година
Резултатите од спроведената државна матура на 16.700 матуранти годинава се генерално подобрени во однос на резултатите од минатата година.
Ова денеска го соопшти министерот за образование и наука, Никола Тодоров на прес конференцијата на која што беа презентирани прелиминарните резултати од државната матура 2008/2009 година која што годинава се спроведе по втор пат во образовниот процес.
Подобрувањето во однос на минатата година се гледа во тоа дека е работено по иста методологија во однос на поставувањето на праг на положеност и во тоа што оваа година по сите наставни предмети има зголемување на праг на положеност. Во однос на оцените, фреквенцијата каде што оваа година се зголемува процентот на оценки е некаде во средината – тројки и четворки, односно има правилна поставеност на оценките.
Според сегашните резултати добиени од државната матура има 763 или 4,6 проценти – оценка единица, 2,975 или 12,8 проценти се двојки, 6.826 или 40,8 проценти – тројки, 5.373 или 32,1 проценти – четворки и 797 или 4,8 проценти – петки.
Предметот мајчин јазик (македонски, албански и турски јазик и литература) со праг од 42 бода го полагале вкупно 16.734 ученици од кои 763 или 4,6 проценти не го положиле.
Предметот странски јазици (англиски, германски, француски и руски јазик) со праг од 33 бода го полагале 12.175 матуранти од кои 1.103 или 9,1 проценти не го положиле.
Предметот математика основно ниво со праг за положување од 23 бода, го полагале 4,288 ученици од кои 1.035 или 24,1 проценти не го положиле.
Предметот математика напредно ниво со праг од 23 бода го полагале 116 матуранти а 20 ученици или 17,2 проценти не го положиле.
Предметот естетика, кој оваа година за прв пат се воведе во рамки на државната матура во музичките училишта, го полагале вкупно 56 матуранти од кои сите положиле.
Сите ученици положиле и по предметот филозофија кој што се полагаше во училиштето за ликовна уметност.. Предметот го полагале само 15 ученици.
Бидејќи втора година по ред се потврдува дека резултатите по математика се на значително пониско ниво од резултатите по другите предмети кои што се составен дел од државната матура ќе се направи севкупна анализа , посочи директорката на Бирото за развој на образованието, Весна Хорватовиќ.
„Оваа година како институција ќе тргнеме во една поагресивна кампања за обука и стручна помош на наставниците кои што предаваат математика“, рече Хорватовиќ./крај/амп
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Беќаровски навести дека си оди од Токсикологија: Дон Кихот конечно го напушта оклопот
Доктор Нико Беќаровски навести дека ќе си замине од Клиниката за Токсикологија.
Во статус на социјалните мрежи, Беќаровски порача дека е време на приватните клиники да се отвори Одделение за детоксикација и Клиничка токсикологија.
„35 години бев најголем борец за здрав јавен здравствен сектор. Дон Кохот конечно го напушта оклопот. Време е во некоја од приватните болници да се отвори Одделение за детоксикација и клиничка токсикологија. Бројот на консументи на психоактивни супстанции секојдневно расте“, пишува Беќаровски.
Ова се случува откако вчера на прес-конференција заедно со уште пет докторки од Стручниот колегиум на Клиниката за токсикологија јавно ја прозваа економската директорка на Клиниката за токсикологија Бесија Иљази, дека не дозволува вработување на двајца дипломирани биолози и еден болничар. Наместо, тоа, таа инсистира да се вработат осумнаесетмина на кои им истекле договорите за дело, а меѓу нив има лица кои немаат соодветно образование.
Беќаровски кој е раководител на Одделението за интензивна нега на Клиниката рече дека едниот од нив, болничар, вршел притисок врз лаборант- барал урина во која имало наркотици, да биде сменета со урина која е чиста, ама лаборантот не прифатил.
За образованието на Иљази, лекарите не знаат ништо, ниту за познавањето на јазици – со оглед на тоа што македонскиот не го зборува, а Беќаровски се обидел да комуницира со неа на англиски јазик.
Министерот за здравство Илир Демири најави разрешување на медицинскиот директор на Клиниката за токсикологија, д-р Данил Петровски, но не и економската директорка бидејќи немал сознанија за прекршок.
Македонија
Дожд и снег на повисоките места: ЦУК апелира на внимателност поради најавените метеоролошки промени
ЦУК апелира за внимателност заради најавените метеоролошки промени со дожд, со доумерен ветер и со снег на повисоките места.
Кога се оди со возило на планините е препорачливо да се има полн резервоар гориво и да се внимава на лизгавоста и проодноста на патот, велат од ЦУК.
„Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации“, се наведува во соопштението.
Истовремено, ЦУК информира дека е потребно и корисно да се следат препораките и информациите од медиумите за превенција, а и за реагирање при итни случаи.
„Во реонот на автопатот A2 Кичево-Охрид, што е во изградба, во период од 12 до 16 часот ако се слушнат силни детонации, граѓаните да не се вознемируваат, во повеќе наврати ќе се извршат минирања на теренот“, информираат од ЦУК.
Македонија
Странски новинари, преведувачи: вкупно 942 набљудувачи ќе ги следат претседателските избори
Вкупно 942 набљудувачи, странски новинари и преведувачи се акредитирани за следење на Претседателските избори на 24 април.
Како што е објавено на веб страницата на ДИК, заклучно до 19 април, акредитирани се 342 домашни и 568 странски набљудувачи и преведувачи, од кои најбројни се од ОБСЕ/ОДИХР.
Парламентраните избори во земјава ќе ги следат над 2000 домашни и странски набљудувачи.
Изборите за шеф на државата ќе ги следат и странски новинари.
Седмите претседателски избори во земјава ќе се одржат на 24 април, а евентуалниот втор круг заедно со парламентарните на 8 мај.