Македонија
Долга расправа во собраниската комисија за надворешна политика
Долга и жестока расправа со дијаметрално спротивни мислења се водеше попладнево во собраниската комисија за надворешна политика
Долга и жестока расправа со дијаметрално спротивни мислења се водеше попладнево во собраниската комисија за надворешна политика по прашањето за демаркацијата со Косово
Македонија, со демаркација на границата со Косово, ќе добие 160 метри плус во делот кај Ликово поле на Шар Планина со што ќе го добие целото езеро што се наоѓа на оваа област, а кое има хидроенергетски потенцијал.
Ова го објави пратеникот на ВМРО-ДПМНЕ, Александар Николовски на собраниската комисија за надворешна политика по обвинувањата на опозицијата дека со Договорот за демаркација на границата се отстапува стратешки дел од државната територија на Косово.
Со демаркацијата на границата, Косово ќе добие околу 155 метри во месноста Плехниште кај Дебалде, Кодра фура.
Расправата на собраниската комисија за надворешна политика по повеќе од два часа се уште не може да заврши со оглед на расправата на опозициските пратеници.
Пратениците Игор Ивановски, Владо Бучковски и Радмила Шекеринска од СДСМ на комисијата обвинија дека Договорот за физичка демаркација на границата меѓу Македонија и Косово претставува всушност измена на граничната линија повеќе од 150 метри, како што предвидуваат меѓународните стандарди и дека всушност Владата „на шпиунски начин ја менува границата и ги нарушува меѓуетничките односи во државата“.
Опозицискиот СДСМ тврди дека во Анексите приложени со Договорот стои дека не се ратификува само Договорот за демаркација на границата кој во 2001 година, од името на РМ го потпиша претседателот Борис Трајковски, а од тогашната српска страна Воислав Коштуница, туку се менува границата.
Од СДСМ реагираат на тоа дека Договорот не е потпишан од премиерот Никола Груевски, како што тоа досега било вообичаено, како и тоа дека тој го потценува Собранието и Уставот со тоа што не е присутен да го образложи Договорот кој синоќа бил постигнат со косовската страна.
„Владата го прави она што никој досега не го направил на Балканот. Евтина е приказната за хидроцентралата на Шар Планина, вие не ни знаете каде се наоѓа тој потег, таму не може да се постави ни далновод, а не пак да се изгради хидроцентрала. Дебалде и Кодра фура се познати по инциденти и тоа со криминални активности, и треба да ни кажете како во иднина ќе се одрази тоа на безбедносната состојба во државата“, рече во својот говор пратеникот Ивановски.
Бучковски пак, вели дека целиот Договор ќе падне пред Уставниот суд бидејќи Анексот со кој се предвидени измените во граничната линија, треба да оди во процедура како за измена на границата. Според членот 74 Уставот, тоа би значело Собранието да донесе Одлука за промена на границата со 2/3 мнозинство, а потоа истата да добие поддршка од граѓаните на референдум. Според пресметките на опозицијата, Македонија со Договорот прави отстапки за повеќе од 650 метри на македонска територија, па поради тоа бараат составен дел од Договорот да бидат и топографските мапи и аеро-снимки од тој дел.
„Интерес на РМ е да биде затворена границата за отворените прашања кон Косово. Тоа е во интерес на територијалниот интегритет на Македонија и во интерес на европските перспективи на држава, на регионалната стабилност и безбедност, и уште повеќе на внатрешната стабилноста на Македонија. смета Силвана Бонева.
Тоа ќе ги обесхрабри радикалните структури на Балканот кои што мислат дека можат да има промени на границите, додаде Бонева ./крај/кн/амп
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Димитриевски до Пендаровски: Разликата е огромна, откажете се од оваа битка и оставете нè да победиме во вториот круг
Денеска ЗНАМ заедно со сите свои пддржувачи ја испишува новата политичка историја на македонската политичка сцена, рече вечерва претседателскиот кандидат на ЗНАМ, Максим Димитриевски. Иако е јасно дека не влегува во вториот круг, Димитриевски првиот круг од изборите го смета за голем успех.
„Можам да потврдам дека се роди третата политичка сила во македонскиот политички блок во државата која што имаме намера во следниот период дополнително да ја потврдиме и надградиме, со цел еден ден граѓаните да имаат можност да изберат нешто ново“, рече Димитриевски.
На противкандидатите им честиташе за успехот и се заблагодари на можноста да води кампања за која рече дека не била еднаква за сите оти законот кој е во сила не дава еднаква можност за медиумско претставување на сите партии.
Рече дека е горд на секој глас што го добиле како партија регистрирана пред само три месеци.
„Факт е дека јас како кандидат и ЗНАМ освоивме повеќе од 80.000 гласови. Регистриравме субјект кој постои нешто повеќе од три месеци и со граѓанската поддршка се етаблираше на трето место во политичкиот блок. Сметам дека тоа е одличен појдовен резултат за понатамошна борба. Јас не се сеќавам дека во историјата на плурална Македонија имало вакви примери, да имате партија со некаде три и пол илјади членови, а да освоите над 80.000 гласови. Искрено сум горд на секој тој еден глас што дојде, како поддршка за мене и ЗНАМ. И покрај тоа што трендовите се тие, десницата добива, а левицата губи, единствено десницата доживеа пораз во бастионот на асномска Македонија, а тоа е Куманово“, рече Димитриевски.
Порача на сите политичари дека треба да учат од овие избори оти граѓаните дале јасна насока каде сакаат да се движи државата, а посебна порака упати до Стево Пендаровски, кој освои повеќе 100.000 гласови помалку од Гордана Сиљановска-Давкова.
„Почитуван мој претседателе, разликата е огромна. Доколку сакате да опстане централната и левата идеја во државата, откажете се од оваа битка и оставете не да победиме во име на граѓаните во вториот круг“, порача Димитриевски.
Кога ќе завршат парламентарните избори, Димитриевски е уверен дека ЗНАМ ќе биде политички фактор за стабилност во државата без кој нема да може да се формира идната влада. Најави дека кога ќе ги почнат преговорите за формирање парламентарно мнозинство, на сите политички партии ќе им ги испорачаат нивните предлози за црвените линии на македонскиот народ.
Македонија
ДИК: Сиљановска Давкова освои 324 177, Пендаровски 161 393 гласа по обработени 89,97 отсто
Стево Пендаровски освои 161 393 гласа, 19,90 отсто, Гордана Сиљановска Давкова 324 177 односно 39,97 отсто од гласовите, Стевчо Јакимовски освои 7.499 односно 0,92 отсто од вкупниот број на гласовите.
Кандидатот Бујар Османи освои 110 903, односно 13, 68 отсто, Билјана Ванковска 35.949 односно 4,43 отсто од гласовите, Арбен Таравари 78.110 илјади односно 9,63 отсто, Максим Димитриевски 70,996, односно 8,75 отсто од гласовите се резултатите од обработените 89,97 отсто од гласовите, извести претседателот на Државната изборна комисија, Александар Даштевски.
Тој додаде дека изборниот процес поминал мирно и достоинствено и смета дека 99 отсто работите поминале како што треба.
Македонија
Касами: Добитници на овие избори сме ние, ДУИ има купено гласови
„Влен“ е легитимен претставник на Албанците и ги доби гласовите на Албанците, изјави Билал Касами на прес конференција.
„Добитници на овие избори сме ние, коалицијата „Влен“. ДУИ има купено гласови од загрозените гласачи кои имаат потреби од пари. „Влен“ ги доби гласовите на Албанците, вели Касами.
„ДУИ го загуби последниот легитимитет да зборува во име на Албанците, затоа на 8 мај ние ќе победиме. Овој резултат и во мандати не е голема разлика со ДУИ и на 8 мај овој резултат ќе биде во наша полза. ДУИ успеа да ја загуби последната можност, еден кандидат Албанец да биде избран на директни избори во 2024 година. Тие ќе бидат запишани со црни букви во историјата на албанскиот народ во Македонија. Ако биле заинтересирани Албанец да оди во вториот круг сигурно ќе беа координирани со нас и ќе беше возможно да биде избран Албанец. Затоа мислиме дека вредеше оваа борба“, рече Касами.
Тој се заблагодари на сите што го гласаа кандидатот Арбен Таравари и додаде дека ДУИ има изгубено гласови од помалите етнички заедници и од загрозените граѓани.
Таравари кажа дека коалицијата подоцна ќе разговара за тоа кому ќе ги даде гласовите во вториот круг на претседателските избори.