Апасиев ја објави отфрлената пријава за закана: „Да собираме пари за погреб на Апасиев“, „смрт“, „бензин и кибрит“ за Обвинителството биле политички говор

Претседателот на Левица и пратеник Димитар Апасиев објави дел од списите од предмет во кој, како што наведува, пријавил повеќе закани по неговиот живот, тело и семејство, но Основното јавно обвинителство Скопје ја отфрлило пријавата.

Апасиев го објави случајот како споредба со неодамнешното постапување на институциите по заканата упатена кон премиерот Христијан Мицкоски – „Свињо, ќе те колам на плоштад“, за која беше поведена итна постапка.

Апасиев посочи дека заканите кои ги добивал во пораки и коментари следувале по негово телевизиско гостување, а меѓу нив биле и:

„Лек за тебе е бесилка“, „За тебе само бензин и кибрит“, „Куќа ти горела, деца ти се радујеле“, „Иначе, тебе знаеме што ќе ти правиме“, „Ќе јадеш тежок ќотек по муцки“, „Смрт за ваквите“, „Вахабиите жена ти да ти ја е*ат“, како и повик да се собираат пари за негов погреб.

Тој наведува дека станувало збор за пораки од радикални и екстремистички религиозни структури, но дека тие не биле доволни за ОЈО Скопје да поведе кривична постапка.

Во прилог на објавата, Апасиев објави и фотографија од образложението на решението на ОЈО Скопје.

Во решението, меѓу другото, се наведува дека како основ за коментарите биле изјавите на оштетениот објавени на повеќе социјални медиуми, поврзани со политичките случувања во државата, како и фактот дека во тој период бил активен политичар, пратеник и лидер на политичка партија.

„Наоѓам дека истите претставуваат политички говор, односно може да бидат сместени во категоријата на политичка дебата, во однос на која праксата на Европскиот суд за човекови права дозволува многу пошироко поставени лимити за критицизам“, се наведува во објавениот документ.

Во продолжение, обвинителството оценило дека, иако коментарите биле „непријатни за читање, навредливи“ и претставувале „агресивна и нецелосно урамнотежена критика и напад врз политичките ставови на оштетениот“, тие не можеле да бидат ограничени кога станува збор за политички говор.

Во решението се наведува и дека пријавените „очигледно не ја злоупотребиле својата слобода на изразување со ширење на говор на омраза“, како и дека не биле исполнети условите за примена на казнено-правни рестрикции на слободата на изразување.

Апасиев преку објавата го проблематизира „различното институционално постапување во двата случаи, поставувајќи ја дилемата зошто пораки во кои се споменуваат бесилка, палење, смрт, физички напад и погреб биле третирани како политички говор, додека заканата кон премиерот довела до кривично гонење и притвор“.

Објавата ја наслови „Колење vs бесилка“, повикувајќи ја јавноста сама да ги спореди двата случаи и да процени кои закани се посериозни, но и за селективноста.