Батериските системи во фокусот на стручниот придонес на ФЕРО ИНВЕСТ на „ЕНЕРГЕТИКА 2026“

Батериските системи во фокусот на стручниот придонес на ФЕРО ИНВЕСТ на „ЕНЕРГЕТИКА 2026“

Инженерите на ФЕРО ИНВЕСТ со стручен труд и учество на панел-дискусија за интеграцијата и значењето на батериските системи во современата енергетика

ФЕРО ИНВЕСТ и ЕМС (Energy Maintenance Solutions) учествуваа на Меѓународната конференција „ЕНЕРГЕТИКА 2026“ на ЗЕМАК во Струга, каде дел од стручниот придонес на компаниите беше насочен кон една од најактуелните области во енергетиката – батериските системи за складирање на електрична енергија и нивната интеграција со производството од обновливи извори.

Во рамките на конференциската програма, Стефани Георгиевска, електроинженер во Секторот Солар во ФЕРО ИНВЕСТ, го презентираше стручниот труд „Интеграција на систем за складирање на електрична енергија во фотоволтаична централа – техничка и економска анализа“.

Трудот беше базиран на конкретен проект реализиран од ФЕРО ИНВЕСТ – изведена фотоволтаична централа со интегриран батериски систем, и преку практичен пример ја анализираше интеграцијата на батериските системи од два клучни аспекта – технички и економски.

На тој начин беа претставени реални инженерски искуства и податоци од имплементирано решение, особено значајни во услови на зголемено производство на електрична енергија од обновливи извори и сè поголема потреба од нејзино ефикасно складирање и користење во периодите кога е најпотребна.

На темата за батериските системи се дискутираше и во рамките на панелот „Од обновлива кон сигурна енергија: Како складирањето ја менува енергетската иднина“, на кој учествуваше Војдан Андонов, раководител на Секторот Солар во ФЕРО ИНВЕСТ. Во фокусот беа улогата на складирањето на електричната енергија, интеграцијата на батериските системи со обновливите извори и нивното значење за поголема флексибилност и сигурност на електроенергетскиот систем.

ФЕРО ИНВЕСТ во изминатиот период го развива својот инженерски капацитет во областа на батериските системи, со пристап кој го опфаќа целиот процес – од анализа и проектирање, избор и димензионирање на системот, до изведба, интеграција, пуштање во работа, мониторинг и одржување. На тој начин, батериските системи се третираат како интегрален дел од енергетското решение, а не само како дополнителна опрема на фотоволтаичната централа.

На конференцијата ФЕРО ИНВЕСТ и компаниите од групацијата беа претставени и преку изложбен штанд, додека ЕМС (Energy Maintenance Solutions) беше и спонзор на настанот. ЕМС е македонска компанија од групацијата ФЕРО ИНВЕСТ, специјализирана за изведување на енергетски објекти, како и за технички прегледи, испитување, анализа и одржување, обезбедувајќи стручна поддршка во различни фази од нивниот животен циклус.

Со учеството на „ЕНЕРГЕТИКА 2026“, инженерите на ФЕРО ИНВЕСТ беа дел од стручната размена на знаење и искуство за прашања кои стануваат сè позначајни со забрзаниот развој на обновливите извори на енергија и потребата од нивна сигурна и ефикасна интеграција во електроенергетскиот систем.