Бочварски за Тошковски: Партизација на полицијата, политички притисоци и злоупотреби

Пратеникот на СДСМ, Благој Бочварски, на денешната собраниска расправа за интерпелацијата на министерот за внатрешни работи Панче Тошковски, оцени дека по две години мандат ветувањата за професионална полиција, реформи и поголема безбедност останале само празни зборови.

„Министерот Тошковски на самиот почеток на мандатот ветуваше професионална и ефикасна полиција, реформи, зголемување на безбедноста и довербата на граѓаните. Понатаму професионални критериуми за унапредување кои би се темеле на образование, искуство, способности и без политички критериуми“, истакна Бочварски.

Тој посочи дека наместо најавените реформи, биле донесени законски решенија кои отвораат простор за политички влијанија и партизација во полицијата.

„Се обидувавте преку принципи кои не доликуваат на земја која тежнее да се приклучи кон Европската Унија и земја членка на НАТО, да го нарушите принципот на кариерен систем, закон кој сериозно создава простор за политички влијанија и партизација на полицијата по примерот на периодот до 2017 година“, нагласи Бочварски.

Тој потсети дека и експертите, синдикатите и професионалната јавност предупредувале на ризици од политизација, намалена транспарентност и нарушување на мерит-системот во Министерството за внатрешни работи.

Бочварски оцени дека во изминатиот период граѓаните биле сведоци на сериозно нарушување на безбедносната состојба во државата.

„Во периодот на изминативе години јавноста беше сведок на серија убиства, обиди за убиства, вооружени престрелки и други тешки кривични дела кои создадоа чувство на несигурност кај граѓаните“, рече тој.

Дополнителна загриженост предизвикуваат сомнежите за оддавање службени тајни, аферите поврзани со лица од највисоките државни кругови, како и случаите кои отвораат прашања за ефикасноста на внатрешната контрола во МВР.

Во своето обраќање Бочварски посочи и на утврден случај на дискриминација врз полициска службеничка поради политичко уверување.

„Независна државна институција официјално констатирала дискриминаторско постапување во рамки на МВР, што отвора прашања за политички притисоци, непочитување на еднаквиот третман на вработените и одговорноста на раководните структури во Министерството“, истакна Бочварски.

Тој се осврна и на случаите на сквернавење на државното знаме, при што оцени дека реакцијата на институциите била бавна и недоволна.

„Министерството за внатрешни работи има обврска да обезбеди еднаква примена на законите без разлика на политичката, етничката или другата припадност на сторителите. Секое отстапување од овој принцип ја поткопува довербата во институциите и создава чувство на нееднаквост пред законите“, нагласи Бочварски.

Дополнително, тој предупреди и на драматичниот пораст на случаите на семејно насилство, оценувајќи дека превентивните политики и кампањи целосно изостанале.

Бочварски посочи и на намалувањето на развојните програми, капиталните инвестиции и средствата за Центарот за обука во МВР, што според него е спротивно на ветувањата за модернизација и професионализација на полицијата.

„Развојните програми се намалени за 29 проценти, Центарот за обука за 40 проценти, а капиталните инвестиции за над 22 проценти. Тоа покажува дека развојот и инвестициите се намалуваат и дека нема сериозни политики за реформи во полицијата“, рече Бочварски.

Пратеничката група на СДСМ и коалицијата, како што нагласи тој, ќе ја поддржи интерпелацијата на министерот Тошковски поради сериозните пропусти во работењето и бројните скандали.