Денеска во Виена имав можност да се сретнам со нашите сограѓани од македонската дијаспора, истакна во објава на социјалните мрежи премиерот Христијан Мицкоски.

Соопшти дека било разговарано отворено за предизвиците, но и за можностите што ги имаме како што рече, како држава.

„Посебно ја истакнав важноста од продолжување и продлабочување на пријателските односи со Австрија. Блискоста меѓу нашите земји е јасна, а таа треба да ја претвориме во уште поголема економска соработка и нови инвестиции.
Испратив порака до нашите луѓе во дијаспората, тие се нераскинлив дел од Македонија. Ги повикав да размислат за враќање, за инвестирање и за активно вклучување во развојот на државата. Како Влада, работиме посветено да создадеме стабилна и предвидлива бизнис-клима, која ќе ги охрабри таквите чекори“.

Овие средби, вели Мицкоски, се важни затоа што градат заедништво и доверба.

„Убеден сум дека само заедно, со поддршка од дијаспората и со силни меѓународни партнерства, можеме да ја движиме државата напред.
Работиме посветено, чекор по чекор, со јасна цел економски развој и подобар живот за сите наши граѓани“.

„Нели ви е преку глава од дволичноста и двојните стандарди на „големите“ партии? Законот треба да важи еднакво за сите! Како што важи за претседателот на државата, за јавниот обвинител, за амбасадорите – така да важи и за сите избрани и именувани лица. Без исклучок. Од денес“, пишува во објава на социјалните мрежи претседателката на Либерално-демократската партија (ЛДП) и пратеничка во Собранието, Моника Зајкова.

„Еве, нека немаат двојно државјанство и пратениците, и министрите, и директорите – сите. И тоа да важи за сегашните, без одлагање“, додава Зајкова.

Таа бара да се направи увид и доколку некој во моментот кога стапил на функција имал двојно државјанство, веднаш да си поднесе оставка.

„Воедно, пратениците-предлагачи нека побараат оставки од сите министри кои евентуално имаат или имале двојно државјанство во моментот на изборот. Како до вчера било во ред, а сега не е. Или ќе го држат ставот до крај – или ќе бидат обвинети од јавноста за ДВОЛИЧНОСТ. Еве, јас волонтирам – нека почне од моето државјанство. Подготвена сум да заверам изјава пред нотар дека не сум имала друго државјанство“, пишува Зајкова и ги повикува своите колеги пратеници и функционери истото да го направат со проверка и на нотар.

Во четврток ќе се бира нов директор на Македонската радио телевизија, а човекот кој Мицкоски и ДПМНЕ очекуваат да биде избран е Зоран Ристоски, долгогодишен сопственик на маркетинг агенцијата „Греј World Wide” која добива тендери од Државна лотарија, велат од Левица.

Оваа партија предупредува дека изборот на Ристовски за директор на МРТ значи директно политичко влијание во јавниот сервис.

„МРТ е најголемиот плен на политичко-медиумската мафија“ вели Амар Мециновиќ од Левица, додавајќи дека со години јавниот сервис има исто раководство „кое го има претворено во бунар без дно за приватни копродукции и приватни маркетинг агенции“, посочувајќи дека дури и метео-програмата е во приватна копродукција.

Според него 80 отсто од програмата е копродукција што значи дека „МРТ обезбедува камери, луѓе и сите други услови, а продуктот е во сопственост на приватни субјекти, на кои потоа им се плаќа за емитување“ и додава дека токму заради овој конфликт на интерес, во статутот на Програмскиот совет, кој треба да го избере новиот директор, се вели дека тој не смее да биде сопственик на маркетинг агенција.

„Но, сега на овој конкурс имаме човек кој ќе биде избран за директор на МТВ, кој до 1 март бил сопственик на приватната маркетинг агенција „Греј World Wide”. Овој човек треба да ги однесе директно парите од копродукциите и од зделките во МТВ директно до Мицкоски. Тој човек се вика Зоран Ристовски. Маркетинг агенцијата „Греј World Wide” со години добива тендери од озлогласената Државна лотарија за истата да се рекламира преку нив“, вели Мециновиќ.

Од Левица го отвараат и прашањето за начинот на рекламирање на Државна лотарија и прашуваат зошто таа би се рекламирала на небитни и непосетени сајтови. „Ако на пример посетиме еден небитен сајт за кој најверојатно немате чуено, попара точка мк, ќе видите дека на самиот хоумпејџ на сајтот има безброј банери и реклами за Државна лотарија. Зошто државна лотарија би се рекламирала на сајт на кој нема посетители? Одговорот веројатно лежи во поврзани фирми и интереси“, вели Мециновиќ, образложувајќи дека ако малку подлабоко се истражи ќе се дојде до заклучок дека овие сајтови се меѓусебно поврзани зашто на нивните страни или фигурира сопственик со исто презиме како Зоран Ристоски или имаат ист домејн кој го има тековната состојба на „Греј World Wide”.

Левица со повик до граѓаните активно да се вклучат и да извршат, како што велат, притисок врз Програмскиот сервис на МРТ, кој е надлежен за изборот. „Граѓаните да побараа независен директор на јавниот сервис преку обраќање до програмскиот совет на мејл [email protected], со цел да се направи правилен и независен избор“, вели Мециновиќ во повикот.