Македонија
Димитриев: Македонија заслужува развој и просперитет
Македонија заслужува развој и просперитет и ваквите заложби мораат да бидат исполнети, а за тоа сме одговорни пред историјата, пред нас самите, но и пред следните генерации на кои ја оставаме Република Македонија, порача премиерот Емил Димитриев во говорот на Мечин Камен, крај Крушево, по повод националниот празник 2-ри Август – Илинден.
Премиерот кој годинава говореше на централното одбележување на големиот македонски национален празник исто така порача дека е неопходно национално единство наместо надворешни мешања во земјата, како и оти граѓаните сакаат дела а не деструкција.
„Денеска ги одбележуваме двата Илиндена и оддаваме почит како на илинденската генерација, така и на асномската генерација. Денеска Македонија и Македонците секаде во светот одбележуваат 113 години од Илинденското востание и 72 години од АСНОМ, датуми чија тежина создава одговорност и кон нашите предци и кон нашите идни генерации, а за Македонија, одговорноста треба да биде најголема, посветеноста – најсилна, работливоста – беспоштедна, а духот – нескршлив“, рече премиерот Емил Димитриев
„Денешниот голем празник нé потсетува на минатото, но и нé поттикнува да размислуваме за иднината на нашата држава. Значајноста и тежината на делата на илинденската и асномската генерација ја создаваат одговорноста на нашата генерација за иднината на државата. Тоа е одговорност и кон нашите предци и кон нашите идни генерации. Одговорност која сама посебе носи многу значајна тежина, затоа што кога станува збор за Македонија, одговорноста треба да биде најголема. Само така, и со силно единство наместо со надворешно мешање, можеме да продолжиме да чекориме по патот на развој и просперитет на нашата татковина и да го исполниме аманетот на нашите предци за борба за Македонија“, рече Димтриев.
Повика на единство на сите расположливи капацитети во државата во процесите за развој и просперитет на татковината.
„Затоа, денеска од Мечкин Камен повикувам на добра мисла и добра намера, на единство на сите расположливи капацитети во државата во процесите за развој и просперитет на нашата татковина… Обединување на сите Македонци, Албанци, Турци, Роми, Срби, Власи и Бошњаци, на сите христијани и муслимани, бидејќи ова е наша држава. Бидејќи ова е држава на нашите деца и внуци. Повикувам на искрено единство кога станува збор за државните интереси и државните приоритети, кои никогаш не смеат да бидат ставени зад партиските приоритети или личните желби на некој политичар или група на луѓе. Повикувам на конструктивност на секој фактор и ја осудувам деструктивноста која некој сака да ја наметне како систем на делување. Ние сите треба да градиме, да создаваме дела и вредности, а поривот за рушење и критика на се, треба да биде потонат и енергијата да ја фокусираме на спроведување на реални проекти кои го подобруваат секојдневието на граѓаните“, апелираше Димитриев.
Ваквиот таков пристап и искрената волја, оцени премиерот, се особено потребни во овие моменти кога државата подолг временски период е вовлечена во политичка криза од која порача дека земјата мора да излезе посина.
„Оваа политичка криза не му одговара никому што ѝ посакува добро на државата и таа создава одредена несигурност кај граѓаните која се рефлектира, како на секојдневното живеење, така и во стопанството. Политичката криза не може и не смее да биде период кој ќе трае во недоглед и кој ќе нанесува штетни последици за државата, како дома така и во странство. Затоа, треба да покажеме добра волја и свесност за излез од политичката криза, покажувајќи со тоа и свесност и желба за враќање на државата во нормалниот колосек и целосно посветување на работа насочена кон реализација на проекти и дела во интерес на граѓаните. Кон целосно фокусирање на решавање на проблемите на граѓаните, но и кон целосно посветување на исполнувањето на нашиот врвен приоритет за целосна интеграција во НАТО и Европската Унија, односно добивањето на полноправно членство во НАТО Алијансата и отпочнување на пристапните преговори за членство во ЕУ, за што имаме и политички консензус и доволно сработено и реализирани реформи и докажани капацитети“, смета Димитриев.
Од тие причини, како што рече, од Мечкин Камен упатува апел за свесност и совесност во процесот на разрешувањето на политичката криза и излез од неа, во кој единствен приоритет треба и мора да бидат државните интереси и интересите на граѓаните.
„Таквиот излез од наметната политичка криза е единствено возможен со одржување на избори на кои граѓаните на Република Македонија ќе донесат одлука која секој политичар и секоја политичка партија мора да ја почитува. Бидејќи тоа е вредноста на демократијата. Бидејќи така е секаде во светот и така мора да биде и тука. Волјата на народот е најсилна и секој политичар мора истата да ја почитува. Народот никогаш не греши и секогаш е во право. Негирањето на волјата на граѓаните, секој обид за сомнеж во одлуките на народот во обид за прикривање на сопствените слабости и порази претставуваат израз на непочитување на граѓаните и сериозен израз на недемократско однесување“, додаде премиерот.
Претседателот на македонската влада изрази силно уверување дека одржувањето на фер и демократски избори ќе стави крај на долгата политичка криза
„Ве уверувам, дека како Влада ќе направиме сé што е во наша надлежност изборите да бидат фер и демократски, целокупниот изборен процес да се одвива според сите меѓународни стандарди, а изборната кампања да помине во одлична демократска атмосфера. Како држава, додаде, имаме капацитет за такво нешто и тоа сме го покажале на претходните изборни циклуси и можеме да го покажеме и сега, и нема причина и не смее да биде поразлично оти тоа не е во корист на секој што ја сака оваа држава“, рече Димитриев
Истакна дека за текот на изборната кампања и начинот на нејзиното реализирање од исклучителна важност е улогата на политичките партии за кои се надева и очекува наместо кампања базирана на навредувања и подметнувања ќе бидат концентрирани на водење кампања којашто ќе почива на проекти и дела, на реална политичка понуда на проекти, на програма и на кредибилитет за исполнување на ветувањата.
„Ова го велам затоа што нашите граѓани сакаат од политичарите да видат проекти и дела, да видат доследност, но и работливост за подобрување на состојбите во секоја област и во секој регион. Само така се добива довербата од нашите граѓани кои секогаш знаат добро да проценат и лично да одлучат на кого ќе ја дадат довербата и поддршката. Нашиот народ многупати досега ја покажал својата мудрост и својата свесност и затоа не се сомневам дека и при излезот од политичката криза нема да биде така. Нашиот народ, граѓаните на оваа држава се тие кои одлучуваат за Македонија! Никој не смее да ја негира волјата на македонските граѓани, бидејќи Македонија е на сите граѓани! Бидејќи Македонија е нашата татковина и татковина на нашите поколенија“, рече премиерот Димитриев.
Посочи дека и во моменти на политичка криза и соочување со глобални безбедносни ризици, земјата и натаму е насочена на реализација на програмата која е базирана на изборните ветувања, меѓу нив и намалување на невработеноста и отворањето на нови работни места.
„Историски најниското ниво на невработеност од 24,5 отсто кое го постигнавме оваа година, претставува доказ дека посветената долгогодишна работа вродува со резултат. Падот на невработеноста за 13,5 отсто во однос на минатото кога истата изнесуваше огромни 38 отсто, е доказ дека имаме сила, знаење и енергија за подобрување на економскиот стандард на граѓаните. Дека Македонија може успешно да се справува со предизвиците и дека имаме сила за добри резултати. Тоа е доказ дека борбата за нови работни места покажува резултати. Тоа е борбата на нашата генерација, за работа за секого, како чекор кон обезбедување на повисок стандард и плати за населението. За тоа говорат илјадниците ново отворени места во технолошко-индустриските развојни зони во кои работат странските компании, кои препознавајќи ги одличните услови за инвестирање дојдоа во нашата држава и изградија свои фабрики, и вработувањата во домашните компании“, рече Димитриев
Во тој контекст изрази увереност дека по надминувањето на поплитичката криза и по одржување на предвремените парламентарни избори, државата треба да влезе во помирни води и да почне да обезбедува нов циклус реформи, проекти, на задоволување на потребите на секој граѓанин.
„По изборите, мора и ќе продолжиме со силно темпо на секој дел од теренот, на уште повеќе капитални инвестиции и градежни проекти кои на оваа држава и носат нови патишта и булевари, нови железнички пруги, нови спортски објекти, училишта и градинки, нови здравствени установи, нови театри и музеи, голема раздвиженост во градежниот сектор, многу работа за нашите компании и секако нови работни места во истите. Само така, градејќи ја Македонија ја градиме иднината на нашата држава. Реализираме и ќе реализираме проекти кои остануваат трајни вредности за македонските граѓани. Градби кои се капитал на државата“, рече премиерот Димитриев.
Притоа заклучи дека досега реализираното повеќе од доволно зборува за тоа дека граѓаните поседуваат капацитет и енергија да ја направат Македонија силна држава.
„Затоа што, додаде, ние не се штедиме и работиме многу затоа што само работата, трудот и посветеноста и одговорниот пристап, како и исполнетите ветувања ја прават разликата“, порача Димитриев./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Османи: Европскиот фронт е голема идеја чие време е дојдено
Кандидатот на Европскиот фронт, Бујар Османи, вечерва на митинг пред граѓаните на Кичeво изрази благодарност до лидерите на Европскиот фронт и коалицијата која, како што вели Османи, е продолжение на битките во континуитет една по една, за разбивање на замоците на етничките монополи.
„Европскиот фронт не е политичка партија. Европскиот фронт не е ни коалиција на политички партии, Европскиот фронт е голема идеја. Тоа е одлична идеја чие време дојде, лавина што ги собра соништата на секој граѓанин на оваа земја, за еднаквост, за правда и просперитетен живот во ЕУ. И ова го гледам како ентузијазам, како насмевка во секое населено место каде што одам, бидејќи Европскиот фронт е трета унија, но сега со малку поинаква димензија“, истакна Османи.
Кандидатот на Европскиот фронт, Османи понатаму истакна дека останува уште едена последна тврдина на етничкиот монопол.
„Тврдината која нè загрижува сите и секогаш ни го дава тој сигнал дека се уште не е сè како што треба, сè уште нема еднакви можности за сите, таа е тврдината на првиот претседател. Значи, браќа и сестри, се натпреварувам, на 24 април да ја разберете тежината на оваа мисија, дека вашиот глас не е само за мојата кандидатура, вашиот глас, вашата поддршка е за да ја разбиете последната тврдина на етничкиот монопол и за заокружување на еднаквоста на сите заедници во нашата заедничка држава“, заклучи Османи.
Македонија
Таравари: Ќе ја вратиме некогашната репутација на Куманово и Липково
Ќе ја вратиме некогашната репутација на Куманово и Липково. Ќе го поврземе Куманово со Гњилане и Прешево, ќе инвестираме во агробизнис, грантови и земјоделци Ќе ги поврземе Куманово со Гњилане и Прешево, ќе инвестираме повеќе во агробизнисот, во грантови за земјоделците и во економски развој за да ја вратиме некогашната репутација на земјоделството и производството на регионот на Липково и Куманово. Ова беа дел од пораките кои претседателскиот кандидат Арбен Таравари ги испрати вечерва од општина Липково. Оваа општина ја донесе ДУИ на власт а како награда добива само штета, неправда и лошо владеење.
„Наместо да се привилегира и развива овој регион кој некогаш важеше за кризен регион, лошото владеење на ДУИ го втурна во повеќекратни кризи. Економска и земјоделска криза, невработеност и миграциска криза, но и безбедносна криза и монтирани случаи. Никој повеќе од жителите на овој крај не ги почувствувал последиците од лошото владеење на ДУИ“, нагласи Таравари во својот говор.
Но, според него, оваа состојба ќе заврши со гласот на самите граѓани, кој ВРЕДИ и ќе ја донесе долгоочекуваната промена.
„Ќе донесеме повеќе правда, прво за политичките монтирани случаи, каде што ќе се заложиме за правда и обештетување за оние Албанци кои неправедно се држат во затвор. Никогаш не го забораваме војникот на слободата и жител на овој крај, Реџаил Ќерими, кој неправедно беше држен во затвор 13 години и почина во ќелијата кога отворено се знаеше дека нема врска со она за што го обвинуваа, изјави Таравари.
Меѓу другото, Таравари од Липково повтори дека со доаѓањето на ВРЕДИ на власт ќе се забрани коцкањето, а ќе се простат и долговите од фирмите за брзи кредити кои исто така рече дека ќе се затворат.
Македонија
Кои се седнатите на софра со најголемите криминалци од Грчец, Шиша бар, со оние од убиствата во Ханиоти, прашува Силјановска-Давкова
Ги нема сликите низ весниците кои се најдобар доказ, бидејќи сликите понекогаш повеќе кажуваат од зборовите, за тоа кој е кој во ова корупциско и криминално гнездо, вели професорката Горданa Силјановска -Давкова вечерва од Велес.
„Колку претседатели сте виделе, колку премиери сте виделе, колку министри за внатрешни работи сте виделе седнати на софра со најголемите криминалци од Грчец, Шиша бар, со оние од убиствата во Ханиоти? Може да се сликате со некого на улица, ама на софра да бидете тоа значи дека сте во спрега. Значи, во право е претседалот на ВМРО-ДМПНЕ кога вели дека, не само со чинење, не само со криминални активности, туку и со замижување пред криминалот и корупцијата вие сте соучесник во нив, посочи Силјановска Давкова и додаде:
„Во овие избори има нешто специфично, до ѕидот сме доведени. Вие заслужувате власт соодветна на вашето достоинство, власт од којашто нема да се плашите и срамите, туку ќе се гордеете“, порача вечерва од Свети Николе, кандидатката за претседател на државата, поддржана од ВМРО – ДПМНЕ и коалициските партнери