ДУИ: КК Чаир добил 3,6 милиони денари, Изет Меџити да каже каде завршиле овие пари

Откако Изет Меџити го презеде раководењето со Општина Чаир, еден по еден пропаѓаат клубовите кои со години беа спортска гордост на Чаир, велат од ДУИ.

„Првиот и најдраматичен случај е ФК Шкупи. Клуб кој пред само неколку години беше шампион на Северна Македонија, настапуваше во европските натпреварувања и беше гордост на Чаир, минатата сезона заврши на дното на табелата и испадна од Првата лига. Од шампион, до испаѓање од лигата“, велат од ДУИ.

Паартијата обвини дека сега истото се случува и со кошарката.

„Кошаркарската федерација соопшти дека КК Чаир не ги исполнил финансиските обврски за лиценцирање и нема да биде дел од Суперлигата во сезоната 2026/2027. Според објавените информации, КК Чаир го имал најмалиот долг од трите клуба кои првично не добиле лиценца. Другите два клуба ги подмириле обврските и ја обезбедиле лиценцата. Чаир не. И токму тука Изет Меџити треба да им даде одговор на граѓаните. Само во текот на 2026 година, Општина Чаир му доделила на овој клуб 3.600.000 денари јавни пари. Покрај овие средства, клубот имал и други извори на јавно финансирање. Лицето поврзано со управувањето на клубот истовремено е вработено во администрацијата на Изет Меџити и имало одговорности токму во областа на финансиите“, велат од ДУИ.

Тврдат дека милиони денари се доделени на клубот, а на крајот, клубот не успева да ги плати обврските потребни за да ја задржи лиценцата.

„Затоа бараме одговори: Колку пари вкупно добил КК Чаир од Општината и од другите институции? Каде завршија 3,6 милиони денари доделени само оваа година? За што се потрошени? Колкав бил долгот кон Федерацијата кој не бил платен? И како имало милиони денари за клубот, а немало пари за да се спаси неговата лиценца? Изет Меџити треба да одговори и кој го контролирал начинот на кој се користеле овие јавни средства, кога лицето поврзано со клубот истовремено е дел од администрацијата која се занимава со финансиите“, велат од ДУИ.