Македонија
Груевски: „Бомбите“ дополнително не созреаја
Надворешната политика на земјава, отворањето на нови работни места, економијата, „бомбите“ на опозицијата , проектот „Скопје 2014“ како и победите и слабостите на ВМРО-ДПМНЕ беа дел од темите во говорот на единствениот кандидат за претседател на ВМРО-ДПМНЕ и премиер, Никола Груевски кој во сабота се обрати пред присутните делегати на Конгресот на партијата којшто викендов се одржува во Куманово во Центарот за култура „Трајко Прокопиев“.
Како еден од најголемите предизвици со коишто се соочила партијата во годините на власт, Груевски го истакна противењето на Грција за влез на Македонија во Европската Унија и НАТО, но сепак потенцираше дека ЕУ и НАТО остануваат стратешки интерес за Македонија.
„Фрустрирачки е да се зборува за ова во кое е содржана голема неправда. Сепак, ние не се откажуваме и ќе продолжиме да бараме начин да ја оствариме целта. ВМРО-ДПМНЕ нема да прифати промена на Уставот со цел промена на уставното име, нема да прифати идеи и предлози кои ќе го нарушат македонсиот национален идентитет, македонската нација и македонскиот јазик“, рече Груевски.
Во својот говор Груевски уште еднаш го кажа ставот на партијата дека „бомбите“ коишто ги објавува опозицијата, односно објавувањето на аудио снимки од разговори на високи функционери на Владата кои според опозицијата го докажуваат криминалното работење на власта, се монтирани, лепени и сечени.
Тој побара да се спроведе транспарентна истрага за обвиненијата коишто и се ставаат на товар на опозицијата, но побара истрага и за обвинувањата на опозиција кон власта.
„Нашиот став е да има истрага и за нивните прекршувања на законите, но и за она за што нас не обвинуваат. Ние сакаме да има истрага, ако во таа истрага се покаже дека некој од нас нешто погрешил, нека одговара во таа истрага. Ние ќе постапуваме европски, иако баш ваков случај нема во Европа каде што шефот на опозицијата со месеци пушта нелегални материјали, а голем број на медиуми ги објавуваат“, рече Груевски.
Но, партијата сепак и од овие „бомби“ извлекла поука и биле лекција особено за оние функционери од власта кои се опуштиле и по толку години на власт почнале да мислат дека вечно ќе владеат. Уште еднаш повтори дека лидерот на опозицијата, Зоран Заев, снимките ги добил од странска разузнавачка служба и дека го искористеле единствено за нивно пласирање во јавноста.
„Овие бомби, независно колку разговорите се монтирани, лепени и сечени, сепак, многумина од нас подлегнаа, ни ги збија редовите, не потсетија дека нема време и простор за опуштање, дека колку и да е слаба опозицијата секогаш има некој што може да нападне со силно оружје колку и да е тоа нефер или недозволено. Бомбите дополнително не созреаја и не направија поконцентрирани за да му служиме на народот. Ова е за сите нас корисна лекција, подобро скокање во ладна вода сега кога не сме се опуштиле, отколку да добиевме ладен туш од граѓаните на следни избори“, истакна Груевски.
Старо –новиот лидер на ВМРО-ДПМНЕ, индиректно најави промени во партијата велејќи „тимот кој победува не се менува, но дел од играчите кои се замориле, треба да се одморат некое време“. Рече дека имало забелешки на работата на третиот ешалон и најави „нов бран 2015“.
По „бомбите“ во коишто опозицијата тврди дека се „местеле“ судски одлуки, Груевски уверува дека според новите закони кои стапиле на сила во јули 2014 година нема простор за никава ургенција.
Судиите треба да ги положат испитите за запишување на Академија на судии и обвинители, кој по новиот закон е единствена можност за да некој во иднина стане судија или обвинител.Според него, за воопшто некој да се запише на Академијата, треба како предуслов да има додипломски и посдипломски студии по право со минимум просек 8, правосуден испит и одреден број години работен стаж како правник, па дури потоа, да дојде и по оваа методологија да ги полага испитите и не само да положи на испитите туку и да биде во највисоко рангираните.
Учинокот на судиите, нагласи Груевски, сега се мери со бодови кои доаѓаат од квалитетот на пресудите, односно колку од пресудите паднале или не или биле преиначени на повиок суд, и од квантитетот, т.е. бројот на решени предмети, со тежински фактор за сложеноста на секој судиски предмет.
„Во секој момент, секој судија си ги знае сопствените бодови, но и бодовите на своите колеги.Тие се јавни и транспарентни и лесно проверливи. Тој што поминал пет години во основен суд, а има најмногу бодови на ранг листата, може да конкурира и да премине во апелациски суд, ако таму се ослободи место.Секој еден од апелациски суд кој поминал најмалку 4 години таму, и е прворангиран, штом се ослободи место во врховен суд може да премине во врховен суд. Кога ќе истече мандатот на претседател на некој суд, новиот претседател е оној кој има најмногу бодови. Кратко и јасно. Каде е тука просторот за ургенција или влијанија? Го нема, се е јавно и транспарентно.И не само тоа, овој закон веќе и се применува, и наредните назначувања на претседатели на судови или на унапредувања, можат да бидат само по овие правила“, додаде Груевски.
Во својот говор Груевски се осврна и на слабостите и грешките на неговата партија и најави посебен тим кој ќе работи на спроведување на програмата на партијата.
„Во врска со Скопје 2014 можеби наша грешка е што сакавме да направим се одеднаш што е пропуштено. Овој проект за среќа има многу повеќе поддржувачи отколку противници, но сепак се чини дека премногу се завлече. Во делот на спомениците ни остана уште споменикот на Мајка Тереза кој ќе се финансира со буџетски средства“, рече Груевски.
Како слабост на партијата и власта го посочи и брзото менување на законите како и недостигот на имплементација.
„Следна слабост која треба да ја менуваме е пребрзо и пречесто менување на законите, но тоа е затоа што нашата програма беше многу динамична, обемна и амбициозна. Друга слабост е што понекогаш спроведувањето на законите не беше до кра.ј Јас креирав тим за проверка на спроведување на програмата“, додаде Груевски.
Според него, партијата треба повеќе да се отвори кон различните етнички заедници и да има повеќе народности во органите на управување и во самата партија.
Тој ги спомена и реформите во образование и порача дека средношколците и студентите не треба да се користат во политички цели. Ги прекори родителите на средношколците што потпаднале под влијание на своите деца, кои барале да не полагаат математика за матурскиот испит, а со тоа им правеле лоша услуга на сопствените деца.
Наставниците и професорите критичари на реформите во образованието, рече дека сакале да истуркаат политичка агенда под превозот дека се борат против лошите реформи в образованието.
На Конгрсот се обрати и министерот за образование и наука, Абдулаким Адеми и член на ДУИ, албанскиот коалиционен партнер на ВМРО-ДПМНЕ во Владата кој рече дека меѓу коалиционите партнери има квалитетна соработка.
Груевски најави дека со новиот закон за администрација ќе бидат одбрани само најкомпетентните кандидати и најави нови 20.000 работни места во Куманово со проектот „Македонија вработува“.
Конгресот се одржува под мотото „Силна Македонија – стабилност, работни места, доверба и перспектива“.
Во првиот дел од Конгресот Груевски се обрати пред присутните 523 од вкупно 560 делегати, гости и претставници на партиите од владеачката коалиција.
Вториот дел од денешниот настан ќе биде затворен за јавноста, при што се најавува дискусија за функционирањето на партијата во изминатите четири години, за моменталната политичка ситуација во земјава, како и за курсот на ВМРО-ДПМНЕ во наредниот период.
Гласањето за лидер на партијата е дестета точка од дневниот ред и ќе се реализира во недела кога се очекува Груевски по четврти пат да биде избран за лидер на ВМРО-ДПМНЕ./крај/мф
Извор: Фото: Утрински весник
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.