Македонија
Јанкулоска: Не сакам да коментирам незаконски прибавени материјали
Министерката за внатрешни работи, Гордана Јанкулоска по речиси еден месец од објавувањето на првите прислушувани разговори коишто ги објави опозициската СДСМ, излезе во јавност, но не сакаше да ги коментира снимките на коишто наводно се слуша како таа вели дека власта е е „забегана“, и како наводно договара со јавниот обвинител Марко Зврлевски да биде отфрлена кривична пријава.
„Тоа го тврди Зоран Заев, јас не го тврдам тоа и не би сакала да коментирам незаконски прибавени материјали кои се креирани во функција на постигнување на политичка цел на една политичка партија која нема друго што да им понуди на граѓаните. Јас мојот став по однос на политиките на владата многу јасно и недвосмислено го кажувам и ќе го повторам. Сметам дека владата предвоедена од премиерот Никола Груевски, во неколкуте мандати кои ги добивме од граѓаните успеа да направи историски пресврт во подобрување на состојбите во различни сфери од општеството“, изјави Јанкулоска.Според неа, безбедноста на државата не е загрозена и таа сè уште има легитимитет да ја врши функцијата министер за внатрешни работи.Јанкулоска денеска ја посети локацијата каде што треба да се гради новиот објект на полициската станица „Ѓорче Петров“ и новиот објект на Противпожарната единица. На аудио снимките кои ги презентираше опозициската СДСМ, во разговор со министерот за финансии Зоран Ставрески Јанкулоска наводно се жали дека полицајците работат во лоши услови во полициски станици и се покриваат со кебиња од ЈНА.Но на денешниот настан Јанкулоска изјави дека никогаш како досега не било инвестирање во обезбедување опрема и средства за работа во полицијата. Заедно со Јанкулоска беше градоначалникот на Скопје, Коце Трајановски за кој наводно Јанкулоска во прислушуваните разговори тврди дека давал поддршка за „матни зделки“. Но и Трајановски изјави дека со министерката имаат добра соработка која ќе продолжи и во иднина.Во Ѓорче Петров се планира во рок од 14 месеци да биде изграден комплетно подготвен нов објект со површина од околу 1400 метри квадратни, којшто опфаќаат сутерен, приземје и два ката, а вредноста на инвестицијата ќе изнесува околу 52 милиони денари. Според проектното решение објектот ќе биде изграден по теркот на современите архитектонски трендови и функционалност, согласно намената на објектот, а истовремено ќе бидат целосно запазени и потребните безбедносни стандарди. Наедно, предвидено е да има и непречен пристап за лица со инвалидитет, како и физичко обезбедување на објектот, односно ограда околу целата локација.Исто така, покрај стандардните потреби, предвидено е во новиот проект да има современо опремени простории за задржување на лица, простории за разговори, просторија за Народниот правобранител, дежурна служба, како и базна станица за изработка на лични документи на граѓаните и друго.Инаку досегашниот објект во којшто се наоѓа ПС од ОН Ѓорче Петров датира од 1963 година. Во текот на минатата година евидентирано е намалување на вкупниот број кривични дела на подрачјето на оваа ПС од општа надлежност за 8,8 проценти во споредба со 2013 година, односно регистрирани 1.180 кривични дела, во споредба со 1.295 во 2013 година. /крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Д-р Филипче: Невработеност од најниски 7% и поддршка од 180 милиони евра за бизнисот
Во новиот мандат СДСМ предвидува 180 милиони евра директна финансиска поддршка за бизнис секторот, нови вработувања и историски најниски 7% невработеност.
Ова го истакна д-р Венко Филипче, носител на листата на кандидати за пратеници на СДСМ и Коалицијата за европска иднина. Денеска Филипче ја продолжува својата агенда во рамки на предизборното претставување во Изборната единица 4.
„СДСМ ќе внесе нова економска енергија за европски раст и стандард на граѓаните и бизнис секторот. Најуспешни се оние земји во кои се создаваат бизниси, каде што има претприемачка идеја и средина која го поттикнува нивниот развој“, рече Филипче.
Филипче потсети дека изминатите седум години мандат, СДСМ ја поддржуваше економијата на неколку колосеци.
„Ги охрабрувавме ентузијастите својата идеја да ја преточат во реалност да отворат свој сопствен бизнис. Локалната економија, малите бизниси се важен сегмент и околу нив градевме и ќе продолжиме да градиме стратегијата за развој на домашната економија“, вели Филипче.
Во таа насока, ќе продолжи креирањето на политики кои ќе го поттикнуваат бизнисот и економскиот развој преку транспарентно и отчетно однесување со секој денар на граѓаните, додава Филипче.
Со цел, пак, подобро управување со енергетските компании кои имаат клучен удел во вкупната економска активност, СДСМ државните енергетски капацитети ќе ги предаде во рацете на граѓаните.
„Планираме енергетските компании да ги вратиме кај граѓаните. Секој граѓанин, вклучително и деца, ќе добие по најмалку 8.000 денари од вредноста на енергетските компании или 500 евра за едно четиричлено семејство. Така контролата за работењето на енергетските компании ќе биде во рацете на граѓаните“, завршува Филипче.
Македонија
Силјановска-Давкова: Потребен ни е професионален кадар на соодветни безбедносни позиции
Денес во хотел „Хилтон“ (DoubleTree by Hilton Skopje) се одржа втората трибина од циклусот за претставување на клучните точки од програмата „Македонија повторно горда“ на тема „Национална безбедност“ на кандидатката за претседателка на Македонија професор д-р Гордана Сиљановска-Давкова.
Учесници беа проф. д-р. Тимчо Муцунски, Наќе Чулев поранешен министер за внатрешни работи, Анастасија Илиеска поранешен државен секретар во МВР, Емил Димитриев, поранешен премиер на Република Македонија.
– Како ќе бидеме ние Европска држава ако сме постојано во кризна состојба. Нас не дефинираа како држава која е цикличен, постојан хибриден режим, партизирана нефункционална заради врхушката на ДУИ и СДСМ. Мора да ни се случи game change и во безбедносниот сектор, зошто станавме пропадната држава. Еднаш треба да создадеме систем без оглед кој е на власт. Професионалниот кадар да биде на соодветни позиции. Да продолжиме да ги исполнуваме стандардите на НАТО, рече претседателската кандидатска Силјановска-Давкова.
Македонија
Николоски: Идната Влада на ВМРО-ДПМНЕ ќе донесе закон за забрана на увоз на тутун, за да се откупи македонскиот по повисоки и пристојни цени
Александар Николоски, потпретседател на ВМРО-ДПМНЕ и носител на изборна единица 4 денес заедно со кандидати и идни пратеници во новото македонско Собрание од општините Конче и Радовиш, беше во посета на капитални инфраструктурни проекти во општина Конче. Според Николовски, работата на градоначалникот покажува дека и во малите средини во Македонија може да се работи успешно и убаво доколку се има волја и доколку се работи чесно.
– Можам да кажам дека после изборите ќе има огромна поддршка за општина Конче со цел да се реализираат проектите кои што се од витално значење за сите оние кои што живеат овде. Тука е секако и поддршката на земјоделието каде што можеби и најбитната работа поврзана со земјоделието е тутунот кој што се одгледува најмногу во општина Конче. Планираме да го донесеме законот за тутун кој што два пати го поднесувавме во Собранието, но досегашното мнозинство на СДСМ и ДУИ го блокираше. А, причината зошто го блокираше е затоа што имаа бизнис интереси. Имено, со тој закон ќе се забрани увоз на тутун во Македонија со цел да целокупниот македонски тутун, македонското злато да се откупува по повисоки и пристојни цени, како би можеле сите земјоделци пристојно да живеат. Така што тоа е она наше основно ветување односно тутунот, рече Николоски.
Тој вети и зголемувањата на субвенциите за тутун, воведување на само три класи, а не како досега што има шест или седум класи зависно од откупувачите.
– Во делот на земјоделието планираме возобновување на сите водоснабдителни системи како и изградба на нови и комплетно нов систем на субвенции кој што ќе го врати достоинството на македонскиот земјоделец. А, тука ќе работиме интензивно и на она што е желба на жителите и на Конче и на општина Радовиш а тоа е носење на една поголема странска инвестиција која што треба да отвори нови и добро платени работни места за жителите на целиот овој крај, рече Николоски во Конче.
Тој повика граѓаните масово да излезат и на претседателските и на парламентарните избори оти тоа е клучно. Како што рече Николовски, со масовна излезност ќе може да се спречи оваа влада на СДСМ и на ДУИ, а двете политички партии да одат во опозиција и конечно да се удри во чело на криминалот и корупцијата во Македонија, да се воведе функционален систем на владеење на правото и Македонија економски да се развива.