Лагите за „третата“ економија во Европа на Мицкоски ги разби и ММФ, велат од СДСМ

Македонија во следните пет години нема да биде меѓу петте најбрзорастечки економии во Европа, реагираат од СДСМ.

Меѓународниот монетарен фонд во последниот извештај, потсетуваат од оваа партија, прогнозира дека македонската економија до 2031 година ќе има просечен раст од 3%.

„Пред нас се Албанија со раст од 3,19%, Молдавија, Србија со 3,5% Украина, Косово со 3,95% раст, а прва е Малта со економски раст од 3,96%.

Ова е вистината. Не му проаѓаат на Мицкоски лагите дека Македонија е економски лидер во Европа.
Вистината е дека македонската економија е во катастрофална состојба.

Со Мицкоски економијата ќе продолжи да тоне, доаѓа уште потежок и поскап живот за граѓаните.

Зголемувањето на дефицитот од 3% на 4,1% е само отворена врата за нови скапи задолжувања врз грбот на народот“.

Инфлацијата, оценуваат во СДСМ, ја изеде куповната моќ на граѓаните, доведени до просјачки стап.

А власта со коригираната инфлација од 4,5%, признава дека ги чека уште поскап и потежок живот.

Според нив, домашното задолжување расте на 39 милијарди денари, а странското 101 милијарда денари. Ова, како што појаснуваат, значи дека го крајот на годината јавниот долг ќе надмине 61,5% од БДП.

„За две години оваа Влада создаде нов долг од 2,5 милијарди евра, со што го искачи нивото на јавниот долг на скоро 11 милијарди евра.

И ова не се пари за мерки за граѓаните, за 600 евра минимална плата, за капитални проекти – ова се пари за криминалните тендери на Мицкоски и неговата криминална организација ВМРО.

Министерката за финансии предупредуваше дека многу „европски земји ќе банкротирале“. Со вакво темпо на задолжување, за жал Македонија се движи кон банкрот.

Со оваа власт Македонија ризикува да остане на дното, не затоа што нема потенцијал, туку затоа што оваа Влада нема развојна стратегија.

Кратат од секаде, само не од нивниот луксуз. Наместо инвестиции, реформи и раст, приоритет се криминални тендери, партиски вработувања и расипничко трошење на народните пари“.

Од СДСМ додаваат дека цената на овие надреални приказни на Мицкоски ја плаќаат граѓаните, со празни џебови и сè потежок живот од ден во ден.