Македонија
Лукровски дигнал раце од општината, јавна тајна е дека веќе два пати поднесувал оставка, велат од ГРОМ
ГРОМ и коалицијата изминативе шест месеци беше конструктивен во Советот на Општина Карпош. За разлика од ВМРО-ДПМНЕ, која во претходниот мандат ја блокираше општината, ние не го опструиравме градоначалникот Сотир Лукровски, туку му дававме поддршка кога тоа беше во интерес на Карпош, изјави на прес-конференција Добрила Андоновска, член на Советот на Општина Карпош.
„Но, господинот Лукровски уште во првиот месец почна да се жали дека му било тешко и дека процедурите биле сложени. Како резултат на тоа, не примаше граѓани, не соработуваше со администрацијата и не се потруди да научи како функционира една општина. Со таков однос не се води општина“, додава таа.
Јавна тајна е, како што рече, дека Лукровски веќе два пати поднесувал оставка.
„Тоа значи дека градоначалникот практично дигнал раце, а оние што го поставија сега се обидуваат да го задржат во фотелјата преку компромисно решение — боледување.
Но, ова не е решение, туку купување време.
Со ваквиот однос, Општина Карпош се доведува во состојба на несигурност, застој и институционална импровизација. Дополнително, денес Неделчо држел колегиуми во Општина Карпош. Тоа е доказ дека тој не се однесува како лице со техничко овластување за потпис, туку како фактички градоначалник. А Карпошани не гласале за Неделчо. Овластување за потпис не е мандат од народот“.
Гром додаде таа, бара итно свикување вонредна седница на Советот на Општина Карпош, на која ќе се расправа за настанатата состојба, статусот на градоначалникот, овластувањата дадени на друго лице и фактичкото раководење со општината.
Советот мора да биде информиран. Граѓаните мора да ја знаат вистината. Општината мора да работи.
Ако Лукровски не може, не сака или не знае да ја води Општина Карпош, чесно е да си поднесе оставка. А по оставка на градоначалник, следуваат избори за нов градоначалник.
Решението е јасно: оставка и избори за нов градоначалник на Општина Карпош.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) Гореше приколка од камион на регионалниот пат Струмица-Валандово: интервенираа струмичките пожарникари
Денес, во 14.20 часот, на регионалниот пат Струмица-Валандово, ТППЕ Струмица со две противпожарни возила и пет пожарникари-спасители интервенираше на гаснење на запалена приколка од камион.
Пожарот е целосно изгаснат за кратко време после пристигнувањето на лице место, извести ТППЕ Струмица.
Македонија
(Фото) 335 ученици од основни училишта учествуваа на традиционалната церемонија на менување на државното знаме во претседателскиот кабинет
Пред крајот на учебната година, 335 ученици од основните училишта „Илинден” од Крива Паланка и „Љубен Лапе”, „Ацо Шопов”, „Лазо Трповски ” и „Киро Глигоров“ од Скопје, беа учесници на традиционалната церемонија на менување на државното знаме во претседателскиот кабинет.
Церемонијата започна со македонската химна, изведена од Воениот оркестар и придружена од детските гласови.

Потем, учениците имаа можност да ги разгледаат просториите на Кабинетот и да се запознаат со работата на институцијата.
„Највозбудливиот дел од посетата следеше во дворот каде опкружена со стотици љубопитни погледи и кренати раце одговарав на низа прашања врзани за детството и училишните денови, професорската работа и претседателските обврски.
Потсетувајќи се на првите учители кои ми ја всадија љубовта кон книгите, на учениците им порачав: да го негуваат другарството, да се почитуваат, да поставуваат прашања и да не се плашат да размислуваат поинаку, оти токму љубопитноста е почеток на секое учење, а знаењето останува најсигурниот сопатник низ животот“, вели претседателката на Македонија, Гордана Сиљановска – Давкова.
Македонија
Времето утре: променливо облачно и нестабилно со пороен дожд, грмежи и засилен ветер
Времето утре ќе биде променливо облачно и нестабилно со пороен дожд, грмежи и засилен ветер. Локално ќе има поинтензивни процеси во форма на невреме со пообилен пороен дожд, грмежи, засилен ветер и изолирана појава на град. Минималната температура ќе биде во интервал од 10 до 18, а максималната ќе достигне од 25 до 34 степени.
Во Скопје, променливо облачно, во делови од котлината нестабилно со пороен дожд, грмежи и засилен ветер. Минималната температура ќе се спушти до 16, а максималната ќе достигне до 32 степена.
Времето во наредните денови
Следува период на променливо облачно и топло време со сончеви периоди. Во попладневните часови ќе има појава на локална нестабилност со пороен дожд, грмежи и засилен ветер. Заради големата енергија во атмосферата ќе има услови за појава на краткотрајно невреме.
