Македонија
Министерот Адеми на меѓународна научна средба во Приштина
Министерот за образование и наука, Абдилаќим Адeми во петок во Приштина присуствуваше на оторањето на деветтата меѓународна научна годишна средба, организирана од Институтот “ALB-Shkenca”, на тема „Наука, важен фактор за одржлив социо-економски развој“.
Во своето обраќање пред присутните Адеми истакна дека процесот на глобализација сé повеќе ги притиска општествата да инвестираат во науката и истражувањето, бидејќи, како што рече, само преку знаењето и иновациите може да се постигне економски напредок и соодветна општествена организација.
“Во Република Македонија научно-истражувачките активности се состојат од мрежа на истражувачки научни институции, 5 државни универзитети, 7 јавни институции за истражување, 18 приватни универзитети и 10 приватни институти. Дел од институтите и центрите веќе постигнаа углед во меѓународната конкуренција, додека некои научни центри со брзи чекори се движат кон постигнување на меѓународните стандарди и критериуми“ рече Адеми.
Говорејќи за стратегијата и програмата на Владата и Министерството за образование и наука на Република Македонија, потенцираше дека приоритет е создавањето на можности и ангажирање на научните истражувачи во рамки на зголемувањето на ефективната соработка на образовните и научните институции со меѓународните организации кои финансираат програми од областа на науката.
“Во последната деценија, Република Македонија има одлично искуство во меѓународната научна соработка, особено со земјите од Европа. Меѓународната соработка се спроведува преку Хоризонт 2020, КОСТ, ЕУРЕКА, УНЕСКО, ИАЕА, ЛСA. Треба посебно да се истакне учеството на истражувачите во Програмата -Рамка 7. Нашите истражувачи учествуваат во 82 проекти со буџет кој изнесува 7,6 милиони евра“, додаде Адеми, потврдувајќи дека и во иднина Министерството за образование и наука ќе ја поддржува секоја иницијатива која промовира интернационализација во истражувањето, размена на студенти, млади истражувачи и научни работници.
Адеми се осврна и на неколку капитални проекти во областа на високото образование и науката коишто ги спроведува Владата на Република Македонија, како набавката на лаборатории за високо образовните и јавните научни установи во земјата и преводот на “1000 книги“, стручна и научна литературата од која се учи на најдобро рангираните светски универзитети.
На оваа дводневна меѓународна научна средба, искуствата на своите земји ги споделија и ресорните министри на Република Косово и Република Албанија, Рам Буја и Линдита Никола, со кои е договорено во следниот период да бидат потпишани договори за соработка во областа на образованието и науката.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Конечно Работнички се враќа на шампионските патеки
Градоначалникот на Општина Центар Горан Герасимовски вчера вечер присуствуваше на тренингот на КК Работнички во салата Кале. Со кошаркарите разговараа за издигнувањето на тимот и потребите за достигнување на високи резултати и на следните натпревари.
„Сакам да се заблагодарам пред се и на тренерот на цел стручен тим но и на сите играчи за одличните резултати коишто ги имаме годинава. Успеавме со клубот од невозможно да направиме возможно. Клубот којшто го начекавме пред две години на 10то место со 4-5 неисплатени плати и долг од 600 000 евра да го вратиме на победничките патеки. Важно е што во моментов табелата трепка што сме на прво место и се надевам дека тоа така ќе остане и до крај. Јас верувам дека ќе имаме успех оваа сезона и уште поголем успех следната“, им порача Герасимовски на кошаркарите.
При средбата Герасимовски ги извести играчите дека општина Центар го има имотниот лист на салата и успеа да го исполни ветувањето дека ќе ја врати сопственоста на салата под ингеренции на општината.
Општина Центар на крајот на минатата година доби финансиски средства од Владата во вредност од 30 милиони денари наменети за реконструкција на салата, при што Герасимовски ги информираше играчите со процесот и проект планот кој е веќе во изработка за реновирање на матичната сала на Работнички. Конечно Работнички се враќа на шампионските патеки, ви благодарам за тоа, порача Герасимовски.
Македонија
Петровска: Судот донесе одлука дека Ковачки неправедно ме клеветел
Министерката за одбрана, Славјанка Петровска објави дека судот донел одлука со која се утврува дека пратеникот од ВМРО-ДПМНЕ, Драган Ковачки, неправедно ја клеветел.
„Основниот граѓански суд во Скопје по сите прикажани докази од моја страна донесе одлука со која се утврдува дека тужениот Драган Ковачки искажал невистини и лаги односно неправедно ме клеветел во јавност со цел да ми го наруши угледот и честа во очите на јавноста, Овој е само еден од низата примери на неодговорно, нечесно и валкано однесување на политичката сцена од страна на Ковачки“, пишува Петровска.
Во продолжение таа додава дека не сака пари од нечесник и се откажува од паричниот надомест.
„Секој го прави тоа што најдобро го знае, тие со лагите, јас со труд и одговорна и чесна работа“, додава Петровска.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.