Претседателот Стево Пендаровски вчера попладне во Њујорк се обрати на отворената дебата за одржување на меѓународниот мир и безбедност на Советот за безбедност, на тема „Одржување на целите и принципите на Повелбата на ОН преку ефективен мултилатерализам: одржување на мирот и безбедноста во Украина“.

Тој порача дека најитната задача на Советот за безбедност е да биде проактивно ангажиран за ставање крај на војната во Украина.

„Единствениот начин да се постигне оваа цел е преку дипломатија и преговори, засновани на почитување на суверенитетот и територијалниот интегритет на Украина во нејзините меѓународно признати граници. За таа цел, првиот чекор треба да биде итно и безусловно примирје за да се создаде амбиент за почеток на преговорите. Во текот на целиот процес Обединетите нации треба да воспостават мировна мисија со главна задача да ги надгледуваат примирјето и хуманитарната помош за цивилите“, истакна Пендаровски.

Тој нагласи дека агресијата на Руската Федерација против Украина нанесе силен удар врз меѓународниот мир и безбедност, основните принципи на меѓународното право и меѓународниот поредок.

„Оваа војна го предизвика мултилатерализмот како основа на меѓународниот поредок на невидено ниво. А како што сите знаеме, меѓународната и безбедносната архитектура, чиј најважен одраз се Обединетите нации, е насочена кон мултилатерализмот.

Сегашната ситуација е резултат на игнорирањето на обврските содржани во Повелбата на ОН од 1945 година. Без почитување на суверената еднаквост и територијален интегритет на секоја земја членка, не можеме да зборуваме за ефективен мултилатерализам. Досега видовме неколку обиди за редефинирање на основите на меѓународниот поредок, но ниту еден од нив не доби толку широка поддршка како принципите што цивилизираниот свет ги воспостави по ужасите на Втората светска војна.

Во таа смисла блокадата во која се наоѓа Советот за безбедност како главно тело на ОН, кое има цел зачувување и унапредување на меѓународниот мир и безбедност, беше поттикнат токму од непочитувањето и, би рекол, дури и свесното заобиколување на основните принципи на меѓународниот поредок“, рече Пендаровски.

Според него, јасно е дека оваа блокада ги намалува кредибилитетот и довербата на луѓето дека Обединетите нации може ефективно да ја постигнат клучната цел за која беа формирани пред речиси осум децении.

Во Министерството за внатрешни работи денеска се одржа протоколарна средба помеѓу министерот Оливер Спасовски и новоназначениот амбасадор на Република Словениј, Грегор Пескор.

На средбата министерот Спасовски изрази благодарност за поддршката од страна на Република Словенија за процесите за почнување преговори со ЕУ, како и добрите пријателски односи помеѓу двете земји и одличната соработка помеѓу министерствата за внатрешни работи на двете пријателски земји, што резултира со многу заеднички проекти, ангажмани и разни видови соработка. Дополнителна потврда на досегашната одлична соработка е и претстојната посета на Спасовски на словенечкото Министерството за внатрешни работи, на која е предвидено да се потпише меморандум за соработка во обезбедување развојна помош.

Амбасадорот Пескор рече дека за поздравување е континуираното подобрување на условите во кои работи македонската полиција од страна на раководството на МВР како во однос на материјално-техничките средства така и во поглед на зголемување на платите за вработените како стимул за подобри резултати. Истовремено, од двете страни беше истакната и бескомпромисната борба на полицијата во однос на справувањето со сите видови криминал со тенденција за продолжување и продлабочување на соработката и на оперативен план помеѓу нашите две министерства.

Државната секретарка во Секретаријатот за европски прашања и заменичката на главниот преговарач со ЕУ, Дрита Абдиу-Халили, денес и утре ќе учествува на работилницата на високо ниво од програмата ТAIEX на Европската комисија, која се одржува во Вилниус, Литванија.

Абдиу-Халили зеде учество во сесијата на тема: „Напредокот и предизвиците на земјите од Западен Балкан на патот на пристапување кон ЕУ и потребната поддршка“, каде што посочи дека стратешката цел на Владата е силно посветена на реализација на обврските и задачите што ги имаме како држава на патот кон ЕУ и дека со сите расположливи капацитети максимално ќе го искористиме процесот на забрзано пристапување во Унијата.

„Новата методологија на пристапување во ЕУ дава нова надеж. Споделувањето на искуства меѓу земјите кандидатки и земјите што преговараат е неопходна и многу важна за самиот процес. Проширувањето на ЕУ со нови членки, како и развојниот план за Западен Балкан, даваат нова динамика и мотив за сите нас да работиме за постигнување на целта и да станеме полноправни членки на Унијата до 2030 година“, рече, меѓу другото, Абдиу-Халили.

Во таа насока таа додаде дека ваквите настани со кои се разменуваат знаења, искуства и добри практики ги зајакнуваат врските на соработка помеѓу нашата држава, европските партнери, како и другите земји што преговараат или се очекува да ги отворат преговорите во блиска иднина.

Целта на овој настан е да се споделат вредни искуства од пристапните процеси на балтичките земји и да се идентификуваат најдобрите практики што може да се применат во земјите што сега преговараат, како што е случајот со Северна Македонија и другите земји од Западен Балкан.

На настанот, кој е организиран во соработка со Министерството за надворешни работи на Литванија, учествуваат високи претставници од државите членки на ЕУ, главни преговарачи и поранешни главни преговарачи од земјите што се приклучија на ЕУ во 2004 година, како што се Летонија, Литванија и Естонија, заедно со државите од Западен Балкан, кои веќе преговараат: Србија, Црна Гора, Северна Македонија и Албанија. Дополнително, беа присутни претставници од земјите од здружената тројка, вклучително Украина, Молдавија и Грузија, кои се очекува до крајот на годината да ги почнат пристапните преговори со ЕУ.