Надворешна политика
Безбедносните предизвици во фокусот на разговорите на Јолевски со сенаторите МекКејн и Круз
Како дел од работната посета на САД, министерот за одбрана, Зоран Јолевски оствари одвоени средби со американските сенатори Џон МекКејн и Тед Круз, при што соговорниците разменија мислења околу актуелните безбедносни случувања кои ја тангираат Европа, регионот и Република Македонија.
На средбите меѓу другото, стана збор за потенцијалните ефекти од зголемување на интензитетот на мигрантската криза, опасноста од современиот тероризам и останатите неконвенционални закани. Министерот Јолевски ја искористи можноста да ги запознае своите соговорници за интензитетот на соработката која Република Македонија ја има со САД во доменот на одбраната во изминатиот период и воедно се заблагодари за поддршката која вооружените сили на САД ѝ ја даваат на Армијата на Република Македонија.
Сенаторот од Аризона и голем поддржувач на Република Македонија, Џон МекКејн, изрази особен интерес околу напредокот во решавањето на спорот со името со јужниот сосед истакнувајќи го попречувањето на Македонија. Јолевски истакна дека предизвиците пред кои се наоѓа Европа, вклучувајќи ја тука и Југоисточна Европа, бараат да се преземат стратегиски чекори. Тие би се состоеле во давање покана на Македонија за членство во НАТО, ратификување на приемот на Црна Гора во НАТО, како и активирање на МАП процесот за Босна и Херцеговина.
Двата соговорници разговараа и за актуелните состојби во регионот, како и за внатрешно политичките состојби во Македонија. Сенаторот МекКејн се осврна на потребата буџетот за одбрана на земјите членки и аспиранти да достигне 2 отсто од бруто домашниот производ, воедно оддавајќи признание на фактот дека 20 проценти од актуелниот буџет се троши за модернизација на АРМ.
Јолевски побара од сенаторот да продолжи со поддршката на Република Македонија. Сенаторот МекКејн го увери министерот Јолевски дека во неговите приоритети за 2017-та година ќе биде зајакнување на поддршката којашто САД ѝ ја дава не само на Македонија, туку и на целиот регион, истакнувајќи дека ќе направи напори оваа година да ја посети нашата земја./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.