Надворешна политика
Амбасадорите бараат итно спроведување на договорот од Пржино
Амбасадорите на Европската унија (ЕУ), САД, Германија, Велика Британија, Франција и Италија во вторникот побараа итно спроведување на договорот од Пржино, додавајќи дека се разочарани поради пробивањето на роковите во однос на досегашната имплементација.
„Ги повикуваме ВРМО-ДПМНЕ да ја демонстрираат потребната посветеност и да го имплементираат договорот на итен и конструктивен начин, и во добра волја. Веруваме дека имплементацијата на договорот е најдобриот пат за излез од оваа политичка криза“, стои во заедничката изјава на амбасадорите.
„Го повикавме и премиерот Груевски и неговиот тим да ги финализираат договорите за нерешените прашање во договорот од Пржино и да ги имплементираат потребните реформи за обезбедување на кредибилни избори на домашен и надворешен план, како и за одговорност во однос на евентуалните нерегуларности. Во однос на последното, очекуваме на Специјалниот јавен обвинител, назначена едногласно од страна на Парламентот, да и бидат дадени неопходните ресурси за вршење на важната работа што и претстои“, порачуваат амабсадорите.
Тие упатија порака и до опозициската СДСМ, која според нив треба да ги заврши обврските кои произлегуваат од политичкиот договор, вклучувајќи ја онаа за да не објавува нови аудио материјали од прислушуваните разговори.
„Договорот од Пржино ги повикува партиите да ги стават интересите на државата пред се, и да ја потврдат својата посветеност кон евроатланските интеграции и демократските принципи. Сите партии треба да делуваат во добра волја, да ја потврдат својата обврска кон Договорот, и да делуваат според мерките кои беа договорени и кои се итно барани, земајќи ја предвид моменталната состојба. Доколу не се успее во ова, тогаш тоа ќе игра улога и во процената која што се врши од страна на Европската комисија. Владите, и особено нивните лидери, имаат специјална одговорност за време на политички кризи. Доколку тие делуваат веднаш и дадат до знаење дека преку своите дела се насочуваат кон овој пат, тогаш меѓународната заедница ќе биде подготвена целосно да го поддржи тоа“, заклучуваат странските амбасадори./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.