Надворешна политика
Бесими: Извештајот на ЕК дава јасни насоки за делување
Извештајот на Европската комисија (ЕК) за напредокот на Македонија во евроинтеграциите дава јасно насоки за делување и Владата ќе продолжи да работи на сите оние работи каде што може да се постигне напредок, порача во средата вицепремиерот Фатмир Бесими, коментирајќи ја содржината на документот од Брисел.
Извештајот на Европската комисија (ЕК) за напредокот на Македонија во евроинтеграциите дава јасно насоки за делување и Владата ќе продолжи да работи на сите оние работи каде што може да се постигне напредок, порача во средата вицепремиерот Фатмир Бесими, коментирајќи ја содржината на документот од Брисел.
„Европската комисија јасно дава препорака за започнување на преговорите на Македонија за полноправно членство, а она што за нас е важно се укажувањата кои се наведени и она на што Македонија треба да обрне внимание во наредниот период, со цел да постигне поголем напредок. Ние сме ангажирани во анализа на извештајот и ќе ја доставиме до Владата и Собранието, а потоа ќе почнеме со подготовка на акцискиот план за сите работи кои произлегуваат од извештајот, а треба да се направат. Без оглед на коментарите околу тоа дали вокабуларот на извештајот е помалку или повеќе дипломатски, сметам дека за нас е важен секој збор и секоја тема што е покрената, а ние ќе го сфатиме сериозно и ќе работиме на содржината“, изјави Бесими.
Според вицепремиерот, она што е важно е тоа што извештајот резултираше повторно со препорака за почекот на преговорите, а сега останува да се подобри состојбата во клучните области кои беа посочени од Комисијата, односно слободата на говорот, судството, цивилниот сектор итн.
„Во регионалната соработка и поконкретно во однос на спорот за името, во извештајот стои се очекуваат одлучни чекори и дека тоа прашање всушност е голем предизвик и има негативни импликации по евроинтеграциите. Тоа што е новитет е дека самата ЕК апелира до лидерите на ЕУ да бидат проактивни во поддршката за надминување на ова прашање, а тоа се работи кои ги содржи извештајот и за кои сметаме дека се објективни“, вели Бесими.
Според него, ЕК во извештајот има ги нотирала и работите каде што бил постигнат напредок, односно регионалната соработка и борбата против организираниот криминал, потоа во делот на реформите на јавната администрација, судството, каде што Македонија е во напредна фаза во однос на легислативата, како и напредокот во економските критериуми./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.