Надворешна политика
Чавков: Нужна е глобална одговорност, но и одговор на бегалската криза
Мигрантската, односно бегалската криза беше во фокусот на состанокот на министрите за внатрешни работи, при што беше потенцирана неопходноста од засилена европска солидарност како во рамки на заедничкиот европски систем на азил, така и во делот на зајакнување на шенгенските граници.
Ова, меѓу другото, го истакна министерот за внатрешни работи Митко Чавков по денешниот неформален состанок на министрите за внатрешни работи и на правда на земјите членки на ЕУ и земјите кандидати за членство во унијата, којшто во рамки на словачкото претседавање со Унијата се одржа во Братислава, посветен токму на миграциите и границите.На состанокот, како што потенцираше министерот Чавков, било оценето дека во врска со актуелната бегалска криза како глобален проблем, како поради причините така и поради последиците, нужна е глобална одговорност, но и одговор. Во тој контекст договорено е во наредниот период да се продолжи со интензивни контакти и средби кои што практично треба да бидат претходница на двата клучни настани посветени на оваа важна тема: Самитот на лидери на глобално ниво во Њујорк и Средбата на високо ниво во рамки на Обединетите Нации кои што треба да резултираат со конкретни заклучоци и мерки за справување со бегалската и миграциската криза. Според Чавков неспорно е дека веќе постои консензус околу вистинското значење на миграциската криза при што преовладува потребата од солидарен настап на сите земји, пред сѐ во делот на зајакнување на постојните регулативи, на системите и на институциите во рамки на ЕУ за справување со бегалска криза. „Беа детектирани одредени слабости во досегашниот настап и следствено на тоа и реформи што треба да се преземат како во рамки на шенгенски каталог, така во рамки на “Фронтекс“, односно проширување на неговата мисија, потоа зајакнување на регулатива за датотеки “Еуродакт“ и на капацитети на постоечкиот систем на азил“, изјави министерот Чавков, нагласувајќи дека ова e особено важно поради фактот што бегалската криза ќе трае и во иднина и ќе биде голем предизвик не само за ЕУ, туку и за светот. На крајот министерот Чавков потенцираше дека во рамки на дебатата од страна на повеќе земји на ЕУ беше нотирана и поздравена досегашната активност и учество на Република Македонија во справувањето со мигрантската криза, при што особено на неговите билатерални средби со министрите за внатрешни работи на Словачка и на Австрија македонскиот ангажман бил оценет како одличен пример за ефективно партнерство и солидарност во справувањето со овој глобален проблем. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.