Надворешна политика
Хил: Македонија никогаш нема да се откаже од своето уставно име
Поранешниот американски амбасадор во Македонија, Кристофер Хил, смета дека Македонија нема никогаш да се откаже од своето уставно име, а во разговорите со Грција потребно е да се најде решение кое ќе го отвори патот за влез во Европската унија (ЕУ) без менување на уставното име.
„Мислам дека одговорот сé уште треба да биде некаков вид на пакет за име што ќе биде прифатлив за сите, но ќе го зачува уставното име. Македонија нема да го смени уставното име, но треба да се има некои отстапки за да се надмине ова, подразбирајќи дека уставното име мора да остане и дека мора да има пакет со кој ќе се влезе во Европската унија. Дали некој може да го реши овој спор сега? Мислам не. Знам дека Македонците нема да го сменат името. За нив и за САД името е Република Македонија. Исто така, знам дека мора да има некаков вид на процес во кој ќе има нешто и за Грците, но во овој момент не можам да кажам што ќе биде тоа“, изјави Хил на прашање на Македонската телевизија, за време на обраќање во Универзитетот Џон Хопкинс во Вашингтон.
Хил додаде дека спорот за името е тешко прашање, што се гледа од самиот факт дека неговото решавање трае повеќе од 20 години. Хил беше првиот американски амбасадор во Македонија, и беше активно вклучен во постигнувањето на Времената спогодба меѓу Македонија и Грција во 1995 година со која се воведе времената референца за Македонија, се укина грчкото ембарго и Грција се обврза дека нема натаму да го попречува приемот на Македонија во меѓународните институции, обврска која земјата ја прекрши во 2008 година кога го спречи приемот на Македонија во НАТО.
Во интервју за Гласот на Америка на македонски јазик, Хил додаде оти гледа поларизираност во Македонија, не во меѓуетничките, туку во политичките односи.
„Македонија има внатрешни прашања со коишто треба да се справи и треба да се решат, не само во однос на мнозинството коешто победило на изборите, туку и во однос на оние коишто не победиле. Сите треба да почувствуваат дека се дел од системот. Но, покрај тоа, иако има многу поплаки и никој не е задоволен, сé уште мислам дека Македонија е постојан дел од европската мапа и сите треба да се горди на тоа“, рече Хил за Гласот на Америка.
Хил во моментов е декан на Универзитетот на Денвер, во Колорадо, и ја промовира својата книга со спомени од дипломатската кариера која, освен во Македонија, го однесе како амбасадор во Полска, Јужна Кореја и Ирак./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.