Надворешна политика
Иванов ги прими акредитивите од амбасадорите на Австрија, Холандија и Хрватска
Претседателот на Република Македонија, Ѓорге Иванов во понеделникот ги прими акредитивните писма на новоименуваните амбасадори на Австрија, Холандија и Хрватска во Македонија.
На средбата со новоименуваниот амбасадор на Австрија, Ренате Коблер, претседателот Иванов истакна дека Македонија и Австрија во изминативе две децении изградија стабилни и цврсти пријателски и партнерски односи, засновани на меѓусебна доверба и заемно почитување.
„Република Австрија е втор инвеститор во Република Македонија, а австриската бизнис-заедница и австриските компании со успех дејствуваат на македонскиот пазар. Отворени сме и подготвени за натамошно продлабочување на овој посебно значен сегмент од нашата соработка. Се надевам дека и Вашето богато дипломатско искуство, кое високо го цениме, несомнено ќе даде голем придонес за таа цел”, рече Иванов во поздравното обраќање и додаде дека со заеднички напори очекува во наредниот период нов импулс и дополнителна енергија за преоѓање во уште подинамична и понапредна фаза од развојот на односите и соработката меѓу двете земји.
Новоименуваниот австриски амбасадор Ренате Коблер истакна дека ќе се заложи за продлабочување и проширување на односите помеѓу двете земји, како и за унапредување на евроатланската интеграција на Република Македонија. Во поглед на актуелната состојба со мигрантите на македонската граница, амбасадорката Коблер изрази подготвеност за да се продолжи со напорите и поддршката за Македонија во однос на зголемувањето на капацитетите на граничната администрација и системот за азил, заедно со европските институции и другите земји – членки на ЕУ.
На средбата со новоименуваниот амбасадор на Холандија, Вилем Ваутер Пломп, Иванов истакна дека помеѓу двете земји веќе две децении постои континуирана и тесна соработка во повеќе области од заемен интерес, што е во полза на граѓаните на двете земји. Македонскиот претседател рече дека Македонија високо ги вреднува несебичните и посветени активности кои Холандија ги вложува за директно помагање на македонското општество во однос на процесите кои водат кон европска трансформација.
„Развојната соработка е јадрото на традиционалното партнерство меѓу нашите две држави и двигател на сè поинтензивната соработка на секторско ниво. Привилегија за Република Македонија е да гради и да одржува сеопфатна интеракција со Кралството Холандија, земја-основач на НАТО и на Европската унија, како и предводник на полето на владеењето на правото“, рече Иванов.
Новоименуваниот холандски амбасадор Вилем Ваутер Пломп нагласи дека Кралството Холандија и понатаму ќе остане силен поддржувач на интеграцијата на Република Македонија во евро-атланските структури, а во однос на билатералната соработка ќе се продолжи со пружање на практична помош преку ИПА инструментите на ЕУ, твининг договори и билатералната програма МАТРА.
„Нема сомнение дека Македонија, која секогаш била дел од европската историја и која во последните денови се справува со зголемениот број на бегалци и мигранти кои се на пат кон Западна Европа, ќе може да го даде својот придонес кон развојот на европските институции во 21. век како мулти-етничка и мулти-културна демократија,” истакна г. Ваутер Пломп.
На свеченоста по повод предавањето на акредитивните писма од страна на новоименуваниот амбасадор на Хрватска, Данијела Баришиќ, претседателот Иванов ја нагласи сестраната соработка меѓу двете земји на сите полиња од заеднички интерес и констатираше дека постои јасно изразена волја за интензивирање на економската соработка и трговската размена, со заедничка цел за целосно искористување на економските потенцијали на двете земји. Македонскиот претседател изрази задоволство и од соработката кои двете земји ја имаат и на мултилатерален план за што е доказ редовната меѓусебна поддршка во меѓународните организации.
„Во целиот регион сè уште има сериозни предизвици, чиишто извори се од минатото. Нема друга одржлива сила што неповратно ќе го стабилизира Балканот и ќе донесе траен мир, освен евроатлантските интеграции. Затоа, оправдано очекуваме од Република Хрватска уште позасилена поддршка во наредниот период”, подвлече претседателот Иванов.
Новоименуваниот хрватски амбасадор Данијела Баришиќ истакна дека нејзиниот мандат ќе биде насочен кон зајакнување на заемните економски односи, за што постојат многу можности, особено во прехрамбената, фармацевтската индустрија и градежништвото, како и на политички и на безбедносен план, нагласувајќи дека Хрватска и понатаму е подготвена на секој начин да и помогне на Македонија на нејзиниот пат во Европската унија и НАТО и тоа не како патрон, туку како партнер.
„Нашиот заеднички интерес како на земјите од регионот и на Европска унија е политичка стабилност, а спроведување на реформи на патот на евро атлантските интеграции е најдобра гаранција за постигнување на безбедност и стабилност”, рече г-ѓа Баришиќ.
Иванов на новоименуваните амбасадори им честита за функцијата и им посака успех во вршењето на одговорната дипломатска должност./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.