Надворешна политика
Јолевски–Катиќ: Интензивната соработка и интеграцијата во НАТО се најдобар одговор за предизвиците во регионот
Билатералната и регионалната соработка како и интеграцијата во НАТО – алијансата се клучот за одржување на безбеден и стабилен регион, регион кој има капацитет да се справи со современите предизвици, заклучија во четвртокот на средбата во Љубљана, министрите за одбрана на Македонија и Словенија, Зоран Јолевски и Андреја Катиќ.
Во рамките на работната посета на Словенија, Јолевски се заблагодари на својата словенечка колешка за безусловната поддршка на патот на Македонија кон НАТО алијансата и побара истата да продолжи и да се интензивира во очи самитот на Алијансата во Варшава, оваа година. „Македонија ги исполни сите критериуми за членство, а дава и сериозна поддршка кон мисиите на Алијансата. Со еден збор, Македонија заслужува да биде поканета во НАТО“, истакна министерот Јолевски на средбата. Министерката Катиќ експлицитно на средбата и на прес-конференцијата истакна дека Словенија целосно ја поддржува интеграцијата на Македонија во НАТО.
Воедно, на состанокот министерот Јолевски истакна дека е задоволен од развојот на билатералната соработка помеѓу двете земји, особено во областа на военото образование и заедничките вежби. „Реализацијата на вежбите на армискиот полигон ’Криволак’ ни помага да ја развиеме меѓусебната интероперативност, како и интероперативноста со НАТО-алијансата“, додаде министерот. Министерот Јолевски упати покана за учество во регионалните центри во Македонија, меѓу кои и НАТО-центарот за односи со јавноста, како и за упатување на припадници на словенечката армија на школување во Воената академија во Скопје.
Соговорниците разговараа и за Стратешкиот одбранбен преглед, кој е во фаза на изработка во Министерството, при што министерката Катиќ изрази подготвеност за помош во размена на искуства и експерти.
Осврнувајќи се на предизвиците од мигрантската криза, министрите Јолевски и Катиќ посочија дека е потребно сеопфатно заедничко решение кое ќе го гарантира хуманиот третман на мигрантите, но истовремено ќе помогне во одржувањето на безбедноста на граѓаните во земјите од регионот. Во тој контекст министерот Јолевски додаде дека е потребна сеопфатна стратегија за решавање на мигрантската криза во која ќе бидат вклучени сите европски земји и Турција за целосно решавање на овoj предизвик кој го зафати континентот./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.