Надворешна политика
Јолевски – Креј: Македонија и САД со одлична соработка во областа на одбраната
Висока воена делегација на националната гарда (НГ) на сојузната држава на САД, Вермонт, предводена од командантот на Началникот на генералштабот на Вермонт, генерал-мајор Стивен Креј од понеделник престојува во тридневна посета на АРМ.
При посета на Генералштабот на АРМ и Министерството за одбрана, генералот Креј оствари средба и со министерот за одбрана на Република Македонија, Зоран Јолевски, при што двајцата соговорници ја истакнаа соработката меѓу Началникот на генералштабот на Вермонт и АРМ, како плод на одличната соработката во одбраната меѓу Македонија и САД.
Дополнително беше констатирано дека оваа соработка треба да продолжи да се развива во континуитет. Од страна на Јолевски беше кажано дека од оваа година на Воената академија во трета и четврта година ќе започне да се предава на англиски јазик. На овој начин ќе им се овозможи на студенти од другите земји да студираат токму тука и истакна дека би сакал припадници од НГ на Вермонт да дојдат и да изучат неколку семестри. Генералот Креј ја поддржа идејата и додаде дека ова ќе биде значаен бенефит за двете институции.
Генералот Величковски, пак, истакна дека годинава се навршуваат дваесет години од партнерството помеѓу АРМ и НГ на Вермонт, за време на кои земјата може да се пофали со многу резултати од заедничката обука, како и различните форми на соработка, што беше крунисано со заедничкото учество во наменските сили ,,Феникс“ во рамките на мисијата ИСАФ во Авганистан во 2010 година.
Заблагодарувајќи се за поддршката од НГ на Вермонт, НГШ на АРМ нагласи дека на средбата со генералот Креј разговарале за продлабочување на соработката со НГ на Вермнонт, која ја оцени како плодна и продуктивна, при што додаде дека ќе биде заокружена со претстојната посета на САД, заедно со министерот за одбрана Зоран Јолевски.
Генералот Креј се заблагодари на гостопримството, истакна дека АРМ и НГ на Вермонт и во иднина ќе продолжат да работат рамо до рамо на различни нивоа, потсетувајчи при тоа на заедничкото распоредување на сили, развојот на офицерите и подофицерите, работа на задачи како подготовка за изведување на операции како подготовка за справување во катастрофи, нагласувајќи дека секоја година соработката помеѓу двете армии напредува.
Командантот на НГ на Вермонт потенцираше дека трајното партнерство на НГ на Вермонт со АРМ е изградено врз столб на пријателство, а дека соработката резултира со успешно изведување на вежби и операции, при што посебно ги истакна меѓусебните професионални односи и лични пријателства во Македонија./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.