Надворешна политика
Јолевски: Македонија заслужува што побрзо да стане полноправен член на Алијансата
За Република Македонија е значајно група интелектуалци кои имале високи позиции во американското и европското општество, луѓе кои се вистински пријатели на нашата држава да седнат на исто место и да поразговараат за стратегијата што дополнително треба да се направи со цел да го заземеме заслуженото место во НАТО, изјави во понеделникот министерот за одбрана Зоран Јолевски на отворањето на дводневниот неформален форум во Берово на кој учество земаат поранешни министри за одбрана, членови на парламент и високи претставници на тинк-тенк заедницата во САД.
Разменивме многу мислења и голем број идеи, посочи министерот, кои ќе ни помогнат во презентирањето на аргументите зошто Република Македонија треба да биде дел од Алијансата. „Тоа е особено важно ако имаме предвид дека следниот самит на Алијансата ќе се одржи летото идната година во Полска, до кога треба да ги искористиме сите инструменти за да постигнеме најдобар резултат на патот кон нашето полноправно членство“, рече Јолевски.
Во контекст на начините како да се достигне посакуваната цел, министерот порача дека треба да се работи на постојано привлекување на пријатели на Македонија кои ќе бидат и моќен глас зошто Македонија треба да биде дел од НАТО.
„Воедно, и нашите мировници се едни од најдобрите амбасадори – тие покажуваат дека Македонија е одговорен член и партнер на меѓународната заедница во носењето на мир, демократија и стабилност во светот“, истакна Јолевски, додавајќи дека тоа сепак е и исклучителна можност нашите мировници да добијат дополнителна обука и вештини кои се значајни за квалитетот на Армијата на Република Македонија.
„Тука сум да ја поддржам Македонија. Вие ги имате исполнето сите критериуми согласно Акцискиот план за членство и ние треба да ги притиснеме нашите сојузници да го направат она вистинското, односно да ја примат Македонија како полноправен член во НАТО“, рече Сели Пеинтер, аналитичар и истакната личност од американската тинк-тенк заедница со големо искуство во однос на претходните проширувања на Алијансата. Таа додаде дека Македонија е силен партнер и дека Алијансата треба да ја промени својата одлука.
Лук Кофи од американската „Херитиџ Фондација“ истакна дека Македонија мора да продолжи на патот на партиципација и интензивен контакт со НАТО.
„Македонија носи голем бенефит кон глобалната сигурност, но не ги ужива бенефитите од членство во Алијансата. Им порачувам на македонските граѓани, иако е тешко, да бидат трпеливи. Ако имате еден член на НАТО кој не го цени тоа што го правите, има 27 земји членки кои тоа вистински го ценат“, додаде Кофи. Тој воедно високо ги оцени и реформските зафати во одбраната, особено во контекст на воената едукација и образование кои уште повеќе ќе ја доближат Македонија до Алијансата.
Неформалниот форум во Берово на едно место собра интелектуалци и истакнати личности меѓу кои и поранешниот министер за одбрана и сегашен член на Парламентот на Обединетото Кралство, Лиам Фокс, американскиот генерал Бен Фрикли и други, кои разговараат за евроаталнтските интеграции на Македонија, геополитичките промени и предизвици, регионот на Југоисточна Европа и позицијата на Република Македонија во него./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.