Надворешна политика
Јолевски – Вејонис: Македонија е целосно подготвена за интеграција во НАТО и ЕУ
Министерот за одбрана на Република Македонија, Зоран Јолевски во понеделник и вторник е домаќин на својот колега од Латвија, Рејмондс Вејонис, а во рамките на денешниот состанок двете делегации остварија средба на која се дискутираше за продолжување и продлабочување на одличната соработката во одбраната.
На средбата беа разменети мислења за актуелните политички и геостратешки ссостојби во регионот, Европа и пошироко, интеграцијата на Македонија во НАТО и ЕУ, воспоставување соработка на полето на високото образование и обуките за воените лица, како и можноста за заедничко учество во мировни операции како во НАТО, така и во ЕУ мисиите.
За време на средбата Јолевски посочи дека денешниот состанок е само дополнителен импулс во натамошниот развој на билатералната соработка, особено на полето на одбраната меѓу двете земји. Тој во оваа прилика изрази благодарност до својот колега за поддршката која Латвија и ја дава на Македонија во остварувањето на нејзините аспирации за членство во НАТО и ЕУ и дополнително посочи дека Македонија е целосно посветена во остварување на овие цели и дека има огромна поддршка од граѓаните за членство во евроатлантското семејство и Европската унија.
Јолевски истакна дека билатералните односи меѓу двете земји се одлични и дека е договорено да се продолжи со соработката во таа насока. Според Јолевски се разгледаа можности за воспоставување на соработка во областа на високото образование и во обуката на високите офицери. Министерот за одбрана на Македонија додаде дека преставници на АРМ учествуваа на командно штабните школи во Латвија што преставува голем придонес за Армијата.
Македонскиот министер порача дека за време на средбата помеѓу двете делегации се разговарало и за учество и користење на капацитети од страна на претставниците на Армијата на Република Латвија во Република Македонија како што се Регионалниот Центар за односи со јавност, Центарот за обука на пилоти и Воената академија во Скопје каде што идната година еден семестар ќе се предава на англиски јазик.
Јолевски додаде дека за време на средбата на својот колега му ги претставил аргументите во однос на прашањето зошто Македонија треба што поскоро да добие покана за членство во НАТО.
„Интеграцијата на Република Македонија во НАТО и ЕУ е добра за стабилноста и просперитетот не само на Македонија туку и на целиот регион и на овој дел од Европа“, рече Јолевски.
Министерот за одбрана на Латвија, Рејмондс Вејонис, во изјавата за медиумите најнапред го изрази своето сочуство за трагичните настани кои се случија во Република Македонија.
„За нас е многу важно да го одржуваме дијалогот и врските со нашите пријатели и партнери. Латвија отсекогаш ги поддржувала аспирациите на Македонија за зачленување во НАТО и ЕУ. Многу ми е мило што гледам дека сте постигнале многу во текот на овие години во поглед на одбраната и безбедноста како што гледам развојот на вашите вооружени сили и придонесот кон меѓународните операции и тесната соработка се многу важни фактори кон вашиот пат кон НАТО. Латвија е дефинитивно горда да ја нарече Македонија свој пријател“, изјави Вејонис.
Министерот Вејонис додаде дека Латвија која во моментов претседава со Советот на ЕУ ја подвлекува важноста од прием на нови членки кои ги споделуваат истите норми и вредности со нас и кои работат кон исполнување на неопходните критеируми за влез. „За нас е многу значајно да ја зацврстиме соработката со Македонија и во текот на средбата дискутиравме за начини и насоки со кои би се одвивала идната соработка“ – додаде Вејонис.
Вејонис во својата изјава дополнително додаде дека еден од клучните фактори за понатамошен развој и за зачленување во НАТО е зголемувањето на Буџетот на одбраната, кој е еден од најважните фактори што има влијание за развој на Армијата т.е. инвестирањето во способностите на Армијата, развивањето на интероператибилноста со повеќе земји членки од НАТО.
На средбата помеѓу двете делегации присуствуваше и Началникот на Генералштабот на АРМ, генерал потполковник, Горанчо Котески кој посочи дека Армијата на Република Македонија е во процес на трансформација и за време на овој процес се работи истовремено и на модернизација на Армијата. Овие процеси се значајни за подигнување на способноста на припадниците на АРМ како и интероперабилност со нашите партнери./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.