Надворешна политика
Македонија може да го зголеми учеството во мировни операции на ООН
Министерот за одбрана, Зоран Јолевски, во понеделник, во Седиштето на Обединетите Нации во Њујорк учествуваше на Самитот посветен на мировните операции и идните потреби на Обединетите Нации во оваа насока.
Министерот Јолевски, во повеќе наврати досега укажа на тоа дека Македонија високо го цени придонесот на мировните операции на ООН кон одржување на меѓународниот мир и безбедност. Во тој контекст, министерот посочува дека Македонија сериозно ќе ги разгледа можностите за зголемен придонес кон операциите на ООН, согласно потребите на Организацијата и националните капацитети.
„Имав бројни состаноци и една од иницијативите од моја страна до земјите од Југоисточна Европа, односно процесот СЕДМ е заедничко упатување на војници во мировни мисии на ООН. Врз основа на документот кој го предложив, ќе разговараме со нашите партнери и во иднина. Втора опција е упатувањето на наши офицери и војници во рамките на контингентите на Италија која е најголем контрибутор од Европа кон мировните операции на ООН“, изјави министерот Јолевски по самитот.
Министерот дополни дека како трета опција која ќе се разгледува при посетата на САД е трилатералното партнерство кое Македонија го развива со државата Вермонт од САД и Сенегал и можностите за заедничко упатување на војници во мировни операции на ООН.
Генералниот секретар на Организацијата, Бан Ки-Мун во своето обраќање пред присутните порача дека потребата од мировни операции никогаш не била поголема.
„Мировниците имаат голем број задачи – тие се соочуваат со екстремисти, криминални и други групи кои немаат никаква почит кон хуманитарното или човековите права“, истакна Ки-мун пред лидерите и претставниците на над 50 земји.
Самитот кој се одржа на маргините на 70-тото Генерално Собрание на ООН на едно место ги собра контрибуторите кон мировните операции на ООН, како и оние кои планираат идно можно учество во рамки на овие мировни мисии. При отворањето, претседателот на САД, Барак Обама се осврна на значењето на поддршката кон мировните операции на ООН. „Ние сме тука, заедно, за да ја зацврстиме и реформираме ООН и нејзините мировни операции, бидејќи тоа го бара заедничката безбедност“, рече претседателот на САД, Обама.
Македонија е дел од мировната операција на ООН, УНИФИЛ во Либан од 2007 година. Досега се извршени седум ротации на позицијата штабен офицер./крај/со/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.