Надворешна политика
Милановиќ-Заев: Да се обезбедат правната држава и регуларни избори
Претседателот на СДСМ, Зоран Заев, придружуван од генералниот секретар на СДСМ и министер за внатрешни работи Оливер Спасовски и членот на Извршниот одбор Едмонд Адеми, во среда во Загреб се сретна со претседателот на хрватската SDP, Зоран Милановиќ, придружуван од потпретседателот Ранко Остојиќ, генералниот секретар Игор Драгован и меѓународната секретарка Каролина Леаковиќ.
Изразена е обострана поддршка на соработката меѓу двете сестрински партии од левиот центар и нејзино натамошно развивање во правец на интересите на граѓаните на Македонија и на Хрватска.
На средбата беше разговарано за актуелните политички состојби во двете земји. Во врска со ситуацијата во Македонија за „уништените демократски вредности и погазената правна држава од страна на актуелната власт“ и за потребата за обнова на демократскиот и правниот поредок, за Македонија да се врати на евроинтеграцискиот пат, каде што припаѓа, информираат македонските социјалдемократи.
Околу разврската на актуелната политичка криза, Заев го потенцираше цврстиот став на СДСМ за укинување на апсурдната одлука на Ѓорге Иванов за аболиција на политичари од власта кои се занимавале со криминал, соопштуваат од партијата.
„Власта на Никола Груевски го погази Договорот од Пржино, но тој ги содржи решенијата за политичката криза во Македонија. Мора да има регуларни избори, мора да се спроведат медиумски реформи и да почне одвојувањето на партијата од државата. Од повлекување на аболицијата и од регуларни избори бегање нема“, соопшти Заев.
Милановиќ изразил силна поддршка од неговата SDP на заложбите на претседателот Заев, СДСМ и граѓаните во Македонија за враќање на правната држава и демократските вредности.
„Правото мора да важи подеднакво за сите. На Македонија и се потребни слободни и регуларни избори, зашто на тој начин ќе добие легитимна Влада што ќе може да ги развива овие цивилизациски придобивки на современиот свет. Таму е местото на Македонија и очекуваме државата да се врати на тој пат“, нагласил Милановиќ.
Заев во име на СДСМ и на граѓаните на Македонија оддаде признание на претседателот челникот на SPD Милановиќ, за неговата улога како премиер на Хрватска во промоција на регионалната соработка и напорите за демократски евро-атлантски перспективи на регионот./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.