Надворешна политика
Мирни, стабилни и демократски земји на западен Балкан се од стратешки интерес на ЕУ
Дваесет години по војните на западен Балкан, регионот е мирен и сите држави од регионот се стремат да станат земји-членки на ЕУ, но постигнатиот напредок сепак не треба се земе здраво за готово бидејќи стабилноста на регионот се уште се потпира врз несигурни темели и во голема мера зависи од поддршката на Европската унија (ЕУ), се вели во заедничката изјава на министрите за надворешни работи на Австрија и Германија, Себастијан Курц и Франк Валтер Штајнмаер, по повод одржувањето на Виенската конференција посветена на земјите од западен Балкан.
„Очекувањата за членство во ЕУ досега беа единствен најважен поттик за имплементацијата на тешките но потребните реформи како и за оддржливи напори за помирувањето во регионот.Нашата посветеност, на западниот Балкан да му се даде европска перспектива останува клучна во обезбедувањето на трајна стабилност во регионот како и во однос на заокружувањето на трансформацијата на политичките системи, економии и општества во регионот. Мирни, стабилни и демократски земји на западен Балкан се од стратешки интерес на Европската унија“, порачуваат Курц и Штајнмаер.
Двајцата министри додаваат дека Берлинскиот процес, инициран во 2014 година од страна на Германија оваа година продолжува и е организиран од страна на Австрија, додава нов момент и ја реафирмира посветеност на овие земји за таа перспектива.
Виенскиот самит на 27-ми август е втор по ред од петте планирани самити до 2018 година. Како и на првиот самит во Берлин така и на Виенскиот самит ќе учествуваат премиери, министри за надворешни работи и министри за економија на сите држави од западен Балкан, заедно со сите релевантни интересни групи од Европската унија и меѓународните институции. Целта е трикратна: прво – да се нагласи конкретниот постигнат напредок во регионот, второ – повторно потврдување и зајакнување на европската перспектива на сите земји во регионот и трето – забрзување на реформите, зголемување на економските можности и поттикнување на соработката во регионот.
„Минатата година во Берлин се согласивме да се фокусираме врз конкретни проекти, од едноставна причина што луѓето од западен Балкан очекуваат опипливи бенефити на патот кон Европската унија, во однос на поврзаноста, вработувањето, образованието, човековите права, владеењето на правото и демократијата. Како потпора на економскиот развој регионалните лидери се согласија за регионалната централна транспортна мрежа и соодветните коридори. Европската комисија е подготвена до 2020 година како поддршка да стави на располагање 1 милијарда Евра. Тоа ќе придонесе за подобро взаемно поврзување на земјите од западен Балкан како и за нивното поврзување со ЕУ. Исто така сакаме да помогнеме во создавањето на нови економски перспективи за младите во западен Балкан. Австрија и Германија можат да понудат ефикасна експертиза на тоа поле, нпр. преку нивен дуален образовен систем во стручните училишта. Ќе биде претставена регионалната иницијатива за размена на млади, базирана врз многу успешните француско-германски и полско-германски модели. Тоа треба да придонесе за уривање на се уште постоечките ѕидови во умовите на младите луѓе и за помирување“, порачуваат шефовите на дипломатиите на Австрија и Германија.
Двајцата, исто така, додаваат дека активното цивилно општество и слободни медиуми се основни столбови на секоја модерна и успешна демократија, а Виенскиот форум на цивилното општество ќе ги нагласи вредностите како форуми за дебати и мирно решавање на социјалните прашања како и нивната витална улога во барањето одговорност од владите.
„Без сомневање, треба уште многу да се сработи а тоа го покажуваат и непријатните инциденти во Сребреница оваа година како и најновата ситуација со мигрантите. Сепак, постојат и неколку впечатливи успешни приказни. ЕУ успеа да ги седне на преговарачка маса Србија и Косово. Тие постигнаа импресивен напредок на патот кон нормализацијата на нивните односи. Бидејќи сеуште многу работи треба да бидат решени, ние ги охрабруваме раководствата на Србија и Косово и понатаму да бидат посветени на таа работа. Неодамнешните успешни обиди на комесарот Хан во Скопје доведоа до договор меѓу најголемите политички партии. Ги повикуваме партиите сега да го трасираат патот за слободни и фер избори во април наредната година, со целосно имплементирање на потребните внатрешни реформи, создавајќи повеќе исти можности за сите политички кандидати. Во Босна и Херцеговина обновениот ЕУ пристап придонесе кон насочување на вниманието врз социо-економските реформи од кои сите граѓани во земјата ќе профитираат. Тие примери покажуваат дека ангажманот на Европската унија има позитивно влијание во надминувањето на најтешките ситуации“, велат Курц и Штајнмаер.
„За време на конференцијата исто така ќе биде посветено големно внимание на фактот што рутата преку западен Балкан стана главна рута на растечкиот број на бегалци кои бараат заштита во Европа. Најновите настани кај пограничниот македонски град Гевгелија се потврда за тоа. Тој развој претставува значителен предизвик за пограничните власти и системот за барање азил во некои од земјите на западен Балкан и во државите-членки на ЕУ. И државите на западен Балкан исто така треба да преземат одговорност во справувањето со тие предизвици. Но тие не се сами: Ние во Виена ќе дискутираме, на кој начин Европската унија и одделните држави-членки на ЕУ можат да ги поддржат земјите од западен Балкан во нивните напори за подобрување на обезбедувањето на границата и системот за азил. На 27-ми август ние ќе ја потврдиме нашата посветеност на европската перспектива за сите земји од западен Балкан како и нашата континуирана поддршка за овој регион. Вратата на Европската унија мора да остане отворена за регионот на западен Балкан со цел да се обезбеди, Европската унија да остане најуспешен мировен проект во светот. Јасно е дека без западен Балкан Европската унија не е комплетна“, заклучуваат Курц и Штајнмаер./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.