Надворешна политика
Попоски: На Македонија за мигрантите малку пари, многу негативен публицитет
Македонија којашто веќе подолг период е соочена со навалицата од мигранти и бегалци не доби многу помош од Европската унија, но неоправдано стекна многу негативен публицитет поради наводните бруталности на нејзините безбедносни сили, изјави во четвртокот во разговорот за Словенечката телевизија, македонскиот министер за надворешни работи Никола Попоски.
Освен вербалните изрази на солидарност, Македонија од Европската унија досега не доби многу, а иако од почетокот на 2015 година регистрирала 130.000 бегалци, од што повеќе од 50.000 само во последните месец и половина, конкретна помош не ѝ е понудена, рече шефот на македонската дипломатија гостувајќи на словенечкиот јавен сервис.
„Единствената конкретна помош изнесуваше 18.000 евра за македонскиот Црвен крст“, реле Попоски, додавајќи дека трошоците коишто Македонија ги има со мигрантите се изразуваат во милиони евра.
Доколку продолжи сегашниот тренд на доаѓања на бегалците и мигрантите од Блискиот исток и Африка во Македонија, до почетокот на зимата бројката на регистрирани вакви лица би можела да се искачи до 200.000, а сегашната ситуација е парадоксална, бидејќи во Македонија доаѓаат од Европската унија, односно од нејзината членка Грција.
„Лесно е да се осудува Македонија од далеку, а да не се помага да се надмине проблемот. Би можеле да се однесуваме неодговорно и да кажеме дека тоа не е наша грижа, и да ја отвориме границата за сите, но тоа би било неодговорно и би ја засилило кризата во Европската унија“, предупреди Попоски.
Македонскиот министер за надворешни работи смета дека мигрантската криза би требало да се решава онаму каде што се појави или во државите во коишто прво избегаа, а товарот од неа поправедно да се распредели.
„Доколку во првата фаза ѝ се помогнеше на Турција, каде што има најмногу бегалци, денес Европа ќе имаше помалку тешкотии. Трајното решение би било, несомнено, стабилизирањето на државите извори на мигрантите, како што се Сирија и Ирак, но тоа е далечно со години. Дотогаш мораме на бегалците кои се кај нас да им осигуриме безбедност и услови за живот“, рече Попоски.
Турција од почетокот на граѓанската војна во Сирија во март 2011 година примила два милиона бегалци, и соопшти дека потрошила шест милијарди долари, а примила само 400 милиони долари. Анкара повеќепати предупредуваше дека ги исцрпела своите капацитети и ресурси, па поради тоа стотици илјадници сириски бегалци летово се одлучуваат на опасното патување со дотраени чамци и импровизирани сплавови до Грција.
„Долгорочно, бегалците би морале да добијат помош поблиску до своите татковини, а тоа значи дека во тоа би требало да биде вклучена Турција. Меѓутоа, нејзиниот аргумент е дека на своја територија веќе има два милиона бегалци и дека никој не ги слушал кога предупредувале на проблемот“, рече Попоски./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.