Надворешна политика
Попоски: Транзитирањето на над милион бегалци низ Македонија е директен ефект од конфликтите на Блискиот Исток
Министерот за надворешни работи Никола Попоски имаше воведно обраќање на конференцијата: „Конфликтот на Блискиот Исток и Северна Африка: зголемување на транснационалните закани за безбедноста на земјите од Западен Балкан“, во организација на Институт за геостратешки истражувања и надворешна политика при Министерството за надворешни работи, во соработка со Европскиот центар за безбедносни студии George C. Marshall. Свои пригодни обраќања имаа и амбасадорите на САД, Џес Бејли и СР Германија, Кристина Алтхаузер и Директорот на ИГНИП, Амбасадор Абдулкадар Мемеди.
Попоски се осврна на политичко – безбедносната ситуација во регионот на Блискиот Исток и Северна Африка – МЕНА, актуелните конфликти и транснационалните закани и влијанија кои произлегуваат од овие конфликти по националната безбедност на Република Македонија и земјите од Западен Балкан.
„Важни се два аспекти. Првиот, како оваа дестабилизација во Блискиот Исток влијаеше директно врз Република Македонија и земјите од регионот и вториот, како ние влијаевме на истата, кои се нашите очекувања. На еден брутален начин, за кратко време сфативме колку сме блиску до Блискиот Исток, не може толку високо ниво на конфликтност блиску до една мала географска одредница да не се почувствува. Транзитирањето на над милион бегалци низ Република Македонија како транзитна станица на еден масовен и неорганизиран начин е директен ефект од конфликтите на Блискиот Исток врз нашата држава. Република Македонија имаше пред себе две опции. Првата, да биде обичен набљудувач и да постави табли колку километри се оддалечени западно – европските земји, која претставува лесна и евтина опција или втората, ризична, потешка и поскапа опција, да биде дел од заедничкиот европски одговор“, порача Попоски.
Според министерот, Европа сепак не би била Европа без хумана димензија. „Ние се одлучивме за втората, поскапа и потешка опција, заедно со нашите партнери и соседи да бидеме дел од едно европско решение. Во секоја мака има и можности! Една од тие можности е поголемата соработка со нашите соседи. Никогаш не сме имале поголема соработка со грчките власти како сега околу мигрантската криза. Интерес на сите нас е решение во европски рамки. Друга можност е наше докажување колку сме значаен партнер во однос на европската интеграција. Сами неможеме ниту ние да имаме решение за мигрантска криза ниту Европа без нас ќе има подобро решение“, рече Попоски.
Учесниците се осврнаа на теми и прашања во врска со конфликтите на Блискиот Исток и во Северна Африка и на зголемувањето на транснационалните закани за безбедноста на земјите од Западен Балкан, како радикализација на младите, можноста за инфилтрација на припадници на терористички организации низ бегалските рути, како и зголемениот број повратници од кризните региони, што претставува вистински предизвик и растечка закана за националната безбедност на државите./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.