Заменикот министер за надворешни работи, Андреј Жерновски, го прими Дејвид Спроул, генерален директор за европски и евро-азиски прашања во Министерството за надворешни работи на Канада.

На средбата беше направен пресек на билатералните односи помеѓу двете земји, кои беа оценети како традиционално блиски и пријателски, со потенцијал за нивен натамошен развој и унапредување. Соговорниците се осврнаа и на состојбите и актуелните прашања во регионот.

Жерновски, заблагодарувајќи се на континуираната поддршка од Канада во остварување на стратешките приоритети на нашата држава, изрази очекување за продолжување на соработката меѓу двете земји во областите од заемен интерес. Од страна на директорот Спроул беше истакнато дека полноправното членство на нашата земја во НАТО и отпочнувањето на процесот за интегрирање во ЕУ претставува значаен придонес кон стабилноста и просперитетот на регионот.

Соговорниците со задоволство констатираа дека полноправното членство на Република Северна Македонија во НАТО претставува ново стратешко сојузништво со Канада на глобален план.

Во текот на вчерашниот ден во Стразбур министерката за правда Рената Дескоска оствари официјална средба со генералниот секретар на Советот на Европа, Марија Пејчиновиќ-Буриќ.

На средбата министерката за правда во име на Владата го потпиша Протоколот за измена на Конвенцијата за заштита на лица во однос на автоматска обработка на лични податоци (CETS бр.223). Потпишувањето е историски момент за Северна Македонија, бидејќи за првпат се потпишува конвенција во Советот на Европа под новото име, директно, без размена на писма.

Република Северна Македонија е 37. земја потписничка на протоколот со кој се врши модернизација на Конвенцијата за заштита на лица во однос на автоматска обработка на лични податоци (ETS 108) и на дополнителниот протокол кон Конвенцијата за заштита на поединците во поглед на автоматска обработка на лични податоци, во врска со надзорните тела и прекуграничниот пренос на податоци (ETS No.181), како и зајакнување на нивната примена.

Со модернизацијата на Конвенцијата 108 од 1981 година, нејзините оригинални принципи беа реафирмирани, некои се зајакнати, но утврдени се и нови заштитни мерки: Тие треба да се применуваат на новaта реалност на онлајн светот, а новите практики доведоа до признавање на нови принципи во областа. Принципите на транспарентност, пропорционалност, одговорност, минимизирање на податоците, приватност по дизајн, итн.  сега се признати како клучни елементи на механизмот за заштита и се интегрирани во модернизираниот инструмент.

Имајќи ги  предвид новите предизвици за заштитата на лицата во однос на обработката на личните податоци, како и фактот дека целта на модернизацијата која се врши со Протоколот е што подобро да се реагира на предизвиците во областа на приватноста кои произлегуваат од зголемената употреба на новите информациско/информатички технологии и глобализацијата во однос на обработката на личните податоци, се оцени дека е целисходно и од интерес за Република Северна Македонија да се пристапи кон потпишувањето на Протоколот за измена на Конвенцијата за заштита на лица во однос на автоматска обработка на лични податоци (CETS 223), соопшти Министерството за правда.

Премиерот Зоран Заев денеска ја прими хрватската амбасадорка Нивес Тигањ, која од неодамна стапи на должноста во нашата земја.

На средбата амбасадорката Тигањ истакна дека е позната поддршката која Хрватска ја дава на Северна Македонија за остварување на двете стратешки определби, интеграцијата во НАТО и Европската Унија.

„Вашата земја направи огромен исчекор во остварувањето на реформските процеси и покажувањето спремност за зачувување на стабилноста во земјата и регионот“, истакна Тигањ.

На средбата се разговараше и за претстојниот период, кога Хрватска ќе го преземе претседавањето со ЕУ, при што соговорниците констатираа дека тоа е одличен момент за заокружување на поддршката и оти донесувањето на позитивна одлука ќе биде дополнителна мотивација за продолжување на реформите.