Надворешна политика
Шир: Канада го поддржува членството на Македонија во НАТО
Канада високо го цени учеството на македонските војници во меѓународните мировни мисии и дава перманентна поддршка за членство на Република Македонија во НАТО, истакна претседателот на Претставничкиот дом на Парламентот на Канада, Ендру Шир, во понеделник на средба со претседателот на македонското Собрание, Трајко Вељаноски.
На покана на претседателот на Собранието, Трајко Вељаноски денеска во официјална посета на Република Македонија престојува Ендру Шир, претседател на Претставничкиот дом на Парламентот на Канада.
На почетокот на средбата Вељаноски напоменал дека ваквите посети претставуваат потврда за блиските пријателски односи меѓу Република Македонија и Канада кои и во иднина ќе продолжат да се развиваат.
„Двајцата соговорници се согласија дека парламентарната соработка е успешна и бележи континуитет во размената на парламентарни делегации, преку директни контакти и средби помеѓу парламентарните групи за соработка кои ги има во двата парламенти се придонесува за дополнително развивање на меѓусебните односи“, соопштија од кабинетот на Вељаноски.
Претседателот на Собранието на средбата изразил благодарност за признавањето на уставното име на Република Македонија од страна на Канада во билатералната комуникација, како и силната и континуирана поддршка за нашите Евро-атлански интегративни процеси како најважен политички приоритет на Република Македонија.
На средбата соговорниците разговарале и за македонската заедница во Канада која претставува своевиден мост во вкупните билатерални, политички, економски и културни односи меѓу двете земји. Македонската заедница денеска е застапена скоро во сите општествени текови во животот во Канада, како политиката, економијата, науката и спортот.
Вељаноски ја нагласил потребата големи компании од Канада да инвестираат во Република Македонија со што ќе се зголеми економската соработка. Тој истакнал дека Република Македонија постојано работи на подобрување на условите за инвестирање во нашата земја. Претседателот на Претставничкиот дом на Парламентот на Канада, Ендру Шир изразил задоволство што Република Македонија е на добар пат и има стабилна економија и покрај големата економска криза и се согласи дека има простор за подобрување на ваквата соработка помеѓу двете земји. Тој нагласил дека Канада е отворена кон потпишување на трговски договори за соработка и дека со ратификацијата на договорот со Европската Унија ќе се зајакне присуството на Канада на европските пазари што ќе има позитивен ефект и врз Македонија.
На средбата, исто така, станало збор и за потребата од либерализација на канадскиот визен режим кон Македонија, а во прва фаза укинување на визите за дипломатски и службени пасоши.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.